EL-YuRT TAShVIShIGA YeLKA TUTIB...

Mamlakatimizda Ijtimoiy himoya milliy agentligining mahallalarda kompleks ijtimoiy xizmat koʻrsatuvchi xodimlari faoliyati yoʻlga qoʻyilgani kam taʼminlangan, yordamga muhtoj, nogironligi bor insonlarni qoʻllab-quvvatlab, ularning munosib turmush kechirishlarida muhim omil boʻlib xizmat qilmoqda. Mahallalarda istiqomat qiladigan bu toifadagi insonlarning muammolari keys-menejment asosida, "mahalla yettiligi" va ijtimoiy xodim hamkorligida, uyma-uy kirib borish orqali oʻrganilib, ularga zarur yordamlar koʻrsatilayotgani ehtiyojmand va nogironligi bor yurtdoshlarimizning turmushini oʻnglab olishlarini taʼminlamoqda.

Aslida inson qadrini ulugʻlashga alohida eʼtibor bilan yondashilib, yangi jamiyat barpo etish borasida keng islohotlar amalga oshirilayotgan mamlakatimizda eng xayrli vazifalardan birini bugungi kunda mahallada kompleks ijtimoiy xizmat koʻrsatuvchi xodimlar bajarishmoqda. Chunki ularning saʼy-harakatlari bilan koʻplab insonlar turmushi izga tushib, hayotdan oʻz oʻrinlarini topishmoqda.

BEShTOM MAHALLASIDAGI IShLAR

Amudaryo tumanidagi Beshtom mahalla fuqarolar yigʻinida salkam 3500 nafar aholi istiqomat qiladi. "Inson" ijtimoiy xizmatlar markazining mahallada faoliyat olib boruvchi kompleks ijtimoiy xizmat koʻrsatuvchi xodimi Umida Yusupovaning kundalik ish rejalari daftarida 673 xonadon tarkibidagi 872 ta oilaning moddiy-ijtimoiy ahvoli toʻgʻrisidagi maʼlumotlar jamlangan.

"Mahalla yettiligi" bilan hamkorlikda uyma-uy kirib borib oʻrganishlar natijasida:

94 ta oila kam taʼminlangan, farzandlariga nafaqa oluvchi, turmush sharoitlari ogʻir, daromadlari past oilalar sifatida alohida tizimga olindi.

67 nafar nogironligi bor fuqaro bilan birma-bir uchrashib, ularning muammolari, shu bilan birga orzu-istaklari oʻrganildi.

Ilm olish istagida boʻlgan nogironligi bor bolaning uyda taʼlim olishi uchun sharoit yaratildi.

Jamiyatga faol aralashish orzusidagi yana bir fuqaroga nogironlar aravachasi olib berildi.

Qaddini tik tutib turishga qiynalayotgan fuqarolardan birining koʻkrak protezi bilan taʼminlanishiga koʻmaklashildi.

Bir necha yildan beri oʻz salomatligini mustahkamlash niyatida sanatoriylardan birida davolanishni orzu qilgan fuqarolarning orzulari ushalishiga yaqindan yordam koʻrsatib, yoʻllanmalar olib berildi.

"INSON QADRI UChUN" TAMOYILI AMALDA

"Inson qadri uchun" tamoyili asosida ish yuritishni oʻzining ham kasbiy, ham insoniylik burchi deb bilgan Umidaxon Yusupovaning faoliyatida moddiy yetishmovchilik tufayli qiyin vaziyatga tushib qolgan oilalarga qoʻl-qanot boʻlish, ularni ijtimoiy himoya xizmatlari bilan qamrab olish, himoya orderiga ega xotin-qizlarni har tomonlama qoʻllab-quvvatlash choralarini koʻrish, muammolarini tizimli hal etish borasidagi masalalar muhim oʻrin tutadi.

U ayni kunlarda kam taʼminlangan oilalarning kuz-qish mavsumida qiynalib qolmasliklari uchun:

Energiya manbalaridan belgilangan limitdan ortiq foydalangan isteʼmolchilar roʻyxatini shakllantirish va kommunal toʻlovlarga kompensatsiya olishlariga koʻmaklashish.

Moddiy ahvoli ogʻir boʻlgan oilalar farzandlarini qishgi issiq kiyim-kechak bilan taʼminlash choralarini koʻrish bilan mashgʻul.

Ana shu burch va masʼuliyat hissi bilan u har kuni beshtomliklarning xonadonlariga kirib boraveradi. Zero, el-yurt tashvishiga yelka tutib, ogʻirini yengil, mushkulini oson qilib yashash, inson qadr-qimmatini joyiga qoʻyish — milliy-maʼnaviy qadriyatlarimizning asosidir.

ROBIYa YOʻLDOShEVA.