ТУМАН МАКТАБГАЧА ВА МАКТАБ ТАЪЛИМИ БЎЛИМИДА КОРРУПЦИЯГА ҚАРШИ ТАРҒИБОТ ИШЛАРИ ОЛИБ БОРИЛДИ

Халқимизни коррупцияга қарши курашишда бирдамлик ва ҳамжиҳатликка даъват этиш, уларнинг онгида бу ёқимсиз иллатга нисбатан муросасизлик туйғусини шакллантиришда ҳуқуқни муҳофаза қилиш органлари, давлат ва жамоат ташкилотлари билан бирга нодавлат нотижорат ташкилотлари ҳамда оммавий ахборот воситаларининг муносиб ҳиссаси бор. Бу борада Амударё телевидениеси таҳририятининг Олий Мажлис ҳузуридаги Фуқаролик жамияти институтларини қўллаб-қувватлаш жамоат фонди Қорақалпоғистон бўлими томонидан молиялаштирилган “Коррупция — давлат ва жамият тараққиётига таҳдид” номли грант лойиҳаси доирасида амалга оширилаётган изчил чора-тадбирлар ўзининг ижобий самарасини бермоқда.

Лойиҳа коррдинаторлари томонидан ўтказилаётган учрашувларда давлат хизматчиларига коррупциянинг зарарли оқибатлари ҳақида маълумотлар берилиб, давлат хизматларидан фойдаланувчиларга коррупцияга қарши курашувчи ваколатли тузилмаларнинг “Ишонч телефонлари”, “Call марказлари” ҳақида маълумотлар тақдим этилмоқда ҳамда коррупцияга қарши курашиш бўйича қонунчиликдан кўчирмалар тарқатилмоқда.

23 сентябрь куни Амударё туман Мактабгача ва мактаб таълими бўлими биносида соҳа вакиллари иштирокида бўлиб ўтган учрашувда ҳам бўлим тасарруфидаги таълим-тарбия муассасаларида коррупцияга қарши кураш бўйича олиб борилаётган ишлар атрофлича муҳокама этилиб, ўсиб келаётган ёш авлод онгида коррупцияга нисбатан муросасизлик туйғусини шакллантириш борасида қимматли фикрлар билдирилди.

Тадбирда Амударё телевидениеси таҳририятининг “Коррупция — давлат ва жамият тараққиётига таҳдид” номли грант лойиҳаси координатори Робия Йўлдошева мазкур лойиҳани амалга оширишдан кўзланган мақсад ва кутилаётган натижалар ҳақида сўз юритди. Шу билан бирга, коррупция иллатига нисбатан ўсиб келаётган ёш авлод онгида муросасизлик туйғусини шакллантиришда таълим-тарбия муассасалари, айниқса, педагог кадрларнинг роли муҳимлигини алоҳида эътироф этди. У ўз нутқида иштирокчилар эътиборини коррупцион жиноятлар бўйича статистикага қаратиб, бу борада янада жипслик билан кураш олиб бориш зарурлигини таъкидлади.

Қайд қилинганидек, коррупцион жиноятларнинг асосий қисми пора олиш, пора бериш, фирибгарлик, манфаатлар тўқнашуви натижасида содир этилган ва энг кўп жиноят ҳамда қонунбузарлик ҳолатлари соғлиқни сақлаш, таълим, бошқарув органлари, кадастр хизмати ва солиқ тизимига тўғри келади. Ўзбекистонда фақат ўтган 2024 йил давомида коррупцион жиноятлари учун 7354 киши жазоланган. Судланганлар ва зарарлар бўйича статистикада Қорақалпоғистон Республикаси 5-ўринда, яъни, 2024 йил давомида 554 нафар шахс коррупцион жиноятга қўл урган.

Тадбир давомида иштирокчиларга давлат органларининг коррупцияга қарши курашувчи ваколатли тузилмаларининг “Ишонч телефонлари”, “Call марказлари” ҳақидаги маълумотлар, қонунчилик ҳужжатларидан кўчирмалар, буклетлар ва флаерлар тарқатиб, бўлим биносининг кириш қисмига ва ходимларнинг хизмат хоналарига “Коррупцияга йўқ денг!” мавзусидаги кўргазмали лавҳаларни жойлаштирдилар ҳамда бўлим мутахассисларига коррупцион ҳолатлар содир бўлишининг олдини олишга қаратилган маслаҳат ва тавсиялар бердилар.

Бу каби тушунтириш-тарғибот тадбирлари таълим соҳасини коррупциядан холи соҳага айлантириш борасидаги ишларга ҳисса қўшиши шубҳасиз.

Робия ЙЎЛДОШЕВА