Xalq deputatlari Amudaryo tumani Kengashining 19-sessiyasi toʻgʻrisida axborot

Joriy yilning 30-mart kuni yettinchi chaqiriq Xalq deputatlari Amudaryo tumani Kengashining navbatdagi 19-sessiyasi boʻlib oʻtdi. Sessiyada tuman hokimining oʻrinbosarlari, tegishli tashkilot va idoralar rahbarlari, ekspert guruhi aʼzolari, mahalla fuqarolar yigʻinlari raislari, xotin-qizlar faollari hamda ommaviy axborot vositalari vakillari ishtirok etdilar.

Sessiya ishini Xalq deputatlari tuman Kengashi raisi Alisher Yoʻldashev ochib berdi va olib bordi. Majlis Oʻzbekiston Respublikasi hamda Qoraqalpogʻiston Respublikasi davlat madhiyalari sadolari ostida boshlandi. Sessiya kotibligiga “25-Nazarxon” saylov okrugidan deputat Jetkerbay Ibragimov nomzodi deputatlar tomonidan bir ovozdan maʼqullandi.

Sessiya kun tartibiga kiritilgan bir qator muhim masalalar yuzasidan tuman iqtisodiyot va moliya boʻlimi boshligʻining oʻrinbosari Jahongir Yoʻldoshev hisobot berdi. Hisobotda, avvalo, alkogol mahsulotlarini realizatsiya qilish uchun yigʻimlarning cheklangan stavkalarini belgilash masalasi koʻrib chiqildi. Shuningdek, Oʻzbekiston Respublikasi Prezidentining 2025-yil 12-sentyabrdagi “Qishloq xoʻjaligiga moʻljallangan yerlarda mahsulot yetishtirishning uzluksizligini taʼminlash va yer resurslaridan samarali foydalanishni oshirish boʻyicha qoʻshimcha chora-tadbirlar toʻgʻrisida”gi PF-172-sonli Farmoni ijrosini taʼminlash borasida tumanda amalga oshirilayotgan ishlar haqida atroflicha maʼlumot berildi.

Shu bilan birga, 2026-yil uchun tashabbusli byudjet jarayonining birinchi mavsumi yakunlari boʻyicha amalga oshirilgan ishlar alohida eʼtibor markazida boʻldi. Qayd etilishicha, tashabbusli byudjet jarayoni uchun jami 17 mlrd 908 mln 158 ming 500 soʻm mablagʻ shakllantirilgan. Ushbu mablagʻlar quyidagi manbalar hisobidan jamlangan: joriy yil byudjet parametrlarida nazarda tutilgan 12 mlrd 243 mln 976 ming 500 soʻm, tashabbusli byudjet jamgʻarmasidagi qoldiq mablagʻlar — 3 mlrd 215 mln 949 ming 619 soʻm, 2025-yil ikkinchi mavsum yakunlari boʻyicha iqtisod qilingan mablagʻlar hisobidan qayta tiklangan 31 mln 732 ming 381 soʻm hamda 2025-yil yakunlari boʻyicha shakllangan erkin qoldiq mablagʻlarning kamida 30 foizi hisobidan yoʻnaltirilgan 2 mlrd 416 mln 500 ming soʻm mablagʻlar.

“Ochiq byudjet” portalida 2026-yil 1-fevraldan 20-fevralga qadar boʻlgan davrda tuman fuqarolari tomonidan jami 108 ta tashabbus ilgari surilgan. Ushbu tashabbuslarning 96 tasi masʼul tashkilotlar tomonidan qayta koʻrib chiqilib, jamoatchilik muhokamasi va ovoz berish jarayoniga qoʻyilgan. Ovoz berish jarayoni joriy yilning 10-martidan 20-martiga qadar davom etib, uning yakunlariga koʻra jamgʻarma doirasidagi mablagʻlar hisobidan eng koʻp ovoz toʻplagan 10 ta loyiha gʻolib deb topildi. Mazkur loyihalarning umumiy qiymati 16 mlrd 475 mln 323 ming 365 soʻmni tashkil etadi.

Kun tartibidagi navbatdagi masala — “Mahallalarda xavfsiz muhitni yaratish va huquqbuzarliklarning barvaqt oldini olish toʻgʻrisida” boʻlib, bu masala yuzasidan tuman ichki ishlar boʻlimi boshligʻining hisobotini boshliq oʻrinbosari Sharapat Joldasbayev oʻqib eshittirdi. Hisobotda qayd etilishicha, aholining huquqiy ongi va madaniyatini oshirish maqsadida turli ijtimoiy qatlamlar oʻrtasida keng qamrovli targʻibot ishlari amalga oshirilgan. Jumladan, voyaga yetmaganlar oʻrtasida 218 ta, xotin-qizlar oʻrtasida 162 ta, tarbiyasi ogʻir yoshlar oʻrtasida 134 ta hamda probatsiya nazoratidagi shaxslar oʻrtasida 26 ta profilaktik tadbirlar tashkil etilgan.

Shuningdek, bolalar tarbiyasiga masʼuliyatsiz yondashgan 463 nafar ota-onaga nisbatan maʼmuriy choralar koʻrilgan, 48 nafar tarbiyasi ogʻir oʻquvchi bilan individual profilaktik ishlar olib borilgan. Mahallalarda sodir etilgan 20 ta jinoyat holati jamoatchilik ishtirokida muhokama qilinib, ularning kelib chiqish sabablari tahlil etilgan. Notinch hamda ajrim yoqasidagi 145 ta oila bilan manzilli ishlash tashkil etilib, bu jarayonga 172 nafar imom-xatib va otinoyilar jalb qilingan hamda natijada 65 ta oilani yarashtirishga erishilgan.  

Sessiyada tuman hokimining oʻrinbosari — oila va xotin-qizlar boʻlimi boshligʻi Goʻzal Saburovaning faoliyati yuzasidan hisoboti ham tinglandi. Hisobotda mahallalarda istiqomat qilayotgan xotin-qizlarning muammolarini aniqlash va hal etish maqsadida muntazam ravishda uyma-uy oʻrganish ishlari olib borilayotgani taʼkidlandi. Oʻrganishlar jarayonida xotin-qizlarning ijtimoiy ahvoli, bandlik darajasi, oilaviy muammolari hamda turmush sharoitlari atroflicha tahlil qilinib, aniqlangan muammolarni bartaraf etish yuzasidan tegishli tashkilotlar bilan hamkorlikda zarur choralar koʻrilmoqda.

Joriy yil boshidan buyon 32 nafar xotin-qizlar faollari tomonidan uyma-uy yurib oʻtkazilgan xatlovlar natijasida ijtimoiy koʻmakka muhtoj 6022 nafar xotin-qizlar roʻyxati shakllantirilib, mahalla “yettiligi”ning kollegial qaroriga asosan “Ayollar daftari”ga kiritilgan. Ushbu toifadagi xotin-qizlarga manzilli yordam koʻrsatish maqsadida aniq chora-tadbirlar dasturi ishlab chiqilgan.

Xususan, 1-toifa — ijtimoiy himoyaga muhtoj ishsiz xotin-qizlar yoʻnalishida 1520 nafar, 2-toifa — tadbirkorlik faoliyatini boshlash istagidagi xotin-qizlar yoʻnalishida 71 nafar, uy-joy sharoitini yaxshilashga muhtoj xotin-qizlar boʻyicha 55 nafar, 4-toifa — tibbiy va psixologik yordamga muhtojlar boʻyicha 1749 nafar hamda 5-toifa — huquqiy yordamga muhtoj xotin-qizlar boʻyicha 2616 nafarga ijtimoiy koʻmak koʻrsatish rejalashtirilgan.

Shuningdek, ajrim yoqasidagi, nizoli hamda tazyiq va zoʻravonlikdan jabrlangan xotin-qizlarga tumanda tashkil etilgan “Oila va xotin-qizlar maskani” orqali malakali psixolog va yuristlar ishtirokida amaliy yordam koʻrsatish yoʻlga qoʻyilgan. Zarur hollarda mulkiy nizolarni hal etish uchun sud organlariga daʼvo arizalari kiritish bilan bogʻliq xarajatlarni qoplash ham belgilangan.

Sessiyada koʻp kvartirali uylarni mukammal va joriy taʼmirlash boʻyicha manzilli roʻyxatni tasdiqlash masalasi yuzasidan tuman qurilish va uy-joy kommunal xoʻjaligi boʻlimi boshligʻi Ahmadjon Rajapov axborot berdi. Unda tumandagi mavjud koʻp kvartirali uylarni bosqichma-bosqich taʼmirlash, ularning tutash hududlarida “yashil bogʻlar” barpo etish, 1991-yilgacha qurilgan uylarning elektron pasportlarini yaratish hamda 2026–2027-yillarga moʻljallangan infratuzilma loyihalarining asosiy parametrlarini belgilash boʻyicha dasturlar taqdim etildi.

Bundan tashqari, tuman favqulodda vaziyatlar boʻlimi boshligʻi Zafar Ahmedov tomonidan 2026-yilning birinchi choragi davomida favqulodda vaziyatlarning oldini olish va ularni bartaraf etish borasida amalga oshirilgan ishlar yuzasidan hisobot berildi.

Sessiya kun tartibidan, deputatlarning saylovchilar oldida hisobot berish jadvalini tasdiqlash, fuqarolarning turar joylarga boʻlgan mulk huquqi hamda yer uchastkalariga ijara huquqlarini eʼtirof etish boʻyicha qarorlarga oʻzgartirishlar kiritish, shuningdek, Yoshlar maslahat guruhiga oid qarorlarni takomillashtirish va doimiy komissiyalar reglamentini tasdiqlash masalalari ham oʻrin oldi.

Sessiya davomida kun tartibidagi barcha masalalar har tomonlama muhokama qilinib, ular yuzasidan tegishli qarorlar qabul qilindi. Shu bilan Xalq deputatlari Amudaryo tumani Kengashining 19-sessiyasi oʻz ishini yakunladi.

Charos Arslonova, tuman hokimligining Axborot xizmati rahbari.