TUMAN MAKTABGAChA VA MAKTAB TAʼLIMI BOʻLIMIDA KORRUPTsIYaGA QARShI TARGʻIBOT IShLARI OLIB BORILDI

Xalqimizni korruptsiyaga qarshi kurashishda birdamlik va hamjihatlikka daʼvat etish, ularning ongida bu yoqimsiz illatga nisbatan murosasizlik tuygʻusini shakllantirishda huquqni muhofaza qilish organlari, davlat va jamoat tashkilotlari bilan birga nodavlat notijorat tashkilotlari hamda ommaviy axborot vositalarining munosib hissasi bor. Bu borada Amudaryo televideniyesi tahririyatining Oliy Majlis huzuridagi Fuqarolik jamiyati institutlarini qoʻllab-quvvatlash jamoat fondi Qoraqalpogʻiston boʻlimi tomonidan moliyalashtirilgan “Korruptsiya — davlat va jamiyat taraqqiyotiga tahdid” nomli grant loyihasi doirasida amalga oshirilayotgan izchil chora-tadbirlar oʻzining ijobiy samarasini bermoqda.

Loyiha korrdinatorlari tomonidan oʻtkazilayotgan uchrashuvlarda davlat xizmatchilariga korruptsiyaning zararli oqibatlari haqida maʼlumotlar berilib, davlat xizmatlaridan foydalanuvchilarga korruptsiyaga qarshi kurashuvchi vakolatli tuzilmalarning “Ishonch telefonlari”, “Call markazlari” haqida maʼlumotlar taqdim etilmoqda hamda korruptsiyaga qarshi kurashish boʻyicha qonunchilikdan koʻchirmalar tarqatilmoqda.

23-sentyabr kuni Amudaryo tuman Maktabgacha va maktab taʼlimi boʻlimi binosida soha vakillari ishtirokida boʻlib oʻtgan uchrashuvda ham boʻlim tasarrufidagi taʼlim-tarbiya muassasalarida korruptsiyaga qarshi kurash boʻyicha olib borilayotgan ishlar atroflicha muhokama etilib, oʻsib kelayotgan yosh avlod ongida korruptsiyaga nisbatan murosasizlik tuygʻusini shakllantirish borasida qimmatli fikrlar bildirildi.

Tadbirda Amudaryo televideniyesi tahririyatining “Korruptsiya — davlat va jamiyat taraqqiyotiga tahdid” nomli grant loyihasi koordinatori Robiya Yoʻldosheva mazkur loyihani amalga oshirishdan koʻzlangan maqsad va kutilayotgan natijalar haqida soʻz yuritdi. Shu bilan birga, korruptsiya illatiga nisbatan oʻsib kelayotgan yosh avlod ongida murosasizlik tuygʻusini shakllantirishda taʼlim-tarbiya muassasalari, ayniqsa, pedagog kadrlarning roli muhimligini alohida eʼtirof etdi. U oʻz nutqida ishtirokchilar eʼtiborini korruptsion jinoyatlar boʻyicha statistikaga qaratib, bu borada yanada jipslik bilan kurash olib borish zarurligini taʼkidladi.

Qayd qilinganidek, korruptsion jinoyatlarning asosiy qismi pora olish, pora berish, firibgarlik, manfaatlar toʻqnashuvi natijasida sodir etilgan va eng koʻp jinoyat hamda qonunbuzarlik holatlari sogʻliqni saqlash, taʼlim, boshqaruv organlari, kadastr xizmati va soliq tizimiga toʻgʻri keladi. Oʻzbekistonda faqat oʻtgan 2024-yil davomida korruptsion jinoyatlari uchun 7354 kishi jazolangan. Sudlanganlar va zararlar boʻyicha statistikada Qoraqalpogʻiston Respublikasi 5-oʻrinda, yaʼni, 2024-yil davomida 554 nafar shaxs korruptsion jinoyatga qoʻl urgan.

Tadbir davomida ishtirokchilarga davlat organlarining korruptsiyaga qarshi kurashuvchi vakolatli tuzilmalarining “Ishonch telefonlari”, “Call markazlari” haqidagi maʼlumotlar, qonunchilik hujjatlaridan koʻchirmalar, bukletlar va flayerlar tarqatib, boʻlim binosining kirish qismiga va xodimlarning xizmat xonalariga “Korruptsiyaga yoʻq deng!” mavzusidagi koʻrgazmali lavhalarni joylashtirdilar hamda boʻlim mutaxassislariga korruptsion holatlar sodir boʻlishining oldini olishga qaratilgan maslahat va tavsiyalar berdilar.

Bu kabi tushuntirish-targʻibot tadbirlari taʼlim sohasini korruptsiyadan xoli sohaga aylantirish borasidagi ishlarga hissa qoʻshishi shubhasiz.

Robiya YOʻLDOShEVA