Халқ депутатлари Амударё тумани Кенгашининг 19-сессияси тўғрисида ахборот

Жорий йилнинг 30 март куни еттинчи чақириқ Халқ депутатлари Амударё тумани Кенгашининг навбатдаги 19-сессияси бўлиб ўтди. Сессияда туман ҳокимининг ўринбосарлари, тегишли ташкилот ва идоралар раҳбарлари, эксперт гуруҳи аъзолари, маҳалла фуқаролар йиғинлари раислари, хотин-қизлар фаоллари ҳамда оммавий ахборот воситалари вакиллари иштирок этдилар.

Сессия ишини Халқ депутатлари туман Кенгаши раиси Алишер Йўлдашев очиб берди ва олиб борди. Мажлис Ўзбекистон Республикаси ҳамда Қорақалпоғистон Республикаси давлат мадҳиялари садолари остида бошланди. Сессия котиблигига “25-Назархон” сайлов округидан депутат Жеткербай Ибрагимов номзоди депутатлар томонидан бир овоздан маъқулланди.

Сессия кун тартибига киритилган бир қатор муҳим масалалар юзасидан туман иқтисодиёт ва молия бўлими бошлиғининг ўринбосари Жаҳонгир Йўлдошев ҳисобот берди. Ҳисоботда, аввало, алкоголь маҳсулотларини реализация қилиш учун йиғимларнинг чекланган ставкаларини белгилаш масаласи кўриб чиқилди. Шунингдек, Ўзбекистон Республикаси Президентининг 2025 йил 12 сентябрдаги “Қишлоқ хўжалигига мўлжалланган ерларда маҳсулот етиштиришнинг узлуксизлигини таъминлаш ва ер ресурсларидан самарали фойдаланишни ошириш бўйича қўшимча чора-тадбирлар тўғрисида”ги ПФ-172-сонли Фармони ижросини таъминлаш борасида туманда амалга оширилаётган ишлар ҳақида атрофлича маълумот берилди.

Шу билан бирга, 2026 йил учун ташаббусли бюджет жараёнининг биринчи мавсуми якунлари бўйича амалга оширилган ишлар алоҳида эътибор марказида бўлди. Қайд этилишича, ташаббусли бюджет жараёни учун жами 17 млрд 908 млн 158 минг 500 сўм маблағ шакллантирилган. Ушбу маблағлар қуйидаги манбалар ҳисобидан жамланган: жорий йил бюджет параметрларида назарда тутилган 12 млрд 243 млн 976 минг 500 сўм, ташаббусли бюджет жамғармасидаги қолдиқ маблағлар — 3 млрд 215 млн 949 минг 619 сўм, 2025 йил иккинчи мавсум якунлари бўйича иқтисод қилинган маблағлар ҳисобидан қайта тикланган 31 млн 732 минг 381 сўм ҳамда 2025 йил якунлари бўйича шаклланган эркин қолдиқ маблағларнинг камида 30 фоизи ҳисобидан йўналтирилган 2 млрд 416 млн 500 минг сўм маблағлар.

“Очиқ бюджет” порталида 2026 йил 1 февралдан 20 февралга қадар бўлган даврда туман фуқаролари томонидан жами 108 та ташаббус илгари сурилган. Ушбу ташаббусларнинг 96 таси масъул ташкилотлар томонидан қайта кўриб чиқилиб, жамоатчилик муҳокамаси ва овоз бериш жараёнига қўйилган. Овоз бериш жараёни жорий йилнинг 10 мартидан 20 мартига қадар давом этиб, унинг якунларига кўра жамғарма доирасидаги маблағлар ҳисобидан энг кўп овоз тўплаган 10 та лойиҳа ғолиб деб топилди. Мазкур лойиҳаларнинг умумий қиймати 16 млрд 475 млн 323 минг 365 сўмни ташкил этади.

Кун тартибидаги навбатдаги масала — “Маҳаллаларда хавфсиз муҳитни яратиш ва ҳуқуқбузарликларнинг барвақт олдини олиш тўғрисида” бўлиб, бу масала юзасидан туман ички ишлар бўлими бошлиғининг ҳисоботини бошлиқ ўринбосари Шарапат Жолдасбаев ўқиб эшиттирди. Ҳисоботда қайд этилишича, аҳолининг ҳуқуқий онги ва маданиятини ошириш мақсадида турли ижтимоий қатламлар ўртасида кенг қамровли тарғибот ишлари амалга оширилган. Жумладан, вояга етмаганлар ўртасида 218 та, хотин-қизлар ўртасида 162 та, тарбияси оғир ёшлар ўртасида 134 та ҳамда пробация назоратидаги шахслар ўртасида 26 та профилактик тадбирлар ташкил этилган.

Шунингдек, болалар тарбиясига масъулиятсиз ёндашган 463 нафар ота-онага нисбатан маъмурий чоралар кўрилган, 48 нафар тарбияси оғир ўқувчи билан индивидуал профилактик ишлар олиб борилган. Маҳаллаларда содир этилган 20 та жиноят ҳолати жамоатчилик иштирокида муҳокама қилиниб, уларнинг келиб чиқиш сабаблари таҳлил этилган. Нотинч ҳамда ажрим ёқасидаги 145 та оила билан манзилли ишлаш ташкил этилиб, бу жараёнга 172 нафар имом-хатиб ва отинойилар жалб қилинган ҳамда натижада 65 та оилани яраштиришга эришилган.  

Сессияда туман ҳокимининг ўринбосари — оила ва хотин-қизлар бўлими бошлиғи Гўзал Сабурованинг фаолияти юзасидан ҳисоботи ҳам тингланди. Ҳисоботда маҳаллаларда истиқомат қилаётган хотин-қизларнинг муаммоларини аниқлаш ва ҳал этиш мақсадида мунтазам равишда уйма-уй ўрганиш ишлари олиб борилаётгани таъкидланди. Ўрганишлар жараёнида хотин-қизларнинг ижтимоий аҳволи, бандлик даражаси, оилавий муаммолари ҳамда турмуш шароитлари атрофлича таҳлил қилиниб, аниқланган муаммоларни бартараф этиш юзасидан тегишли ташкилотлар билан ҳамкорликда зарур чоралар кўрилмоқда.

Жорий йил бошидан буён 32 нафар хотин-қизлар фаоллари томонидан уйма-уй юриб ўтказилган хатловлар натижасида ижтимоий кўмакка муҳтож 6022 нафар хотин-қизлар рўйхати шакллантирилиб, маҳалла “еттилиги”нинг коллегиал қарорига асосан “Аёллар дафтари”га киритилган. Ушбу тоифадаги хотин-қизларга манзилли ёрдам кўрсатиш мақсадида аниқ чора-тадбирлар дастури ишлаб чиқилган.

Хусусан, 1-тоифа — ижтимоий ҳимояга муҳтож ишсиз хотин-қизлар йўналишида 1520 нафар, 2-тоифа — тадбиркорлик фаолиятини бошлаш истагидаги хотин-қизлар йўналишида 71 нафар, уй-жой шароитини яхшилашга муҳтож хотин-қизлар бўйича 55 нафар, 4-тоифа — тиббий ва психологик ёрдамга муҳтожлар бўйича 1749 нафар ҳамда 5-тоифа — ҳуқуқий ёрдамга муҳтож хотин-қизлар бўйича 2616 нафарга ижтимоий кўмак кўрсатиш режалаштирилган.

Шунингдек, ажрим ёқасидаги, низоли ҳамда тазйиқ ва зўравонликдан жабрланган хотин-қизларга туманда ташкил этилган “Оила ва хотин-қизлар маскани” орқали малакали психолог ва юристлар иштирокида амалий ёрдам кўрсатиш йўлга қўйилган. Зарур ҳолларда мулкий низоларни ҳал этиш учун суд органларига даъво аризалари киритиш билан боғлиқ харажатларни қоплаш ҳам белгиланган.

Сессияда кўп квартирали уйларни мукаммал ва жорий таъмирлаш бўйича манзилли рўйхатни тасдиқлаш масаласи юзасидан туман қурилиш ва уй-жой коммунал хўжалиги бўлими бошлиғи Аҳмаджон Ражапов ахборот берди. Унда тумандаги мавжуд кўп квартирали уйларни босқичма-босқич таъмирлаш, уларнинг туташ ҳудудларида “яшил боғлар” барпо этиш, 1991 йилгача қурилган уйларнинг электрон паспортларини яратиш ҳамда 2026–2027-йилларга мўлжалланган инфратузилма лойиҳаларининг асосий параметрларини белгилаш бўйича дастурлар тақдим этилди.

Бундан ташқари, туман фавқулодда вазиятлар бўлими бошлиғи Зафар Аҳмедов томонидан 2026 йилнинг биринчи чораги давомида фавқулодда вазиятларнинг олдини олиш ва уларни бартараф этиш борасида амалга оширилган ишлар юзасидан ҳисобот берилди.

Сессия кун тартибидан, депутатларнинг сайловчилар олдида ҳисобот бериш жадвалини тасдиқлаш, фуқароларнинг турар жойларга бўлган мулк ҳуқуқи ҳамда ер участкаларига ижара ҳуқуқларини эътироф этиш бўйича қарорларга ўзгартиришлар киритиш, шунингдек, Ёшлар маслаҳат гуруҳига оид қарорларни такомиллаштириш ва доимий комиссиялар регламентини тасдиқлаш масалалари ҳам ўрин олди.

Сессия давомида кун тартибидаги барча масалалар ҳар томонлама муҳокама қилиниб, улар юзасидан тегишли қарорлар қабул қилинди. Шу билан Халқ депутатлари Амударё тумани Кенгашининг 19-сессияси ўз ишини якунлади.

Чарос Арслонова, туман ҳокимлигининг Ахборот хизмати раҳбари.