Kuzgi bugʻdoy ekilgan maydonlarda Agroinspektsiya xodimlari tomonidan nazorat ishlari olib borilmoqda

Soʻnggi yillarda mamlakatimizda, shu jumladan Amudaryo tumanida ham gʻallachilikni rivojlantirishga qaratilayotgan eʼtibor tufayli aholining oziq-ovqat mahsulotlari, ayniqsa, gʻalla va un mahsulotlariga boʻlgan ehtiyoji toʻliq qondirilishiga erishilmoqda. Gʻalla nafaqat aholi ehtiyoji uchun, balki chorvachilik va parrandachilik sohalarining rivojida ham muhim oʻrin tutadi. Shu bois, gʻallakor dehqonlar kuzgi bugʻdoy ekish, gʻalla ekilgan maydonlardan toʻliq nihol olish hamda parvarishlash ishlariga alohida eʼtibor qaratishadi.

Amudaryo tumani gʻallachilik fermer xoʻjaliklarida joriy yilgi ekish mavsumi uyushqoqlik bilan olib borildi. 2026-yilgi bugʻdoy hosili mavsumida moʻl va sifatli gʻalla xirmonini bunyod etishni maqsad qilgan gʻallachilik fermer xoʻjaliklari dehqonlari ayni paytda dalalarda bir tekis unib chiqqan bugʻdoyzorlarda kuzgi agrotexnik tadbirlarni oʻz vaqtida, sifatli amalga oshirishmoqda.

Olib borilayotgan keng koʻlamli agrotexnik jarayonlar Oʻzbekiston Respublikasi Vazirlar Mahkamasi huzuridagi Agrosanoat majmui ustidan nazorat qilish inspektsiyasining Qoraqalpogʻiston Respublikasi boshqarmasi Amudaryo tuman boʻlimi mutaxassislari tomonidan qatʼiy nazorat ostiga olingan. Gʻalla ekishdan tortib, oʻgʻitlash, sugʻorish kabi barcha bosqichlar puxta rejalashtirilgan tizim asosida olib borilmoqda.

Tumanda 2026-yil hosili uchun jami 258 ta fermer xoʻjaligi bilan shartnoma tuzilgan boʻlib, ular tomonidan umumiy hisobda 4 800 gektar maydonga gʻalla ekilgan. Kuzgi bugʻdoy ekish ishlari belgilangan agrotexnik talablar asosida amalga oshirilib, barcha maydonlarda fosforli, kaliyli va boshqa mineral oʻgʻitlar bilan oʻz vaqtida va meʼyorda oziqlantirish ishlari bajarilganligi gʻallaning barvaqt unib chiqishi, kasallik va zararkunandalarga bardoshli boʻlishi, shuningdek, kelajakdagi hosildorlikni oshirishda muhim ahamiyat kasb etadi.

Tumanda urugʻlik gʻalla yetishtirish yoʻnalishiga ham alohida eʼtibor qaratilmoqda. Tanlov asosida saralangan 12 ta ilgʻor fermer xoʻjaligi tomonidan jami 430 gektar yer maydonida urugʻlik gʻalla ekilgan. Ushbu xoʻjaliklar zamonaviy texnikalar bilan taʼminlangan boʻlib, bu urugʻlik sifatining yuqori darajada boʻlishini taʼminlashga yordam beradi.

Gʻalla unib chiqish jarayoni boshlanganidan buyon tuman miqyosidagi barcha ekin maydonlarida doimiy ravishda dala holatlari oʻrganilib, unib chiqishning sifati, agrotexnik talablarga amal qilinishi, oʻgʻitlash, begona oʻtlardan tozalash kabi muhim masalalar yuzasidan joylarga chiqqan holda nazorat ishlari olib borilmoqda.

Tumanning Qilichboy hududidagi “Pirnazarov Toʻraboy” fermer xoʻjaligida har yili reja boʻyicha 10 gektar maydonga kuzgi bugʻdoy ekiladi. Oʻz imkoniyatlaridan kelib chiqib, joriy yilgi ekish mavsumida xoʻjalik dehqonlari yana qoʻshimcha 2 gektar maydonga gʻalla ekdilar. Ayni paytda xoʻjalik dalalarida bir tekis unib chiqqan bugʻdoy maysalari baravj rivojlanmoqda.

Shuningdek, “Usta Olloyor” fermer xoʻjaligi ishchilari ham 36 gektar paxtadan moʻl hosil yetishtirishdan tashqari, 17 gektar maydondagi bugʻdoyzorlar parvarishiga ham alohida eʼtibor berishmoqda.

Bu kabi tizimli ishlar natijasida 2026-yilgi mavsumda moʻl va sifatli gʻalla hosili olinishi kutilmoqda. Bu nafaqat aholi uchun asosiy oziq-ovqat mahsuloti — un va non taʼminotini barqarorlashtiradi, shu bilan birga mamlakatimizning ichki ehtiyojini qoplash va eksport imkoniyatlarini kengaytirishda ham muhim ahamiyat kasb etadi.

Ayni kunlarda Agrosanoat majmui ustidan nazorat qilish inspektsiyasi Qoraqalpogʻiston Respublikasi boshqarmasining Amudaryo tuman boʻlimi xodimlari tomonidan gʻallachilik fermer xoʻjaliklarida kuzgi bugʻdoy ekilgan maydonlarda amalga oshirilayotgan nazorat ishlari davom etmoqda.

Gʻiyosjon Bozorboyev, Agroinspektsiya tuman boʻlimining qishloq xoʻjaligi ekinlari urugʻlari yetishtirilishi ustidan nazorat qilish boʻyicha bosh mutaxassisi.