Nukusda maishiy korruptsiyaga qarshi kurashishda jamoatchilik nazorati masalalari muhokama qilindi

Nukus shahrida maishiy korruptsiya holatlarini jamoatchilik ishtirokida oʻrganish va tahlil qilishga bagʻishlangan davra suhbati boʻlib oʻtdi. Tadbir Oʻzbekiston nodavlat notijorat tashkilotlari Milliy Assotsiatsiyasining Qoraqalpogʻiston Respublikasi hududiy boʻlinmasi tomonidan “Nodavlat notijorat tashkilotlari uyi”da tashkil etildi. Unda fuqarolik jamiyati institutlari faollari, nodavlat notijorat tashkilotlari vakillari va mazkur yoʻnalishga qiziqish bildirgan faol fuqarolar ishtirok etdi.

Mazkur uchrashuv Oʻzbekiston Respublikasi Oliy Majlisi huzuridagi Jamoat fondi tomonidan moliyalashtirilgan “Jamoatchilik ishtirokida maishiy korruptsiya holatlarini oʻrganish va tahlil qilish” loyihasi doirasida tashkil etildi. Tadbirning asosiy maqsadi jamiyatda uchrayotgan maishiy korruptsiya holatlarini keng jamoatchilik ishtirokida atroflicha oʻrganish, ularni tahlil qilish, mavjud muammo va kamchiliklarni ochiq muhokama etish, shuningdek, ushbu salbiy illatning oldini olishga qaratilgan amaliy taklif va tavsiyalar ishlab chiqishdan iborat boʻldi.

Davra suhbatida Qoraqalpogʻiston Respublikasi Vazirlar Kengashi korruptsiyaga qarshi kurashish komplayens-nazorat boʻlimi boshligʻi Batir Matmuratov, Oʻzbekiston nodavlat notijorat tashkilotlari Milliy Assotsiatsiyasining Qoraqalpogʻiston Respublikasi hududiy boʻlimi boshligʻi Quatbay Karimxodjayev hamda boshqa ishtirokchilar soʻzga chiqib, maishiy korruptsiyaning jamiyat hayotiga salbiy taʼsiri, uning aholi oʻrtasida namoyon boʻlayotgan turli koʻrinishlari, kelib chiqish omillari va oqibatlari haqida fikr bildirdilar.

Davra suhbatida davlat va jamoat institutlari faoliyatida shaffoflikni taʼminlashda fuqarolarning oʻrni, jamoatchilik nazoratini kuchaytirishning ahamiyati, korruptsiyaviy holatlarni barvaqt aniqlash hamda oldini olish mexanizmlari xususida atroflicha soʻz yuritildi.

Tadbir doirasida loyiha asosida oʻtkazilgan ijtimoiy soʻrovnoma natijalari ham taqdim etildi. Unga koʻra, soʻrovnomada 2324 nafar respondent ishtirok etgan. Soʻrovnoma natijalari aholining maishiy korruptsiyaga nisbatan qarashlari turlicha ekanini koʻrsatdi. Respondentlarning katta qismi maishiy korruptsiyani davlat xizmatlarida pora yoki manfaat evaziga xizmat koʻrsatish, tanish-bilish orqali masalani hal qilish, shuningdek, pul, sovgʻa yoki xizmat evaziga yengillik yaratish kabi holatlar bilan bogʻlagan. Bu esa ushbu muammo jamiyatda turli shakllarda qabul qilinayotganini anglatadi.

Tahlillarga koʻra, maishiy korruptsiya eng koʻp tibbiyot, taʼlim, davlat xizmatlari, huquqni muhofaza qiluvchi organlar va kommunal xizmatlar sohalarida uchrashi qayd etilgan. Shuningdek, ayrim respondentlar oxirgi bir-ikki yil ichida ushbu holatlarga shaxsan duch kelganini yoki uning guvohi boʻlganini bildirgan. Fuqarolarning korruptsiyaga murosali munosabatda boʻlishiga sabab sifatida esa masalani tez hal qilish istagi, vaqtni tejash, boshqa iloj yoʻqligi haqidagi qarashlar hamda huquqiy bilim yetishmasligi kabi omillar koʻrsatilgan.

Muhokamalar davomida maishiy korruptsiyaga qarshi kurashishda aholining huquqiy ongi va huquqiy madaniyatini yuksaltirish, murojaat qilish madaniyatini shakllantirish, fuqarolarning oʻz huquqlarini himoya qilish koʻnikmalarini mustahkamlash muhim vazifalardan ekani alohida taʼkidlandi. Ishtirokchilar, shuningdek, davlat xizmatlarini raqamlashtirish, javobgarlik choralarini kuchaytirish va jamoatchilik nazoratini yanada faollashtirish kabi choralar ushbu yoʻnalishda eng samarali vositalardan biri ekanini qayd etdilar.

Tadbir yakunida bildirilgan fikr va takliflar umumlashtirilib, kelgusida bu yoʻnalishda amalga oshiriladigan ishlar samaradorligini oshirishga qaratilgan tavsiyalar shakllantirildi. Taʼkidlanganidek, maishiy korruptsiyaga qarshi kurashish faqat davlat organlarining emas, balki butun jamiyatning birgalikdagi saʼy-harakatini talab etadi. Bu borada jamoatchilik nazoratini kuchaytirish, fuqarolik jamiyati institutlarining oʻrnini mustahkamlash va aholining faol fuqarolik pozitsiyasini ragʻbatlantirish muhim ahamiyat kasb etadi.