TUMAN PROKURORI “DOʻSTLIK” MAHALLASIDA AHOLI MUAMMOLARINI TINGLADI

Inson manfaatlarini taʼminlash, xalq bilan ochiq muloqot qilish va ularning muammolariga tezkor yechim topish — bugungi kunning asosiy talabidir. Rahbarlarning xizmat xonalaridan chiqib, bevosita mahallalarga kirib borishi aholining roziligini olish va qonun ustuvorligini taʼminlashda muhim omil boʻlmoqda. Amudaryo tumani Prokurori tomonidan oʻtkazilgan navbatdagi sayyor qabul ham ana shunday amaliy tadbirlardan biri sifatida xalq va davlat organi oʻrtasidagi ishonch koʻprigi vazifasini bajardi.

Tumanning “Doʻstlik” mahallasida tashkil etilgan ushbu uchrashuvda tuman prokurori Bahrom Masharipov fuqarolar bilan yuzma-yuz muloqot qildi. Qabulda mahalla faollari, nuroniylar, xotin-qizlar va yoshlar ishtirok etib, oʻzlarini qiynayotgan muammo va takliflarini toʻgʻridan-toʻgʻri rahbarga yetkazish imkoniga ega boʻldilar.

Ochiq va samimiy ruhda oʻtgan qabul davomida fuqarolardan turli mavzu va yoʻnalishlarda murojaatlar kelib tushdi. Murojaatlarning salmoqli qismini mahalla infratuzilmasini yaxshilash masalalari tashkil etdi. Xususan, ichki yoʻllarni taʼmirlash, elektr energiyasi taʼminotidagi barqarorlik va ichimlik suvi tarmoqlarini yaxshilash boʻyicha haqli talablar ilgari surildi.

Shuningdek, aholining ijtimoiy himoyaga muhtoj qatlami tomonidan mehnat va bandlik masalalari, xususan, ishga joylashish, ijtimoiy yordam olish hamda turmush sharoitini yaxshilash, yaʼni uy-joy taʼmiri yoki moddiy koʻmak masalalari yuzasidan qilingan murojaatlar ham diqqat bilan tinglandi.

Sayyor qabul davomida bildirilgan har bir masalaga tuman prokurori tomonidan alohida yondashilib, ularning yechimi boʻyicha qatʼiy choralar koʻrildi.

Ayrim murojaatlar joyida ijobiy hal etildi. Qoʻshimcha oʻrganish va mablagʻ talab qiluvchi masalalar yuzasidan mutasaddi tashkilot va idora rahbarlariga aniq muddatli topshiriqlar berildi. Barcha topshiriqlarning ijrosi prokuratura organlari tomonidan qatʼiy nazoratga olindi.

Tadbir faqat muammolarni tinglash bilan cheklanib qolmadi. Unda huquqiy targʻibot ishlariga ham alohida eʼtibor qaratildi. Prokuror tomonidan fuqarolarga amaldagi qonunchilik hujjatlarining mazmun-mohiyati, yangi qabul qilingan farmon va qarorlar boʻyicha tushuntirishlar berildi. Fuqarolarni qiziqtirgan savollar yuzasidan joyida huquqiy maslahatlar koʻrsatildi.

Prokuratura organlari hududlarni ijtimoiy-iqtisodiy rivojlantirish jarayonida qonun ustuvorligini taʼminlovchi muhim institut sifatida faol ishtirok etadi. Ushbu organlar davlat dasturlari, investitsiya loyihalari hamda mahalliy byudjet mablagʻlarining qonuniy va samarali sarflanishini doimiy nazorat qilib boradi. Natijada moliyaviy intizom mustahkamlanib, korruptsiya holatlarining oldi olinadi.

Prokuratura tomonidan tadbirkorlik subʼektlarining huquq va qonuniy manfaatlarini himoya qilishga ham alohida eʼtibor qaratiladi. Asossiz tekshiruvlarni cheklash, maʼmuriy toʻsiqlarni bartaraf etish orqali ishbilarmonlik muhiti yaxshilanadi, yangi ish oʻrinlari yaratilishiga sharoit tugʻiladi. Bu esa aholi bandligi va daromadlarining oshishiga xizmat qiladi.

“Doʻstlik” mahallasida oʻtgan sayyor qabul davomida prokuratura organlarining ushbu qonuniy vakolatlarini amalga oshirish doirasida qilinayotgan ishlar haqida ham keng turda maʼlumotlar berildi. Mazkur sayyor qabul aholi va huquqni muhofaza qiluvchi organlar oʻrtasidagi ishonchni mustahkamlashga, eng muhimi, odamlarning ogʻirini yengil qilishga xizmat qilgani bilan ahamiyatli boʻldi.