“Milliy qadriyatlar atlasi” kitobining taqdimoti boʻlib oʻtdi

Shimoli-gʻarbiy harbiy okrug qoʻmondonligi, Qoraqalpogʻiston Respublikasi Joʻqorgʻi Kengesi hamda Respublika Yozuvchilar uyushmasi tashabbusi bilan “Milliy qadriyatlar atlasi” kitobining tantanali taqdimoti boʻlib oʻtdi. Mazkur maʼnaviy-maʼrifiy tadbir milliy oʻzlikni anglash, boy tarixiy merosni asrab-avaylash va yosh avlodni vatanparvarlik ruhida tarbiyalash yoʻlida muhim qadam boʻldi.

Taqdimot marosimida harbiy okrug qoʻmondonligi vakillari, taniqli yozuvchilar, olimlar, harbiy xizmatchilar, talaba-yoshlar hamda keng jamoatchilik vakillari ishtirok etdi. Tadbirning koʻlami va nufuzi kitobning ahamiyati nechogʻli yuqori ekanini yana bir bor namoyon qildi. Ayniqsa, harbiy xizmatchilar ishtirokida oʻtgani tadbirga alohida mazmun baxsh etib, Vatan himoyasi va milliy qadriyatlar tushunchalarining oʻzaro uygʻunligini yorqin ifodaladi.

“Milliy qadriyatlar atlasi” yurtimizdagi barcha viloyatlar, elat va millatlarning boy urf-odatlari, qadimiy anʼanalari, marosimlari va maʼnaviy merosini oʻzida mujassam etgan noyob toʻplamdir. Asarda har bir hududning oʻziga xos madaniyati, xalq ogʻzaki ijodi namunalari, milliy liboslari, anʼanaviy taomlari, bayramlari va urf-odatlari keng va atroflicha yoritilgan. Shu jihatdan mazkur kitob nafaqat madaniy-maʼrifiy manba, balki milliy merosimizning oʻziga xos xaritasi sifatida ham ahamiyat kasb etadi.

Kitob sahifalarida Oʻzbekiston yagona va ahil umummilliy uy sifatida ulugʻlanadi. Turli millat va elatlar oʻrtasidagi totuvlik, hamjihatlik va oʻzaro hurmat tuygʻulari asarning bosh gʻoyasiga aylangan. “Oʻzbekiston — umumiy uyimiz” degan ezgu tamoyil kitob mazmunida chuqur ifodasini topib, mamlakatimizdagi millatlararo totuvlik muhitini mustahkamlashga xizmat qiladi.

Tadbir davomida soʻzga chiqqanlar ushbu kitob yoshlarni milliy qadriyatlarga hurmat ruhida tarbiyalashda muhim qoʻllanma boʻlib xizmat qilishini alohida taʼkidladilar. Unda yosh avlod qalbida Vatanga sadoqat, ajdodlarga ehtirom va milliy gʻurur tuygʻularini shakllantirishga xizmat qiladigan boy maʼnaviy manbalar jamlangani qayd etildi.

Shuningdek, tadbir doirasida Qoraqalpogʻiston Respublikasi filarmoniyasi hamda Berdaq nomidagi teatr jamoasi va taniqli sanʼatkorlar tomonidan ijro etilgan milliy kuy-qoʻshiqlar yigʻilganlarga oʻzgacha bayramona kayfiyat baxsh etdi. Mazkur chiqishlar milliylik ruhini yanada kuchaytirib, tadbirga maʼnaviy shukuh bagʻishladi.

Taqdimot yakunida ishtirokchilar kitob bilan yaqindan tanishib, oʻz fikr-mulohazalarini bildirdilar. Mutaxassislar “Milliy qadriyatlar atlasi” asari nafaqat ilmiy-maʼrifiy, balki tarbiyaviy jihatdan ham katta ahamiyatga ega ekanini taʼkidladilar.

Bugun globallashuv jarayonlari jadal kechayotgan bir paytda milliy oʻzlikni asrash, azaliy qadriyat va anʼanalarni saqlab qolish hamda ularni kelajak avlodga yetkazish dolzarb ahamiyat kasb etmoqda. Axborot oqimlari tezlashgan, madaniyatlar oʻzaro aralashib borayotgan hozirgi sharoitda har bir millat oʻzining maʼnaviy ildizlariga tayanib yashamasa, uning oʻziga xos qiyofasi yoʻqolib ketishi mumkin. Shu bois milliy madaniyat, urf-odat va maʼnaviy merosni zamon talablariga mos tarzda keng targʻib qilish muhim vazifalardan biri hisoblanadi.

Mazkur tadbir ham milliy qadriyatlarimizni keng targʻib qilish, jamiyatda sogʻlom maʼnaviy muhitni mustahkamlash va yoshlarni milliy hamda umuminsoniy qadriyatlarga sadoqat ruhida tarbiyalash yoʻlidagi muhim voqea sifatida tarix sahifasidan joy oldi.