AMUDARYo TUMAN PROKURORI SAYYoR QABULDA AHOLI MUROJAATLARINI JOYIDA HAL ETDI

Amudaryo tuman prokuraturasi tomonidan aholi murojaatlari bilan ishlashda oʻziga xos tizim yaratilgan. Unga koʻra, murojaatlarning shaklidan qatʼi nazar, tuman prokurori Bahrom Masharipov rahbarligida har bir murojaat alohida roʻyxatga olinib, koʻtarilayotgan muammoning dolzarbligi oʻrganiladi va joyiga chiqqan holda muammolarni hal etish boʻyicha amaliy choralar koʻriladi. Shuningdek, joylarda sayyor qabullar oʻtkazilib, aholi bilan yuzma-yuz muloqot qilish orqali fuqarolarni qiynab kelayotgan masalalarga oydinlik kiritiladi.

Joriy yilning 12-sentyabr kuni Jayxun ovul fuqarolar yigʻini binosida tuman prokurori Bahrom Masharipov tomonidan tashkillashtirilgan navbatdagi sayyor qabul jarayonida ham aholi hayotiga doir koʻplab muammolar oʻz yechimini topdi.

Sayyor qabul jarayonida Jayxun ovulidan tashqari Daryo boʻyi, Uyshin mahallalari va Qipchoq shaharcha fuqarolar yigʻinlarida istiqomat qiluvchi aholi vakillari oʻzlarini qiynab kelayotgan muammolar boʻyicha murojaatlari bilan ishtirok etdilar. Tuman prokurori har bir murojaatni alohida eʼtibor bilan tinglab, sinchkovlik bilan koʻrib chiqdi va murojaatlarning mazmun-mohiyatidan kelib chiqib, tegishli masʼullarni jalb qilgan holda oʻrganishlar olib borildi.

Qabul davomida asosan aholi punktlaridagi infratuzilma obʼektlari, xususan, mahallalarni bir-biri bilan bogʻlab turuvchi koʻpriklarni taʼmirlash, serqatnov yoʻllar boʻylariga yoʻl belgilarini oʻrnatish, farzandini davolatish uchun moddiy yordam ajratish, hududlarning sanitariya holatini yaxshilash, koʻchalarni obodonlashtirish, ayniqsa, Amudaryo daryosi boʻyidagi umumiy ovqatlanish shoxobchalari atrofida va daryo qirgʻoqlari boʻylab tozalash ishlarini amalga oshirish yuzasidan koʻtarilgan dolzarb muammolar eʼtibor bilan oʻrganildi.

Tuman prokurori aholini qiynab kelayotgan muammolarni joyida hal qilish maqsadida jarayonga tegishli tashkilotlar rahbarlarini jalb qildi va koʻtarilgan har bir murojaat boʻyicha masʼullarga aniq topshiriqlar berdi. Shu bilan birga Bahrom Masharipov sayyor qabul jarayonida ishtirok etayotgan fuqarolarga oʻz haq-huquqlari doirasidagi muammolarni ochiqlashda tortinmaslikni, bugungi kunda huquqni muhofaza qilish organlari ochiqlik va shaffoflik tamoyili asosida ish yuritishini, bu borada jamoatchilik vakillari bilan hamkorlik yaxshi yoʻlga qoʻyilganini alohida taʼkidladi.

Sayyor qabulda taʼkidlanganidek, fuqarolarning murojaatlari yuzasidan shaffoflik asosida oʻrganishlar olib borish, bevosita xalq orasiga kirib borib, aholi bilan uchrashuvlar oʻtkazish, sayyor qabullar tashkil etish — bu jamiyat hayotidagi eng muhim masalalarni anglash va ularni hal etishning eng samarali yoʻlidir. Prokuratura organlari esa bu borada aholiga yaqindan koʻmaklashib, ularning qonuniy manfaatlarini himoya qilishda hamisha kamarbastadir.

Ushbu sayyor qabul fuqarolarning davlat organlariga ishonchini yanada mustahkamlab, ular hayotiga doir muammolarni joyiga chiqqan holda tinglab, har bir muammoning tezkor yechimini topishga xizmat qilgani bilan muhim ahamiyat kasb etdi.

Sharyar Joldasov, tuman prokurorining katta yordamchisi