“Ёшлар куни”да замонавий спорт майдончаси фойдаланишга топширилди

Бугунги кунда мамлакатимизда ёшлар масаласи давлат сиёсатининг устувор йўналишларидан бирига айланган. Ўзбекистон Республикаси Президентининг 24 февраль кунги учрашувида илгари сурилган ташаббусларга мувофиқ, ҳар пайшанба “Ёшлар куни” сифатида кенг нишонланиб, жойларда ёшлар билан мулоқот қилиш, уларнинг муаммоларини ўрганиш ва бўш вақтини мазмунли ташкил этишга қаратилган тадбирлар изчил амалга оширилмоқда.

Ана шундай эзгу ташаббусларнинг мантиқий давоми сифатида 26 март куни Амударё тумани Дарё бўйи маҳалласида, 65-сонли умумтаълим мактаби ҳудудида замонавий, усти ёпиқ сунъий қопламали универсал спорт майдончаси тантанали равишда фойдаланишга топширилди.

Очилиш маросими юқори байрамона руҳда ўтди. Унда туман ҳокими Собир Хўжаметов, туман прокурори Баҳром Машарипов, турли ташкилот ва бўлим раҳбарлари, маҳалла фаоллари, ёшлар ҳамда кенг жамоатчилик вакиллари иштирок этди. Тадбир давомида сўзга чиққан туман ҳокими мазкур спорт иншооти ёшларнинг жисмоний тарбия ва спортга бўлган қизиқишини ошириш, уларнинг истеъдод ва салоҳиятини юзага чиқаришда муҳим омил бўлиб хизмат қилишини алоҳида таъкидлади ҳамда маҳалла аҳлини ушбу қувончли воқеа билан самимий табриклади.

Шундан сўнг рамзий тасма қирқилиб, янги спорт майдончаси расман фойдаланишга топширилди. Тадбир доирасида маҳалланинг футбол ва волейбол йўналишларида юқори натижаларга эришиб келаётган иқтидорли ёш спортчилари рағбатлантирилиб, уларга эсдалик совғалари топширилди.

Байрамона муҳит маҳалла аҳли томонидан янада кўтаринки руҳда ташкил этилди. Кенг дастурхон ёзилиб, катта қозонларда ош дамланиб, меҳмонларга тортиқ қилинди. Бу эса маҳалладаги аҳиллик, бирдамлик ва ҳамжиҳатликнинг ёрқин ифодаси бўлди.

Мазкур спорт майдончаси “Ташаббусли бюджет”нинг 2025-йил 4-мавсумида ғолиб бўлган лойиҳа асосида барпо этилди. Унинг ғолибликка эришишида маҳалла аҳлининг якдил саъй-ҳаракатлари, ёш-у қари барча қатлам вакилларининг фаол иштироки муҳим аҳамият касб этди. Очилиш маросимида йиғилганларнинг юз-кўзида акс этган қувонч ва фахр туйғулари бу ҳамжиҳатликнинг амалий натижасини яққол намоён этди.

Қурилиш ишлари “Тупроққалъа махсус қурилиш” МЧЖ томонидан 1 миллиард 329 миллион сўм маблағ эвазига сифатли амалга оширилди. Универсал спорт мажмуаси футбол, волейбол ва баскетбол спорт турлари билан шуғулланиш учун барча зарур шарт-шароитлар билан таъминланган бўлиб, у ёшларнинг бўш вақтини мазмунли ўтказиш, соғлом турмуш тарзини тарғиб қилиш ҳамда профессионал спортга йўналтиришда муҳим маскан вазифасини ўтайди.

Тадбирнинг мантиқий давоми сифатида маҳалла фуқаролар йиғини биносида ёшлар билан очиқ мулоқот ташкил этилди. Унда раҳбарлар ёшларнинг муаммо ва таклифларини тинглаб, уларни қўллаб-қувватлаш, бандлигини таъминлаш ва ҳаётий режаларини амалга оширишга кўмаклашиш масалаларини муҳокама қилдилар.

Хусусан, ёшлар ўз мутахассислиги бўйича иш билан таъминланиш, тадбиркорлик фаолиятини бошлаш учун ер майдони ажратиш, чорвачиликни ривожлантириш учун имтиёзли кредитлар олиш каби масалаларда мурожаат қилдилар. Билдирилган таклиф ва муаммолар тегишли мутасаддилар томонидан назоратга олиниб, уларни ҳал этиш бўйича аниқ чора-тадбирлар белгиланди.

Шубҳасиз, бундай бунёдкорлик ишлари ва очиқ мулоқотлар ёшларнинг эртанги кунга бўлган ишончини мустаҳкамлаб, уларнинг жамият ҳаётидаги фаоллигини оширишга хизмат қилади. Амударё туманида фойдаланишга топширилган ушбу замонавий спорт майдончаси эса нафақат спорт иншооти, балки ёшларнинг орзулари рўёбга чиқадиган, уларнинг истеъдоди ва салоҳияти чархланадиган муҳим маскан сифатида хизмат қилади.

Чарос Арслонова, туман ҳокимлигининг Ахборот хизмати раҳбари.