Amudaryo tumanida boks boʻyicha Qoraqalpogʻiston chempionati musobaqalari oʻtkazildi

2025-yil 12-16-oktyabr kunlari Amudaryo tumanidagi Ixtisoslashtirilgan maktabda boks boʻyicha kattalar va yoshlar oʻrtasida Qoraqalpogʻiston Respublikasi chempionati oʻtkazildi. Mazkur nufuzli musobaqaga respublikaning barcha tumanlaridan 200 nafarga yaqin mahoratli charm qoʻlqop ustalari tashrif buyurdi. Chempionatning asosiy maqsadi – iqtidorli yoshlarni aniqlash va ularni mamlakat terma jamoasiga saralashdan iborat.

Chempionatning ochilish marosimida Qoraqalpogʻiston Respublikasi sport vaziri Yerkinbay Qutibayev va boshqa masʼullar soʻzga chiqib, Oʻzbekistonda sportni rivojlantirishga soʻnggi yillarda katta eʼtibor berilayotganini, jismoniy tarbiyani ommalashtirish va yoshlar oʻrtasida sogʻlom turmush tarzini targʻib qilish davlat siyosati darajasidagi muhim yoʻnalishlardan biriga aylanganini taʼkidlab oʻtdilar.

Prezident farmon va qarorlari asosida har bir hududda zamonaviy sport majmualari, stadionlar, suzish havzalari, tennis kortlari va fitnes zallar qurilmoqda. Bunday sharoitlar yosh avlodning sogʻlom, kuchli va vatanparvar boʻlib voyaga yetishiga xizmat qilmoqda. Shuningdek, maktab va oliy taʼlim muassasalarida jismoniy tarbiya faniga alohida eʼtibor berilib, sport toʻgaraklari soni ortib bormoqda.

Natijada Oʻzbekiston sportchilari xalqaro musobaqalarda ham muvaffaqiyatli ishtirok etib, mamlakat bayrogʻini baland koʻtarishmoqda. Olimpiya va jahon chempionlarining zafarli chiqishlari yoshlarga namuna boʻlib, ularni ham sport bilan shugʻullanishga ilhomlantirmoqda. Amudaryo tumanida oʻtkazilgan chempionat ham yoshlarni sportga jalb qilish va sogʻlom turmush tarzini keng targʻib qilishda muhim vosita boʻldi.

Boks boʻyicha Qoraqalpogʻiston Respublikasi chempionatida 2008–2009-yillarda tugʻilgan yoshlar va 18 yoshdan oshgan kattalar oʻzaro bellashdilar. Har bir toifada sportchilar 10 tadan vazn toifasida oʻzaro kuch sinashdilar. Qizgʻin va murosasiz kechgan bellashuvlar sportchilarning yuksak texnik mahorati, jangovar ruhi va gʻalabaga boʻlgan qatʼiy intilishi bilan yodda qoldi.

Chempionat yakunida jamoalarning umumiy natijalari eʼlon qilindi, bu esa Qoraqalpogʻistonda boks maktablarining qaysi hududlarda kuchli rivojlanayotganini koʻrsatdi.

2008–2009-yillarda tugʻilgan yoshlar oʻrtasida 1-oʻrin Nukus olimpiya va paralimpiya sport turlariga tayyorlash markazi jamoasiga, 2-oʻrin Nukus shahri va 3-oʻrin Xoʻjayli tumani jamoalariga nasib qildi.

Kattalar oʻrtasidagi musobaqalarda ham Nukus olimpiya va paralimpiya sport turlariga tayyorlash markazi jamoasi gʻoliblikni qoʻlga kiritdi. 2-oʻrin musobaqa mezboni – Amudaryo tumani jamoasiga, 3-oʻrin esa Nukus shahri jamoasiga nasib qildi.

Chempionatning har bir vazn toifasida gʻolib boʻlgan sportchilar esdalik sovgʻalari bilan taqdirlandilar va ularning sportchilik karerasi uchun eng muhim yutuq – Oʻzbekiston chempionatiga yoʻllanmani qoʻlga kiritdilar. Shuningdek, ular rasman Qoraqalpogʻiston terma jamoasi aʼzoligiga qabul qilindi.

Bu kabi musobaqalar yosh bokschilar uchun katta tajriba maktabi boʻlib, ularning keyinchalik xalqaro arenalarda Oʻzbekiston sharafini himoya qilishi uchun mustahkam zamin yaratadi. Bu shubhasiz, sohadagi islohotlarning va sport infratuzilmasini yaxshilashga qaratilgan saʼy-harakatlarning samarasidir.