Sayyor qabullarda muammolarga joyida yechim topilmoqda

Aholining kundalik muammolarini bevosita joyiga chiqib oʻrganish, murojaatlarga tezkor va samarali yechim topish maqsadida Amudaryo tumani hokimi Sobir Xoʻjametov tomonidan Jayxun hamda Boy ovul mahalla fuqarolar yigʻinlarida navbatdagi sayyor qabullar oʻtkazildi.

Mazkur sayyor qabullarda tuman boʻlim va tashkilotlari rahbarlari, mutasaddi masʼullar hamda mahalla aholisi vakillari ishtirok etdilar. Uchrashuvlar ochiq muloqot, aholi muammolarini va takliflarini tinglash ruhida tashkil etildi.

Jayxun mahalla fuqarolar yigʻinida boʻlib oʻtgan sayyor qabul davomida aholi tomonidan bir qator ijtimoiy va infratuzilmaviy muammolar yuzasidan murojaatlar bildirildi. Xususan, ichki yoʻllarni taʼmirlash, yoʻl harakati xavfsizligini taʼminlash maqsadida yoʻl belgilarini oʻrnatish masalalari koʻtarildi.

Shuningdek, fuqarolar farzandlarining oliy taʼlim muassasalarida oʻqishi uchun shartnoma toʻlovlarini amalga oshirishda amaliy yordam soʻrab murojaat qildilar. Mahallada sport maydonchasi qurilishiga koʻmaklashish, yoshlarning boʻsh vaqtini mazmunli tashkil etish masalalari ham muhim takliflar qatorida tilga olindi.

Aholi tomonidan elektr energiyasi taʼminoti sifatini yaxshilash, chorvachilik mahsulotlarini sotish uchun doʻkon qurishga yer maydoni ajratish, shuningdek, chorvachilik faoliyatini rivojlantirish maqsadida imtiyozli kredit mablagʻlari ajratilishida amaliy yordam berish boʻyicha murojaatlar bildirildi.

Tuman hokimi Sobir Xoʻjametov har bir murojaatni diqqat bilan tinglab, masʼullarga aniq vazifalar yukladi. Ayrim masalalar joyida hal etildi, qolgan murojaatlar boʻyicha tegishli boʻlimlarga ijro uchun topshiriqlar berildi.

Boy ovul mahalla fuqarolar yigʻinida boʻlib oʻtgan sayyor qabulda tuman Ichki ishlar boʻlimi boshligʻi Timur Doshumbayev ham ishtirok etdi. Dastlab masʼullar hududda jinoyatchilik va huquqbuzarliklarning oldini olish, Boy ovul mahallasini jinoyatchilikdan holi hududga aylantirish masalalari yuzasidan soʻz yuritdilar.

Jinoyatchilikka qarshi kurashish, huquqbuzarliklarning oldini olish bugungi kundagi eng ustuvor vazifalardan biri ekani taʼkidlanib, bu borada aholi va masʼul idoralar hamkorligining ahamiyati qayd etildi.

Sayyor qabul jarayonida fuqarolar tomonidan jarrohlik amaliyoti va davolanish uchun moddiy yordam ajratish, oʻzi va turmush oʻrtogʻini ishga joylashtirishga koʻmaklashish, parrandachilikni rivojlantirish uchun kredit mablagʻlari ajratish kabi masalalar yuzasidan murojaatlar bildirildi.

Bundan tashqari, farzandlarining oliy taʼlim shartnoma pullarini toʻlashda amaliy yordam koʻrsatish, uy-joylarni taʼmirlash, farzandini harbiy xizmatga joʻnatish bilan bogʻliq kompensatsiya mablagʻlarini olishda koʻmak berish masalalari ham aholi tomonidan koʻtarildi.

Tuman hokimi Sobir Xoʻjametov tomonidan har bir murojaat yuzasidan masʼul rahbarlarga aniq topshiriqlar berilib, ularning ijrosi qatʼiy nazoratga olinishi belgilandi. Aholi bilan yuzma-yuz muloqot qilish, muammolarni joyida koʻrib chiqish va amaliy yechimlar topish sayyor qabullarning asosiy maqsadi ekanligi yana bir bor oʻz tasdigʻini topdi.

Mazkur sayyor qabullar aholi ishonchini mustahkamlash, davlat idoralari faoliyatining ochiqligi va samaradorligini oshirish, eng asosiysi, fuqarolarning murojaatlarini eʼtiborsiz qoldirmaslik yoʻlidagi muhim qadam boʻlib xizmat qildi.

Charos Arslonova, tuman hokimligining Axborot xizmati rahbari.