59-sonli maktabning yangi binosi: yoshlar uchun zamonaviy imkoniyatlar va inklyuziv taʼlim muhiti

Soʻnggi yillarda mamlakatimizda taʼlim tizimini tubdan isloh qilish, oʻsib kelayotgan yosh avlodga sifatli taʼlim-tarbiya berish hamda ularning har tomonlama barkamol shaxs boʻlib voyaga yetishi uchun zarur shart-sharoitlarni yaratish davlat siyosatining eng ustuvor yoʻnalishlaridan biriga aylandi. Ushbu ezgu ishlarning amaliy ifodasi sifatida Amudaryo tumani Maktabgacha va maktab taʼlimi boʻlimiga qarashli Choykoʻl ovuli hududida joylashgan 59-sonli umumiy oʻrta taʼlim maktabining yangi binosi foydalanishga topshirildi.

Ochilish marosimida tuman hokimining birinchi oʻrinbosari Faxriddin Yusupov, tuman Maktabgacha va maktab taʼlimi boʻlimi boshligʻi Yalgʻash Shomurodov, taʼlim sohasi faollari, maktab jamoasi va mahalla ahli vakillari ishtirok etdi.

Davlatimiz tomonidan taʼlim sohasi infratuzilmasini yaxshilash maqsadida ajratilgan mablagʻlar doirasida pudratchi tashkilot — “Amudaryo xizmat koʻrsatish markazi” MChJ tomonidan keng koʻlamli qurilish-taʼmirlash ishlari olib borildi. Mazkur yirik loyihani amalga oshirish uchun davlat tomonidan jami 4 mlrd. 687 mln. soʻm mablagʻ yoʻnaltirildi. Natijada 180 oʻquvchi oʻrniga moʻljallangan qoʻshimcha oʻquv binosi hamda oʻquvchilarning jismoniy chiniqishi, sogʻlom turmush tarzini shakllantirishi uchun xizmat qiladigan 12×24 metr oʻlchamdagi zamonaviy sport zali binosi sifatli qurilib, foydalanishga topshirildi.

Bino 2 qavatdan iborat boʻlib, maxsus lift bilan taʼminlangan. Bu mamlakatimizda inklyuziv taʼlimni rivojlantirish, alohida taʼlim ehtiyojlari boʻlgan va jismoniy imkoniyati cheklangan bolalarning boshqa tengdoshlari qatorida hech qanday toʻsiqlarsiz, teng huquqli asosda taʼlim olishlarini taʼminlashga qaratilgan yuksak eʼtiborning yaqqol namunasidir.

Taʼlim jarayoni samaradorligini belgilovchi muhim omillardan yana biri — bu oʻquv binosidagi mikroiqlim va qulaylikdir. Shu boisdan, binoning isitish tizimiga ilgʻor, innovatsion texnologiyalar jalb qilingan. Xususan, yangi binoni isitish tizimi zamonaviy chiller–fankoil uskunalari asosida tashkil etilgan. Ushbu markazlashgan va yuqori texnologik tizim xonalarda nafaqat qish mavsumida issiqlikni, balki yil davomida meʼyoriy haroratni barqaror saqlash imkonini beradi. Shuningdek, isitish radiatorlari termostatik harorat sozlagichlari bilan jihozlangan, har bir xonada haroratni alohida tartibga solish imkoniyati mavjud.

Taʼlim muassasasida bugungi kunda 155 nafar oʻquvchi taʼlim-tarbiya olib kelmoqda. Ularga oʻz kasbining fidoyisi boʻlgan, zamonaviy pedagogik texnologiyalarni oʻzlashtirgan 28 nafar malakali pedagog ilm-fan sirlarini oʻrgatmoqda. Yangi oʻquv binosining foydalanishga topshirilishi pedagoglarga har bir oʻquvchi bilan individual ishlashish, ularning iqtidorini erta aniqlash va roʻyobga chiqarish uchun keng imkoniyatlar yaratadi.

Choykoʻl ovuli hududida bunyod etilgan 59-sonli maktabning mazkur qoʻshimcha oʻquv binosi va sport majmuasi nafaqat maktab oʻquvchilari va pedagoglar jamoasi, balki mahalla aholisi uchun ham muhim ijtimoiy obʼektlardan biriga aylandi.

Yoshlarimizning bunday zamonaviy, shinam, xavfsiz va barcha qulayliklarga, shu jumladan inklyuziv taʼlim vositalariga ega maskanlarda taʼlim-tarbiya olishi, kelajakda yurtimiz ravnaqiga oʻzining munosib hissasini qoʻshadigan, yuksak maʼnaviyatli, chuqur bilimli va jismonan barkamol kadrlar boʻlib yetishib chiqishining mustahkam kafolati boʻlib xizmat qiladi.