“Yoshlar kuni”da zamonaviy sport maydonchasi foydalanishga topshirildi

Bugungi kunda mamlakatimizda yoshlar masalasi davlat siyosatining ustuvor yoʻnalishlaridan biriga aylangan. Oʻzbekiston Respublikasi Prezidentining 24-fevral kungi uchrashuvida ilgari surilgan tashabbuslarga muvofiq, har payshanba “Yoshlar kuni” sifatida keng nishonlanib, joylarda yoshlar bilan muloqot qilish, ularning muammolarini oʻrganish va boʻsh vaqtini mazmunli tashkil etishga qaratilgan tadbirlar izchil amalga oshirilmoqda.

Ana shunday ezgu tashabbuslarning mantiqiy davomi sifatida 26-mart kuni Amudaryo tumani Daryo boʻyi mahallasida, 65-sonli umumtaʼlim maktabi hududida zamonaviy, usti yopiq sunʼiy qoplamali universal sport maydonchasi tantanali ravishda foydalanishga topshirildi.

Ochilish marosimi yuqori bayramona ruhda oʻtdi. Unda tuman hokimi Sobir Xoʻjametov, tuman prokurori Bahrom Masharipov, turli tashkilot va boʻlim rahbarlari, mahalla faollari, yoshlar hamda keng jamoatchilik vakillari ishtirok etdi. Tadbir davomida soʻzga chiqqan tuman hokimi mazkur sport inshooti yoshlarning jismoniy tarbiya va sportga boʻlgan qiziqishini oshirish, ularning isteʼdod va salohiyatini yuzaga chiqarishda muhim omil boʻlib xizmat qilishini alohida taʼkidladi hamda mahalla ahlini ushbu quvonchli voqea bilan samimiy tabrikladi.

Shundan soʻng ramziy tasma qirqilib, yangi sport maydonchasi rasman foydalanishga topshirildi. Tadbir doirasida mahallaning futbol va voleybol yoʻnalishlarida yuqori natijalarga erishib kelayotgan iqtidorli yosh sportchilari ragʻbatlantirilib, ularga esdalik sovgʻalari topshirildi.

Bayramona muhit mahalla ahli tomonidan yanada koʻtarinki ruhda tashkil etildi. Keng dasturxon yozilib, katta qozonlarda osh damlanib, mehmonlarga tortiq qilindi. Bu esa mahalladagi ahillik, birdamlik va hamjihatlikning yorqin ifodasi boʻldi.

Mazkur sport maydonchasi “Tashabbusli byudjet”ning 2025-yil 4-mavsumida gʻolib boʻlgan loyiha asosida barpo etildi. Uning gʻoliblikka erishishida mahalla ahlining yakdil saʼy-harakatlari, yosh-u qari barcha qatlam vakillarining faol ishtiroki muhim ahamiyat kasb etdi. Ochilish marosimida yigʻilganlarning yuz-koʻzida aks etgan quvonch va faxr tuygʻulari bu hamjihatlikning amaliy natijasini yaqqol namoyon etdi.

Qurilish ishlari “Tuproqqalʼa maxsus qurilish” MChJ tomonidan 1 milliard 329 million soʻm mablagʻ evaziga sifatli amalga oshirildi. Universal sport majmuasi futbol, voleybol va basketbol sport turlari bilan shugʻullanish uchun barcha zarur shart-sharoitlar bilan taʼminlangan boʻlib, u yoshlarning boʻsh vaqtini mazmunli oʻtkazish, sogʻlom turmush tarzini targʻib qilish hamda professional sportga yoʻnaltirishda muhim maskan vazifasini oʻtaydi.

Tadbirning mantiqiy davomi sifatida mahalla fuqarolar yigʻini binosida yoshlar bilan ochiq muloqot tashkil etildi. Unda rahbarlar yoshlarning muammo va takliflarini tinglab, ularni qoʻllab-quvvatlash, bandligini taʼminlash va hayotiy rejalarini amalga oshirishga koʻmaklashish masalalarini muhokama qildilar.

Xususan, yoshlar oʻz mutaxassisligi boʻyicha ish bilan taʼminlanish, tadbirkorlik faoliyatini boshlash uchun yer maydoni ajratish, chorvachilikni rivojlantirish uchun imtiyozli kreditlar olish kabi masalalarda murojaat qildilar. Bildirilgan taklif va muammolar tegishli mutasaddilar tomonidan nazoratga olinib, ularni hal etish boʻyicha aniq chora-tadbirlar belgilandi.

Shubhasiz, bunday bunyodkorlik ishlari va ochiq muloqotlar yoshlarning ertangi kunga boʻlgan ishonchini mustahkamlab, ularning jamiyat hayotidagi faolligini oshirishga xizmat qiladi. Amudaryo tumanida foydalanishga topshirilgan ushbu zamonaviy sport maydonchasi esa nafaqat sport inshooti, balki yoshlarning orzulari roʻyobga chiqadigan, ularning isteʼdodi va salohiyati charxlanadigan muhim maskan sifatida xizmat qiladi.

Charos Arslonova, tuman hokimligining Axborot xizmati rahbari.