XALQARO NOGIRONLARNI HIMOYa QILISh KUNIGA BAGʻIShLAB SPORT MUSOBAQALARI OʻTKAZILDI
Har yili butun dunyoda 3-dekabr — Xalqaro nogironlarni himoya qilish kuni sifatida keng nishonlanadi. Nogironligi bor insonlar qalbida hayotsevarlik tuygʻularini uygʻotish, ularning har qanday sogʻlom insonlardan kam emasligini amalda namoyon etish orqali qalblariga joʻshqin kayfiyat bagʻishlash insoniy qadriyatlardan biri sanaladi va sana munosabati bilan dunyo xalqlarini odamiylik, oʻzaro mehr-oqibat hamda saxovatpeshalikka daʼvat etishga qaratilgan tadbirlar oʻtkaziladi.
Oʻzbekiston Respublikasi Nogironlar jamiyatining Amudaryo tuman boʻlimi tomonidan ham hamkor tashkilotlar bilan birgalikda ushbu sana munosabati bilan turli bayramona tadbirlar, nogironligi boʻlgan shaxslar ishtirokidagi parasport musobaqalari oʻtkaziladi, homiylarni jalb qilgan holda xayr-ehson tadbirlari amalga oshiriladi.
Oʻzbekiston Nogironlar jamiyatining Amudaryo tuman boʻlinmasi tomonidan tashkillashtirilgan navbatdagi shaxmat va shashka sporti boʻyicha musobaqalar Xalqaro nogironlarni himoya qilish kuniga bagʻishlandi. Mazkur musobaqani oʻtkazishdan maqsad nogironligi boʻlgan shaxslarning imkoniyati cheklangan, lekin intilishlari, qalblaridagi orzulari cheksiz, aql-u zakovatda har qanday sogʻlom insonlardan koʻra faolroq ekanligini amalda namoyon etishlari uchun imkoniyat yaratish, shu orqali jamiyatdagi tenglik va insonparvarlik, mehr-oqibat tuygʻularini yanada ulugʻlashdan iboratdir.
Tadbirda Amudaryo tumani Koʻzi ojizlar jamiyati aʼzolaridan 10 nafar, Nogironlar jamiyatining Amudaryo tuman boʻlinmasi aʼzolaridan 20 nafar fuqarolar ishtirok etdilar. Musobaqalarning oʻzaro tenglik va shaffoflik asosida oʻtishini taʼminlash maqsadida, avvalo, ishtirokchilar uchun qulay shart-sharoitlar yaratildi.
Shashka-shaxmat paraolimpiada oʻyinlari boʻyicha murabbiy Rahmatjon Rahimovning saʼy-harakatlari bilan har bir ishtirokchining mahoratiga haqqoniy baho berib borildi.
Musobaqa yakunlariga koʻra shashka sporti boʻyicha 1-oʻrin Darmonjon Ibodullayevaga, 2-oʻrin Saida Oʻrazbayevaga va 3-oʻrin Gulnoza Gulmonovalarga nasib qildi.
Erkaklar oʻrtasidagi shaxmat musobaqalarida esa 1-oʻrinni Toʻraboy Abdullayev, 2-oʻrinni Shokir Nurullayev hamda 3-oʻrinni Zafarjon Qilichev qoʻlga kiritdi. Ayol-qizlar oʻrtasida gʻoliblik Manzura Abdullayevaga nasib qilgan boʻlsa, 2-oʻringa Sanobar Jumamurodova, 3-oʻringa Oyxon Bekatovalar loyiq koʻrildi.
Musobaqa yakunida gʻoliblar tashkilotchilar tomonidan munosib taqdirlandi.
Robiya Yoʻldosheva
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
