AFGʻONISTONDAGI JANGOVAR HARAKATLARDA HALOK BOʻLGAN JANGChILAR XOTIRLANDI

Sobiq ittifoq davrida Afgʻoniston hududidagi jangovar harakatlarda amudaryolik 350 nafar navqiron yigitlar ishtirok etishgan. Ulardan 13 nafari qardosh Afgʻoniston tuprogʻida halok boʻlgan. Koʻplab harbiy xizmatchilar esa ushbu mashʼum urushdan nogiron holda, turli darajadagi kasalliklar bilan qaytishgan.

Qanglilik navqiron yigit Zarifboy Xudoyorov ham Afgʻon tuprogʻidagi maqsadsiz urush janggohlarida jon berganida hali 19 yoshga ham toʻlmagan edi. Ota-onasi bagʻridan oʻz yigitlik burchini oʻtash, ona Vatanini himoya qilish uchun harbiy xizmatga chaqirilgan Zarifboy Xudoyorov sogʻ-salomat chiqib ketib, uyiga temir tobutda qaytdi. Agar u hozir hayot boʻlganida oʻgʻil-qizlarining kamolini koʻrib, umrining rohat-farogʻatli pallasiga qadam qoʻygan boʻlardi. Nuroniy yoshga yetgan onasi Sholmon momo Xudoyorova esa hamon oʻgʻlining xotiralaridan oʻziga taskin topib yashaydi.

Joriy yilning 10-oktyabr kuni Oʻzbekiston Respublikasi "VETERAN" jangchi-faxriylar va nogironlar birlashmasining Qoraqalpogʻiston boʻlimi Kengashi boshligʻi Yusupbek Allanbekov Amudaryo tumaniga tashrif buyurib, Zarifboy Xudoyorov tugʻilib-oʻsgan xonadonda boʻldi va qahramon jangchining onasi Sholmon momo Xudoyorova bilan uchrashdi.

Uchrashuv tadbirida Qum yop mahalla fuqarolar yigʻini raisi Sodiq Qurbonboyev, mazkur mahalla faollari, Zarifboy Xudoyorovning yaqinlari ishtirok etishib, sobiq baynalmilal jangchining bolaligi va yoshligi bilan bogʻliq xotiralarini yodga oldilar hamda marhum jangchi xotirasiga Qurʼon oyatlaridan tilovatlar qildilar.

Uchrashuv davomida Sholmon momo Xudoyorovaga "VETERAN" jangchi faxriy va nogironlar birlashmasining Qoraqalpogʻiston Respublikasi boʻlimi Kengashi tomonidan sovgʻalar topshirilib, u tugʻilib-oʻsgan xonadonga "Bu xonadonda Afgʻoniston hududidagi jangovar harakatlarda halok boʻlgan jangchi Xudiyarov Zarifboy Madiyarovichning oila aʼzolari yashaydi" mavzusidagi lavha ilib qoʻyildi.

Shuningdek, masʼullar Afgʻon urushida halok boʻlgan Tangirbergan Aytekov tugʻilib-oʻsgan xonadonda ham boʻlib, qahramon jangchining onasi Rima momo Aytekova bilan uchrashdi. Uchrashuvda quroldoshlar Rahmatulla Hayitboyev, Ozod Xoʻjaniyozov, Shavkat Saidboyevlar hamda Namuna Mahalla fuqarolar yigʻini raisi Komiljon Tojimovlar mehmonga hamrohlik qildilar. Uchrashuvda Tangirbergan Aytekovning bolaligi, oʻquvchilik va yoshlik davri, insoniy fazilatlari yodga olinib, mahalla imomi Farhod Avezov tomonidan Qurʼon tilovat qilindi va marhumning onasi Rima momo Aytekovaga sovgʻalar topshirilib, xonadoniga maxsus lavha ilindi.

Shu kuni Yusupbek Allanbekov rahbarligida Amudaryo tumani Mudofaa ishlari boʻlimi binosida yigʻilish oʻtkazildi. Yigʻilishda Afgʻoniston hududidagi jangovar harakatlarda ishtirok etgan sobiq jangchi-faxriylar, ayni paytda Amudaryo tuman Maktabgacha va maktab taʼlimi boʻlimi tasarrufidagi umumtaʼlim maktablarida, yosh avlod taʼlim-tarbiyasi sohasida faoliyat olib borayotgan bir guruh oʻqituvchi-murabbiylarning oʻsib kelayotgan yosh avlodni vatanparvarlik, mustaqillik gʻoyalariga sadoqat ruhida tarbiyalash borasidagi xizmatlari alohida eʼtirof etilib, ularga "VETERAN" jangchi-faxriylar birlashmasi Qoraqalpogʻiston Respublikasi boʻlimi tomonidan "Minnatdorchilik xati" topshirildi.

Uchrashuvda soʻzga chiqqanlar bugungiday tinch va osoyishta hayotning, farovonlikning qadriga yetish, yosh avlod qalbida millatlararo totuvlik, doʻstlik, xalqparvarlik, istiqlol gʻoyalariga sadoqat tuygʻularini uygʻotish, ona Vatanga sadoqat bilan xizmat qilish har bir fuqaroning zimmasidagi masʼuliyatli burchi ekanligini taʼkidladilar.

ROBIYa YOʻLDOShEVA.