Jamoatchilik nazorati – suv taʼminoti sifatining muhim kafolati

Oʻzbekiston Respublikasining 2022-yil 22-iyuldagi “Ichimlik suvi taʼminoti va oqova suvlarni chiqarib yuborish toʻgʻrisida”gi Qonunida fuqarolar, mahalliy oʻzini oʻzi boshqarish organlari, nodavlat notijorat tashkilotlari hamda fuqarolik jamiyati boshqa institutlarining ushbu sohadagi tadbirlarda ishtirok etishi belgilangan.

2025-yil 14-yanvar kuni Oʻzbekiston mahallalari uyushmasi hamda Qurilish va uy-joy kommunal xoʻjaligi sohasida nazorat qilish inspektsiyasi oʻrtasida mazkur qonun talablaridan kelib chiqqan holda oʻzaro hamkorlik memorandumi imzolangan edi. Ushbu memorandum asosida Inspektsiya va “Qoraqalpoq suv taʼminoti” aktsiyadorlik jamiyatining Amudaryo tuman filiali masʼul xodimlari hamkorligida ichimlik suvi taʼminoti hamda oqova suvlarni chiqarish xizmatlaridan foydalanish qoidalariga rioya etilishi yuzasidan muntazam ravishda nazorat va targʻibot tadbirlarini oʻtkazib kelmoqda. Ana shunday nazorat tadbirlaridan navbatdagisi tumanning Boy ovul mahallasi va Boʻzyop ovulida oʻtkazildi.

Ichimlik suvi taʼminoti va oqova suvlarni chiqarish xizmatlarini koʻrsatishda jamoatchilik nazoratining ahamiyati juda katta. Bu avvalo, suv taʼminoti tashkilotlarining masʼuliyatini oshiradi, ularning oʻz vazifalariga sidqidildan yondashishini taʼminlaydi. Ikkinchidan, aholining muammolarini tezkor aniqlash va bartaraf etish imkonini beradi. Uchinchidan esa fuqarolarning tizimga boʻlgan ishonchini mustahkamlaydi va ularni suv resurslaridan oqilona foydalanishga undaydi.

Oʻrganishlar jarayonida mahallalar aholisi tomonidan jiddiy eʼtirozlar, jumladan, avariya holatlarini bartaraf etish, ichimlik suvining bosimi va sifati, taʼminot uzviyligi boʻyicha jiddiy kamchiliklar mavjud emasligi bildirildi.

Aytish joizki, amaldagi qoidalarga muvofiq ichimlik suvining sifati davlat sanitariya-epidemiologiya nazorati organlari tomonidan belgilangan standartlarga toʻliq javob berishi kerak. Suv bosimi esa koʻp qavatli uylarning eng yuqori qavatlarigacha yetib borishini taʼminlashi lozim. Uzluksiz suv taʼminoti – bu isteʼmolchilarning qonuniy huquqi boʻlib, uni taʼminlash suv taʼminoti tashkilotining asosiy vazifasidir.

Oʻz navbatida hududdagi isteʼmolchilarning Qonun talablariga amal qilishi ustidan ham nazorat tadbirlari oʻtkazildi. Unda isteʼmolchilarga ichimlik suvidan oqilona va tejamkorlik bilan foydalanish, suv taʼminoti tashkiloti bilan tuzilgan shartnoma shartlariga amal qilish boʻyicha tavsiyalar berildi.

Bugungi kunda dunyo miqyosida chuchuk suv zaxiralarining kamayib borayotgani har bir tomchi suvni qadrlashni taqozo etadi. Suvni tejash nafaqat oilaviy byudjetni iqtisod qiladi, balki kelajak avlodlar uchun suv resurslarini asrashga qoʻshilgan hissa hamdir. Har bir xonadonda suvdan foydalanishda isrofgarchilikka yoʻl qoʻymaslik, suv joʻmraklarini soz holatda saqlash – bu yuksak madaniyat va tabiatga boʻlgan mehr ifodasidir.

Suv taʼminoti tashkiloti bilan tuzilgan shartnoma shartlariga amal qilish ham isteʼmolchi, ham xizmat koʻrsatuvchi tashkilot uchun muhimdir. Shartnomada ikki tomonning huquq va majburiyatlari aniq belgilab qoʻyilgan. Isteʼmolchi oʻz vaqtida toʻlovlarni amalga oshirishi, suv hisoblagichlarining sozligini nazorat qilishi lozim boʻlsa, suv taʼminoti tashkiloti sifatli va uzluksiz xizmat koʻrsatish majburiyatini oladi.

Bu kabi nazorat va targʻibot tadbirlaridan koʻzlangan maqsad aholining huquqiy savodxonligini oshirish, ularning kommunal xizmatlar sohasidagi islohotlarga daxldorlik hissini kuchaytirish va eng asosiysi, ichimlik suvi taʼminoti sifatini yanada yaxshilashga hissa qoʻshishdir.