Birdamlik samarasi: 28-sonli maktabning taʼlimdagi yutuqlari
Tuman Maktabgacha va maktab taʼlimi boʻlimi tasarrufidagi 28-sonli umumiy oʻrta taʼlim maktabida ilgʻor va ahil pedagogik jamoa faoliyat olib boradi. Ayni paytda mazkur taʼlim muassasasida 554 nafar oʻquvchi-yoshlarga 53 nafar pedagog xodimlar zamon talablari darajasida taʼlim-tarbiya berishmoqda. Ulardan 10 nafari oliy, 17 nafari birinchi, 21 nafari ikkinchi toifali, 5 nafari esa oliy maʼlumotli mutaxassis pedagoglardir. Oʻqituvchilarning 8 nafari turli darajadagi sertifikatlar sohiblari boʻlib, oʻquvchilarning bilim va qobiliyatlarini rivojlantirishda hamisha faoldirlar.
TAʼLIM VA SPORTDAGI YuTUQLAR
Oʻtgan oʻquv yilida maktabni tugatgan 63 nafar oʻquvchilarning teng yarmi OTMga oʻqishga kirdi. Bu koʻrsatkich boʻyicha maktab tumanda 12-oʻrinni egalladi. Shuningdek, oʻtgan 2024-2025 oʻquv yilida 2 nafar oʻquvchi fanlar olimpiadasining tuman bosqichida faxrli 1-oʻrinni egallab, mazkur olimpiadaning Respublika bosqichida muvaffaqiyatli ishtirok etdi.
Pedagogik jamoaning oʻzaro ahillik va birdamlik asosidagi faoliyati tufayli maktabda tashkil etilgan sportchilar jamoasi faxrli oʻrinlarni egallab kelmoqda.
Xususan, oʻtgan 2024-2025 oʻquv yilida “Besh tashabbus olimpiadasi” musobaqalarida voleybol boʻyicha tumanda faxrli 1-oʻrinni, mazkur musobaqaning Qoraqalpogʻiston Respublikasi bosqichida sovrinli oʻrinni egalladilar.
“Umid nihollari” sport musobaqasida maktabning voleybolchi qizlar jamoasi tumanda faxrli 1-oʻrinni egallab, musobaqaning Respublika bosqichiga yoʻllanma oldi.
Mazkur musobaqaning yengil atletika boʻyicha Qoraqalpogʻiston Respublikasi bosqichida 11-sinf oʻquvchilari Jamshid Gulmirzayev hamda Oynura Rajabboyevalar faxrli 3-oʻrinni egalladilar.
INTELLEKTUAL SALOHIYaT, OʻQITUVChILAR VA OʻQUVChILAR YuTUQLARI
Maktabda faoliyat olib boruvchi fanlar boʻyicha toʻgaraklar mashgʻulotlaridagi uzviylik natijasida bilimdon va zakovatli yoshlar safi yil sayin oshib bormoqda. Ayniqsa, “Zakovatli yoshlar” toʻgaragi shugʻullanuvchilari hamisha peshqadam. Maktabning “Bilimdonlar” jamoasi “Zakovat” intellektual oʻyinining 2025-yilgi musobaqasida tumanda faxrli 1-oʻrinni egallab, musobaqaning Qoraqalpogʻiston Respublikasi bosqichida ishtirok etdi.
Fizika fanidan 7-8-sinflar oʻquvchilari oʻrtasida oʻtkazilgan hokim olimpiadasida maktabning 8-sinf oʻquvchisi Dilshodbek Yangiboyev faxrli 1-oʻrinni egallab, tuman hokimi tomonidan munosib taqdirlandi.
Maktabda oʻz yoʻnalishi boʻyicha yuqori natijalarga erishib, kasbdoshlariga namuna boʻlayotgan oʻqituvchi-murabbiylar talaygina. Jismoniy tarbiya fani oʻqituvchisi Maqsad Allaniyazov “Qoraqalpogʻiston ustozi” tanlovida oʻz yutuqlari bilan ishtirok etib, “Yilning eng yaxshi ustozi” sertifikatiga ega boʻldi.
Shuningdek, maktab oʻqituvchilaridan iborat ayol-qizlar voleybol jamoasi 30 yoshdan yuqori ayol-qizlar orasida boʻlib oʻtgan “Mahalla ligasi” musobaqalarining Qoraqalpogʻiston Respublikasi bosqichida faxrli 2-oʻrinni qoʻlga kiritdilar.
KELAJAKKA DAXLDORLIK
Maktab pedagogika jamoasi 2025-2026 oʻquv yilini yanada jipslik bilan boshladilar. Joriy oʻquv yilida 1-sinfga qadam qoʻygan 63 nafar murgʻak qalbli oʻquvchilarga zamon talablari asosida taʼlim berish, milliy-maʼnaviy qadriyatlar ruhida tarbiyalashga qaratilgan saʼy-harakatlar hozirdan oʻz samarasini bermoqda. 1-sinf oʻquvchilari alifbedan ilk saboqlarni katta qiziqish bilan oʻzlashtirishmoqda. Chunki boshlangʻich taʼlim-tarbiya jarayoni samarali tashkil etilgandagina maktab taʼlimida yuqori natijalarga erishiladi. Bu borada 28-sonli maktabda oʻziga xos tajriba hamda namunali ish uslubi joriy etilgan hamda bu ahil va hamjihat pedagogika jamoasi faoliyatida oʻz aksini topmoqda.
ROBIYa YOʻLDOShEVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
