Амударё туманида бокс бўйича Қорақалпоғистон чемпионати мусобақалари ўтказилди

2025 йил 12-16 октябрь кунлари Амударё туманидаги Ихтисослаштирилган мактабда бокс бўйича катталар ва ёшлар ўртасида Қорақалпоғистон Республикаси чемпионати ўтказилди. Мазкур нуфузли мусобақага республиканинг барча туманларидан 200 нафарга яқин маҳоратли чарм қўлқоп усталари ташриф буюрди. Чемпионатнинг асосий мақсади – иқтидорли ёшларни аниқлаш ва уларни мамлакат терма жамоасига саралашдан иборат.

Чемпионатнинг очилиш маросимида Қорақалпоғистон Республикаси спорт вазири Еркинбай Қутибаев ва бошқа масъуллар сўзга чиқиб, Ўзбекистонда спортни ривожлантиришга сўнгги йилларда катта эътибор берилаётганини, жисмоний тарбияни оммалаштириш ва ёшлар ўртасида соғлом турмуш тарзини тарғиб қилиш давлат сиёсати даражасидаги муҳим йўналишлардан бирига айланганини таъкидлаб ўтдилар.

Президент фармон ва қарорлари асосида ҳар бир ҳудудда замонавий спорт мажмуалари, стадионлар, сузиш ҳавзалари, теннис кортлари ва фитнес заллар қурилмоқда. Бундай шароитлар ёш авлоднинг соғлом, кучли ва ватанпарвар бўлиб вояга етишига хизмат қилмоқда. Шунингдек, мактаб ва олий таълим муассасаларида жисмоний тарбия фанига алоҳида эътибор берилиб, спорт тўгараклари сони ортиб бормоқда.

Натижада Ўзбекистон спортчилари халқаро мусобақаларда ҳам муваффақиятли иштирок этиб, мамлакат байроғини баланд кўтаришмоқда. Олимпия ва жаҳон чемпионларининг зафарли чиқишлари ёшларга намуна бўлиб, уларни ҳам спорт билан шуғулланишга илҳомлантирмоқда. Амударё туманида ўтказилган чемпионат ҳам ёшларни спортга жалб қилиш ва соғлом турмуш тарзини кенг тарғиб қилишда муҳим восита бўлди.

Бокс бўйича Қорақалпоғистон Республикаси чемпионатида 2008–2009 йилларда туғилган ёшлар ва 18 ёшдан ошган катталар ўзаро беллашдилар. Ҳар бир тоифада спортчилар 10 тадан вазн тоифасида ўзаро куч синашдилар. Қизғин ва муросасиз кечган беллашувлар спортчиларнинг юксак техник маҳорати, жанговар руҳи ва ғалабага бўлган қатъий интилиши билан ёдда қолди.

Чемпионат якунида жамоаларнинг умумий натижалари эълон қилинди, бу эса Қорақалпоғистонда бокс мактабларининг қайси ҳудудларда кучли ривожланаётганини кўрсатди.

2008–2009 йилларда туғилган ёшлар ўртасида 1-ўрин Нукус олимпия ва паралимпия спорт турларига тайёрлаш маркази жамоасига, 2-ўрин Нукус шаҳри ва 3-ўрин Хўжайли тумани жамоаларига насиб қилди.

Катталар ўртасидаги мусобақаларда ҳам Нукус олимпия ва паралимпия спорт турларига тайёрлаш маркази жамоаси ғолибликни қўлга киритди. 2-ўрин мусобақа мезбони – Амударё тумани жамоасига, 3-ўрин эса Нукус шаҳри жамоасига насиб қилди.

Чемпионатнинг ҳар бир вазн тоифасида ғолиб бўлган спортчилар эсдалик совғалари билан тақдирландилар ва уларнинг спортчилик карьераси учун энг муҳим ютуқ – Ўзбекистон чемпионатига йўлланмани қўлга киритдилар. Шунингдек, улар расман Қорақалпоғистон терма жамоаси аъзолигига қабул қилинди.

Бу каби мусобақалар ёш боксчилар учун катта тажриба мактаби бўлиб, уларнинг кейинчалик халқаро ареналарда Ўзбекистон шарафини ҳимоя қилиши учун мустаҳкам замин яратади. Бу шубҳасиз, соҳадаги ислоҳотларнинг ва спорт инфратузилмасини яхшилашга қаратилган саъй-ҳаракатларнинг самарасидир.