“Миллий қадриятлар атласи” китобининг тақдимоти бўлиб ўтди

Шимоли-ғарбий ҳарбий округ қўмондонлиги, Қорақалпоғистон Республикаси Жўқорғи Кенгеси ҳамда Республика Ёзувчилар уюшмаси ташаббуси билан “Миллий қадриятлар атласи” китобининг тантанали тақдимоти бўлиб ўтди. Мазкур маънавий-маърифий тадбир миллий ўзликни англаш, бой тарихий меросни асраб-авайлаш ва ёш авлодни ватанпарварлик руҳида тарбиялаш йўлида муҳим қадам бўлди.

Тақдимот маросимида ҳарбий округ қўмондонлиги вакиллари, таниқли ёзувчилар, олимлар, ҳарбий хизматчилар, талаба-ёшлар ҳамда кенг жамоатчилик вакиллари иштирок этди. Тадбирнинг кўлами ва нуфузи китобнинг аҳамияти нечоғли юқори эканини яна бир бор намоён қилди. Айниқса, ҳарбий хизматчилар иштирокида ўтгани тадбирга алоҳида мазмун бахш этиб, Ватан ҳимояси ва миллий қадриятлар тушунчаларининг ўзаро уйғунлигини ёрқин ифодалади.

“Миллий қадриятлар атласи” юртимиздаги барча вилоятлар, элат ва миллатларнинг бой урф-одатлари, қадимий анъаналари, маросимлари ва маънавий меросини ўзида мужассам этган ноёб тўпламдир. Асарда ҳар бир ҳудуднинг ўзига хос маданияти, халқ оғзаки ижоди намуналари, миллий либослари, анъанавий таомлари, байрамлари ва урф-одатлари кенг ва атрофлича ёритилган. Шу жиҳатдан мазкур китоб нафақат маданий-маърифий манба, балки миллий меросимизнинг ўзига хос харитаси сифатида ҳам аҳамият касб этади.

Китоб саҳифаларида Ўзбекистон ягона ва аҳил умуммиллий уй сифатида улуғланади. Турли миллат ва элатлар ўртасидаги тотувлик, ҳамжиҳатлик ва ўзаро ҳурмат туйғулари асарнинг бош ғоясига айланган. “Ўзбекистон — умумий уйимиз” деган эзгу тамойил китоб мазмунида чуқур ифодасини топиб, мамлакатимиздаги миллатлараро тотувлик муҳитини мустаҳкамлашга хизмат қилади.

Тадбир давомида сўзга чиққанлар ушбу китоб ёшларни миллий қадриятларга ҳурмат руҳида тарбиялашда муҳим қўлланма бўлиб хизмат қилишини алоҳида таъкидладилар. Унда ёш авлод қалбида Ватанга садоқат, аждодларга эҳтиром ва миллий ғурур туйғуларини шакллантиришга хизмат қиладиган бой маънавий манбалар жамлангани қайд этилди.

Шунингдек, тадбир доирасида Қорақалпоғистон Республикаси филармонияси ҳамда Бердақ номидаги театр жамоаси ва таниқли санъаткорлар томонидан ижро этилган миллий куй-қўшиқлар йиғилганларга ўзгача байрамона кайфият бахш этди. Мазкур чиқишлар миллийлик руҳини янада кучайтириб, тадбирга маънавий шукуҳ бағишлади.

Тақдимот якунида иштирокчилар китоб билан яқиндан танишиб, ўз фикр-мулоҳазаларини билдирдилар. Мутахассислар “Миллий қадриятлар атласи” асари нафақат илмий-маърифий, балки тарбиявий жиҳатдан ҳам катта аҳамиятга эга эканини таъкидладилар.

Бугун глобаллашув жараёнлари жадал кечаётган бир пайтда миллий ўзликни асраш, азалий қадрият ва анъаналарни сақлаб қолиш ҳамда уларни келажак авлодга етказиш долзарб аҳамият касб этмоқда. Ахборот оқимлари тезлашган, маданиятлар ўзаро аралашиб бораётган ҳозирги шароитда ҳар бир миллат ўзининг маънавий илдизларига таяниб яшамаса, унинг ўзига хос қиёфаси йўқолиб кетиши мумкин. Шу боис миллий маданият, урф-одат ва маънавий меросни замон талабларига мос тарзда кенг тарғиб қилиш муҳим вазифалардан бири ҳисобланади.

Мазкур тадбир ҳам миллий қадриятларимизни кенг тарғиб қилиш, жамиятда соғлом маънавий муҳитни мустаҳкамлаш ва ёшларни миллий ҳамда умуминсоний қадриятларга садоқат руҳида тарбиялаш йўлидаги муҳим воқеа сифатида тарих саҳифасидан жой олди.