AMUDARYoLIK YoShLAR HARBIYLAR HAYoTI BILAN YaQINDAN TANIShDILAR

Mamlakatimizda har yili katta hurmat va faxr bilan nishonlanadigan 14-yanvar – Vatan himoyachilari kuni bayrami arafasida yurtimiz boʻylab yosh avlodni harbiy-vatanparvarlik ruhida tarbiyalashga qaratilgan keng koʻlamli maʼnaviy-maʼrifiy tadbirlar oʻtkaziladi. Ayniqsa, Oʻzbekiston Respublikasi Qurolli Kuchlari tashkil etilganining 34 yilligi munosabati bilan joylarda uyushtirilayotgan uchrashuvlar, maʼruzalar va “Ochiq eshiklar kuni” tadbirlari yoshlarda Milliy Armiyamizga boʻlgan ishonch va hurmatni yanada oshirishga xizmat qilmoqda.

Bugungi kunda mamlakatimiz mudofaa salohiyatini mustahkamlash, harbiy xizmatni zamonaviy talablar asosida tashkil etish, yoshlarni Vatanga sadoqat ruhida tarbiyalash davlat siyosati darajasiga koʻtarilgan. Shu maʼnoda, Oʻzbekiston Respublikasi Prezidentining 2025-yil 1-dekabrdagi Farmoyishi hamda Qoraqalpogʻiston Respublikasi Mudofaa ishlari boshqarmasi boshligʻining 2025-yil 12-dekabrdagi buyrugʻi ijrosini taʼminlash maqsadida Amudaryo tumanida ham qator amaliy ishlar olib borilmoqda.

Xususan, “Vatanparvarlik oyligi” doirasida “Milliy Armiya – Ona yurt qalqoni, tinchligimiz posboni” shiori ostida 12-yanvar kuni Amudaryo tumani hududida joylashgan Davlat xavfsizlik xizmati Chegara qoʻshinlariga qarashli harbiy qismda tashkil etilgan “Ochiq eshiklar kuni” tadbiri yoshlar hayotida unutilmas voqealardan biriga aylandi.

Ushbu tadbirda tumandagi 1-, 31-, 36-, 38-, 55-, 56-, va 87-sonli umumtaʼlim maktablarining 9–11-sinf oʻquvchilari, chaqiriqqacha yoshlarni tayyorlash fani rahbarlari hamda maktablarda faoliyat yuritayotgan “Vatan tayanchi” otryadlarining faol aʼzolari ishtirok etdilar. Bu esa tadbirning qamrovi va ahamiyatini yanada oshirdi.

Uchrashuv avvalida Amudaryo tumani Mudofaa ishlari boʻlimi boshligʻi, podpolkovnik Shuhrat Mamatov hamda Davlat xavfsizlik xizmati Chegara qoʻshinlarining masʼul xodimlari soʻzga chiqib, ishtirokchilarni Vatan himoyachilari kuni bayrami hamda Qurolli Kuchlar tashkil etilganining 34 yilligi bilan samimiy tabrikladilar. Ular oʻz chiqishlarida soʻnggi yillarda Milliy Armiyamizda amalga oshirilayotgan keng koʻlamli islohotlar, harbiy xizmat sharoitlarini yaxshilash, zamonaviy texnika va qurol-aslahalar bilan taʼminlash borasida qilingan ishlar haqida atroflicha toʻxtalib oʻtdilar.

Shuningdek, mamlakatimiz chegaralarining daxlsizligini taʼminlash, tinchlik va osoyishtalikni saqlashda chegara qoʻshinlarining oʻrni beqiyos ekani, harbiy xizmatning nafaqat sharafli burch, balki yuksak masʼuliyat ekani taʼkidlandi. Yoshlarga Vatan himoyachisi boʻlish uchun jismoniy tayyorgarlik bilan birga, yuksak maʼnaviy-axloqiy fazilatlar, qatʼiyat, sadoqat va intizom ham muhim ekani uqtirildi.

Tadbir doirasida oʻquvchilar uchun harbiy qism boʻylab maxsus sayohat tashkil etildi. Tashrif davomida yoshlar harbiy xizmatchilarning kundalik hayoti, yaratilgan shart-sharoitlar, yotoqxona va oʻquv xonalari, sport maydonchalari bilan yaqindan tanishdilar. Harbiy texnika va qurol-aslahalar koʻrgazmasi esa ishtirokchilarda katta qiziqish uygʻotdi. Zamonaviy jihozlar, maxsus texnika vositalari yoshlarda harbiy sohaga nisbatan yanada kuchli qiziqish paydo boʻlishiga turtki berdi.

Ayniqsa, “Vatan tayanchi” otryadi aʼzolari harbiy xizmatchilarga oʻzlarini qiziqtirgan savollar bilan murojaat qilib, chegarachi kasbining oʻziga xos jihatlari, xizmat shartlari, qabul talablari hamda harbiy taʼlim muassasalari haqida batafsil maʼlumot oldilar. Ofitser va serjantlar yoshlarning barcha savollariga atroflicha javob berib, ularni kelajakda Vatanga sidqidildan xizmat qilishga chorladilar.

Bunday “Ochiq eshiklar kuni” tadbirlari yosh avlod qalbida Vatanga muhabbat, Milliy Armiyamizga hurmat va iftixor tuygʻularini mustahkamlashda muhim ahamiyat kasb etadi. Ushbu uchrashuvlar orqali yoshlar harbiy xizmatning mazmun-mohiyatini yanada chuqur anglab, kelajakda ona yurt ravnaqi va tinchligi yoʻlida fidoiy boʻlishga ilhom oladilar.