Qrim-Kongo gemorragik isitmasi kasalligiga qarshi taktik oʻquv mashqi oʻtkazildi

Bahor mavsumi kirib kelishi bilan chorva mollaridan odamlarga yuqishi mumkin boʻlgan ayrim yuqumli kasalliklar xavfi ham ortib boradi. Ayniqsa, Qrim-Kongo gemorragik isitma kasalligi tabiiy oʻchoqli va xavfli infektsiya sifatida soha mutaxassislari, tibbiyot xodimlari hamda aholi eʼtiborida boʻlishi zarur.

Shularni inobatga olgan holda Amudaryo tumanida Qrim-Kongo gemorragik isitma kasalligiga qarshi kurashish boʻyicha maxsus taktik oʻquv mashqi oʻtkazildi. Unda tuman Sanitariya-epidemiologik osoyishtalik va jamoat salomatligi markazi, Tibbiyot birlashmasi, Favqulodda vaziyatlar boʻlimi, Veterinariya va chorvachilikni rivojlantirish boʻlimi, Obodonlashtirish boshqarmasi, Ichki ishlar boʻlimi xodimlari, shuningdek, fuqarolar yigʻinlari raislari ishtirok etdi.

Mazkur tadbirdan koʻzlangan asosiy maqsad — kasallik aniqlangan vaziyatda mutasaddi tashkilotlar oʻrtasidagi hamkorlikni yanada kuchaytirish, tezkor harakat qilish mexanizmlarini sinovdan oʻtkazish va aholi xavfsizligini taʼminlashdan iborat boʻldi.

Maxsus taktik oʻquv mashqini Amudaryo tumani Favqulodda vaziyatlar boʻlimi boshligʻi Zafar Ahmedov ochib berdi. U oʻz nutqida Qrim-Kongo gemorragik isitma kasalligi qayd etilgan taqdirda hamkor tashkilotlar bilan birgalikda amalga oshiriladigan chora-tadbirlar haqida atroflicha tushuntirish berdi. Taʼkidlanganidek, bunday holatlarda har bir xizmatning vazifasi aniq belgilab olinishi, tezkor axborot almashinuvi va muvofiqlashtirilgan harakat muhim ahamiyat kasb etadi.

Oʻquv mashqining nazariy qismi Amudaryo tumani Tibbiyot birlashmasi xodimlari ishtirokida oʻtkazildi. Unda tuman Sanitariya-epidemiologik osoyishtalik va jamoat salomatligi boʻlimi epidemiolog vrachi Durbek Babajanov soʻzga chiqib, Qrim-Kongo gemorragik isitma kasalligining epidemiologiyasi, etiologiyasi, profilaktikasi hamda epidemiyaga qarshi kurashish chora-tadbirlari haqida maʼlumot berdi. Shundan soʻng Amudaryo tumani Veterinariya va chorvachilikni rivojlantirish boʻlimi xodimi Bahodir Bekchanov hayvonlarda ushbu kasallikning epizootik xususiyatlari va profilaktika choralari toʻgʻrisida soʻz yuritdi.

Tadbir davomida kasallikning asosiy belgilari, uning oldini olish va davolash choralari haqida ham batafsil maʼlumotlar berildi. Mutaxassislar taʼkidlaganidek, yuqori harorat, umumiy holsizlik, bosh va mushak ogʻriqlari, koʻngil aynishi, ayrim hollarda qon ketish alomatlari kasallikka shubha uygʻotishi mumkin. Bunday vaziyatda oʻzboshimchalik bilan davolanishga urinish emas, balki zudlik bilan tibbiyot muassasasiga murojaat qilish hayotni saqlab qolishda muhim omildir.

Nazariy qismdan keyin Bogʻ mahallasi hududida amaliy mashgʻulotlar tashkil etildi. Unda Qrim-Kongo gemorragik isitma kasalligi qayd qilinganida epidemiyaga qarshi kurashish boʻyicha amaliy harakatlar namoyish etildi. Jumladan, shartli ravishda kasallik alomatlari aniqlangan holat sahnalashtirilib, bunday paytda favqulodda vaziyatlar tizimi, tibbiyot, veterinariya va boshqa xizmatlarning harakatlanish tartibi amalda koʻrib chiqildi. Bu esa real sharoitda yoʻl qoʻyilishi mumkin boʻlgan kamchiliklarni oldindan aniqlash va ularni bartaraf etishga xizmat qilishi bilan ahamiyatlidir.

Amaliy mashgʻulotlarda shartli bemorni kana chaqqan holatda unga koʻrsatiladigan birinchi tibbiy yordam tibbiyot xodimlari tomonidan koʻrgazmali tarzda namoyish qilindi. Veterinariya va chorvachilikni rivojlantirish boʻlimi xodimlari esa kasallik oʻchogʻi sifatida belgilangan xonadon, hovli va chorva mollari saqlanadigan joylarda dezinfektsiya ishlarini amalga oshirdi. Shu orqali kasallik tarqalishining oldini olishda sanitariya qoidalari va dezinfektsiya tadbirlarining naqadar muhim ekani yana bir bor koʻrsatib berildi.

Mutaxassislar aholiga kasallikdan saqlanish boʻyicha qator tavsiyalar berdilar. Xususan, chorva mollari va ular saqlanadigan joylarni muntazam nazorat qilish, kanaga qarshi ishlov berish, himoya kiyimlaridan foydalanish, tanaga kana yopishib olgan holatda uni ehtiyotsizlik bilan uzib tashlamaslik, balki darhol shifokorga murojaat qilish zarurligi uqtirildi. Shuningdek, kasallik aniqlanganida birinchi navbatda tibbiyot muassasasiga xabar berish, bemorni alohidalashtirish va mutaxassislar koʻrsatmasiga qatʼiy amal qilish lozimligi taʼkidlandi.

Maxsus taktik oʻquv mashqi soʻngida unda qatnashgan barcha sohalar masʼullari va xodimlari yoʻl qoʻyilgan kamchiliklarni muhokama qildilar. Qayd etilganidek, bu kabi tadbirlar real vaziyatlarda favqulodda yordam xizmatlarining aniq, tezkor va tartibli harakat qilishini taʼminlashda muhim ahamiyatga ega. Eng muhimi, bunday oʻquv mashqlari aholi salomatligini muhofaza qilish, xavfli yuqumli kasalliklar tarqalishining oldini olish va soha idoralari oʻrtasidagi hamkorlikni mustahkamlashga xizmat qiladi.