ЭЛ-ЮРТ ТАШВИШИГА ЕЛКА ТУТИБ...
Мамлакатимизда Ижтимоий ҳимоя миллий агентлигининг маҳаллаларда комплекс ижтимоий хизмат кўрсатувчи ходимлари фаолияти йўлга қўйилгани кам таъминланган, ёрдамга муҳтож, ногиронлиги бор инсонларни қўллаб-қувватлаб, уларнинг муносиб турмуш кечиришларида муҳим омил бўлиб хизмат қилмоқда. Маҳаллаларда истиқомат қиладиган бу тоифадаги инсонларнинг муаммолари кейс-менежмент асосида, "маҳалла еттилиги" ва ижтимоий ходим ҳамкорлигида, уйма-уй кириб бориш орқали ўрганилиб, уларга зарур ёрдамлар кўрсатилаётгани эҳтиёжманд ва ногиронлиги бор юртдошларимизнинг турмушини ўнглаб олишларини таъминламоқда.
Аслида инсон қадрини улуғлашга алоҳида эътибор билан ёндашилиб, янги жамият барпо этиш борасида кенг ислоҳотлар амалга оширилаётган мамлакатимизда энг хайрли вазифалардан бирини бугунги кунда маҳаллада комплекс ижтимоий хизмат кўрсатувчи ходимлар бажаришмоқда. Чунки уларнинг саъй-ҳаракатлари билан кўплаб инсонлар турмуши изга тушиб, ҳаётдан ўз ўринларини топишмоқда.
БЕШТОМ МАҲАЛЛАСИДАГИ ИШЛАР
Амударё туманидаги Бештом маҳалла фуқаролар йиғинида салкам 3500 нафар аҳоли истиқомат қилади. "Инсон" ижтимоий хизматлар марказининг маҳаллада фаолият олиб борувчи комплекс ижтимоий хизмат кўрсатувчи ходими Умида Юсупованинг кундалик иш режалари дафтарида 673 хонадон таркибидаги 872 та оиланинг моддий-ижтимоий аҳволи тўғрисидаги маълумотлар жамланган.
"Маҳалла еттилиги" билан ҳамкорликда уйма-уй кириб бориб ўрганишлар натижасида:
94 та оила кам таъминланган, фарзандларига нафақа олувчи, турмуш шароитлари оғир, даромадлари паст оилалар сифатида алоҳида тизимга олинди.
67 нафар ногиронлиги бор фуқаро билан бирма-бир учрашиб, уларнинг муаммолари, шу билан бирга орзу-истаклари ўрганилди.
Илм олиш истагида бўлган ногиронлиги бор боланинг уйда таълим олиши учун шароит яратилди.
Жамиятга фаол аралашиш орзусидаги яна бир фуқарога ногиронлар аравачаси олиб берилди.
Қаддини тик тутиб туришга қийналаётган фуқаролардан бирининг кўкрак протези билан таъминланишига кўмаклашилди.
Бир неча йилдан бери ўз саломатлигини мустаҳкамлаш ниятида санаторийлардан бирида даволанишни орзу қилган фуқароларнинг орзулари ушалишига яқиндан ёрдам кўрсатиб, йўлланмалар олиб берилди.
"ИНСОН ҚАДРИ УЧУН" ТАМОЙИЛИ АМАЛДА
"Инсон қадри учун" тамойили асосида иш юритишни ўзининг ҳам касбий, ҳам инсонийлик бурчи деб билган Умидахон Юсупованинг фаолиятида моддий етишмовчилик туфайли қийин вазиятга тушиб қолган оилаларга қўл-қанот бўлиш, уларни ижтимоий ҳимоя хизматлари билан қамраб олиш, ҳимоя ордерига эга хотин-қизларни ҳар томонлама қўллаб-қувватлаш чораларини кўриш, муаммоларини тизимли ҳал этиш борасидаги масалалар муҳим ўрин тутади.
У айни кунларда кам таъминланган оилаларнинг куз-қиш мавсумида қийналиб қолмасликлари учун:
Энергия манбаларидан белгиланган лимитдан ортиқ фойдаланган истеъмолчилар рўйхатини шакллантириш ва коммунал тўловларга компенсация олишларига кўмаклашиш.
Моддий аҳволи оғир бўлган оилалар фарзандларини қишги иссиқ кийим-кечак билан таъминлаш чораларини кўриш билан машғул.
Ана шу бурч ва масъулият ҳисси билан у ҳар куни бештомликларнинг хонадонларига кириб бораверади. Зеро, эл-юрт ташвишига елка тутиб, оғирини енгил, мушкулини осон қилиб яшаш, инсон қадр-қимматини жойига қўйиш — миллий-маънавий қадриятларимизнинг асосидир.
РОБИЯ ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
