2-sonli davlat maktabgacha taʼlim tashkilotida "Ochiq eshiklar kuni" tadbiri oʻtkazildi

Bugungi kunda bolaning har tomonlama rivojlanishida maktabgacha taʼlim muassasasi va oila oʻrtasidagi hamkorlikning mustahkam boʻlishi muhim ahamiyat kasb etmoqda. Sababi, bogʻcha bolalarga tizimli bilim va koʻnikmalarni berish, ularning ijtimoiylashuvini taʼminlash, tengdoshlari va kattalar bilan muloqot qilish qobiliyatini rivojlantirish uchun masʼuldir. Oila esa bolaga birinchi hayotiy tajribalarni beradi, uning axloqiy-maʼnaviy qadriyatlarini shakllantiradi, hissiy ehtiyojlarini qondiradi. Agar bu ikki muhit bir-birini toʻldirib, bir xil yoʻnalishda harakat qilsa, bolaning rivojlanishi izchil va samarali kechadi. Mamlakatimiz taʼlim tizimidagi islohotlar ham aynan shu maqsadga yoʻnaltirilgani bilan ahamiyatlidir.

Amudaryo tumanidagi 2-sonli Davlat maktabgacha taʼlim tashkilotida ham shu maqsadda “Ochiq eshiklar kuni” tadbiri tashkil qilindi.

Tadbirdan asosiy maqsad ota-onalarni bogʻchadagi taʼlim-tarbiya jarayoni bilan yaqindan tanishtirish, pedagoglarning kasbiy faoliyatidagi ochiqlik va shaffoflikni namoyish etish hamda oila va muassasa oʻrtasidagi oʻzaro ishonchni mustahkamlashdan iborat boʻldi.

"Ochiq eshiklar kuni" tadbiri davomida ota-onalar guruh xonalari, mashgʻulot jarayonlari, bolalar uchun tashkil etilgan erkin faoliyat markazlari bilan tanishdilar. Ular bolalarning ijodiy ishlarini tomosha qilib, kichkintoylarning iqtidorlariga guvoh boʻlishdi. Bolajonlarning sahnalashtirgan raqslari esa tadbirga oʻzgacha zavq bagʻishladi. Bunday samimiy muhitda ota-onalar tarbiyachilarning mehnatini qadrlashga va ular bilan yanada yaqin hamkorlik qilishga ruhlandilar.

Tadbir yakunida ota-onalar va pedagoglar bolaning har tomonlama yetuk shaxs boʻlib shakllanishida oila va bogʻchaning birgalikdagi saʼy-harakatlari muhimligini alohida taʼkidlashdi. Zero, ota-ona va tarbiyachilar oʻrtasidagi doimiy muloqot bolaning hissiy holati haqida toʻliq tasavvur beradi. Oilada olgan tarbiya va bogʻchadagi ijtimoiy muhitning uygʻunligi bolaning oʻziga boʻlgan ishonchini oshiradi, uning muloqot koʻnikmalarini rivojlantiradi.

Ota-onalar bolaning bogʻchada nimalarni oʻrganayotganini bilsa, uyda ham ushbu mavzularni mustahkamlashga yordam berishi mumkin. Bu esa bolaning bilimni oʻzlashtirishini tezlashtiradi va mashgʻulotlarga qiziqishini yanada oshiradi. Hamkorlik natijasida bolaning rivojlanishidagi har qanday qiyinchiliklar, masalan, nutqidagi kamchiliklar, xulq-atvordagi oʻzgarishlar tarbiyachi va ota-ona tomonidan birgalikda erta aniqlanib, zudlik bilan tegishli choralar koʻriladi.

“Maktabgacha taʼlim va tarbiya toʻgʻrisida”gi davlat talablarining amaldagi ijrosining yorqin ifodasi boʻlgan mazkur tadbir ota-onalar va pedagoglar oʻrtasidagi oʻzaro ishonchni mustahkamlab, kelgusidagi hamkorlik uchun mustahkam zamin yaratdi.

Darhaqiqat, bugungi shiddatli zamonda bolalarning kelajagi haqida qaygʻurish, ularni yetuk va bilimli shaxs etib tarbiyalashda har ikkala tomonning ham masʼuliyati yuqori. "Ochiq eshiklar kuni" kabi tadbirlar esa ushbu masʼuliyatni anglab yetishga, oʻzaro muloqot va fikr almashishni kuchaytirishga xizmat qiladi. Bu esa oʻz navbatida bolalarning baxtli va farovon kelajagiga hissa qoʻshadi.

Bu tadbir orqali ota-onalar farzandining kun davomida qanday sharoitlarda boʻlishi, qanday bilim va koʻnikmalarni oʻzlashtirishini oʻz koʻzi bilan koʻrib, tasavvur hosil qildilar va hamkorlik uchun maktabgacha taʼlim muassasasi maʼmuriyatiga minnatdorlik izhor qildilar.