“Ekologik madaniyat — sogʻlom kelajak asosi” loyihasi doirasida “Baday toʻqay” qoʻriqxonasiga maroqli sayohat uyushtirildi

Tabiatni muhofaza qilish, ekologik vaziyatni barqaror saqlash, bu boradagi inqirozlarning oldini olish bugungi kunda dunyo miqyosidagi ulkan ijtimoiy-iqtisodiy hamda huquqiy muammoga aylangan. Mamlakatimizda ham ekologiya bilan bogʻliq muammolarni tizimli ravishda hal etish, ayniqsa, bu borada yoshlarning ekologik savodxonligi va madaniyatini oshirish, tabiat, atrof-muhitga muhabbat bilan qarashga oʻrgatish maqsadida targʻibot-tashviqot tadbirlari oʻtkazilib, bu kabi tadbirlarga barcha yosh toifasidagi fuqarolar, ayniqsa, umumtaʼlim maktablarining oʻquvchi-yoshlari keng qamrab olinmoqda.

Amudaryo tumanida faoliyat olib boruvchi “Jayxun ilhomlari” nodavlat notijorat tashkilotining Oliy Majlis huzuridagi jamoat fondi tomonidan moliyalashtirilgan “Ekologik madaniyat — sogʻlom kelajak asosi” nomli grant loyihasi doirasida amalga oshirilayotgan targʻibot-tashviqot tadbirlarida ham tuman Maktabgacha va maktab taʼlimi boʻlimi tasarrufidagi umumtaʼlim maktablari hamda “Barkamol avlod” bolalar maktabida tashkil etilgan “Yosh ekolog” toʻgaragi aʼzolari faol ishtirok etishmoqda. Mazkur toʻgarak aʼzolari loyiha koordinatorlari bilan birgalikda hududlarni obodonlashtirish, “Yashil makon” umummilliy harakati doirasida “Oila bogʻi”ni yaratish kabi tadbirlarda faollik koʻrsatishmoqda.

Joriy yilning 20-dekabr sanasida “Ekologik madaniyat — sogʻlom kelajak asosi” loyihasi doirasida Amudaryo tumani Maktabgacha va maktab taʼlimi boʻlimi tasarrufidagi “Barkamol avlod” bolalar maktabining “Yosh ekolog” toʻgaragi aʼzolari ishtirokida Beruniy tumanidagi “Baday toʻqay” qoʻriqxonasiga uyushtirilgan sayohat ham oʻsib kelayotgan yosh avlod ongida tabiatga muhabbat tuygʻusini mustahkamlashga qaratilgani bilan muhim ahamiyatga ega boʻldi.

Sayohat avvalida oʻquvchi-yoshlar Amudaryo biosfera rezervati tarkibidagi “Baday toʻqay” qoʻriqxonasi faoliyati, mazkur qoʻriqxonaning fauna va florasi, tabiiy boyligi haqida hikoya qiluvchi “Baday toʻqay qoʻriqxonasi” muzeyi bilan yaqindan tanishdilar. Muzey masʼullari tomonidan toʻqayzor hududida oʻsuvchi dov-daraxtlar, hayvonot dunyosi toʻgʻrisida qiziqarli maʼlumotlar taqdim etildi. Shuningdek, yosh ekologlarga qoʻriqxona hududiga yilning toʻrt faslida uchib keluvchi qushlar va ularning turlari, Buxoro xonguli va saygʻoqlarni koʻpaytirish borasida amalga oshirilayotgan keng koʻlamli ishlar boʻyicha batafsil maʼlumotlar taqdim etilib, ularni qiziqtirgan savollarga batafsil javoblar ham berildi.

Shundan soʻng yosh ekologlar “Barkamol avlod” bolalar maktabining turizm va ekologiya yoʻnalishi boʻyicha uslubchisi Xolida Yoʻldoshboyeva, “Yosh ekolog” toʻgaragi rahbari Matluba Allaberganova hamda loyiha koordinatorlari hamrohligida “Baday toʻqay” qoʻriqxonasi boʻylab, tabiat bagʻriga maroqli sayohat oʻtkazildi. Sayohat jarayonida oʻquvchi-yoshlar qoʻriqxonaning noyob oʻsimliklar dunyosi, musaffo, goʻzal va betakror tabiatidan bahra oldilar.

Yoshlar ongida ona tabiatga nisbatan mehr-muhabbat tuygʻularini mustahkamlash, ularni tabiatni nafaqat sevishga, balki atrofimizni oʻrab turgan tabiiy yashil olamni asrab-avaylash, bu betakror goʻzallikni yanada boyitish borasida oʻz shaxsiy hissalarini qoʻshishga daʼvat etish maqsadida tashkillashtirilgan mazkur sayohat ishtirokchilarda katta taassurot qoldirdi.

Robiya Yoʻldosheva