2-сонли давлат мактабгача таълим ташкилотида "Очиқ эшиклар куни" тадбири ўтказилди
Бугунги кунда боланинг ҳар томонлама ривожланишида мактабгача таълим муассасаси ва оила ўртасидаги ҳамкорликнинг мустаҳкам бўлиши муҳим аҳамият касб этмоқда. Сабаби, боғча болаларга тизимли билим ва кўникмаларни бериш, уларнинг ижтимоийлашувини таъминлаш, тенгдошлари ва катталар билан мулоқот қилиш қобилиятини ривожлантириш учун масъулдир. Оила эса болага биринчи ҳаётий тажрибаларни беради, унинг ахлоқий-маънавий қадриятларини шакллантиради, ҳиссий эҳтиёжларини қондиради. Агар бу икки муҳит бир-бирини тўлдириб, бир хил йўналишда ҳаракат қилса, боланинг ривожланиши изчил ва самарали кечади. Мамлакатимиз таълим тизимидаги ислоҳотлар ҳам айнан шу мақсадга йўналтирилгани билан аҳамиятлидир.
Амударё туманидаги 2-сонли Давлат мактабгача таълим ташкилотида ҳам шу мақсадда “Очиқ эшиклар куни” тадбири ташкил қилинди.
Тадбирдан асосий мақсад ота-оналарни боғчадаги таълим-тарбия жараёни билан яқиндан таништириш, педагогларнинг касбий фаолиятидаги очиқлик ва шаффофликни намойиш этиш ҳамда оила ва муассаса ўртасидаги ўзаро ишончни мустаҳкамлашдан иборат бўлди.
"Очиқ эшиклар куни" тадбири давомида ота-оналар гуруҳ хоналари, машғулот жараёнлари, болалар учун ташкил этилган эркин фаолият марказлари билан танишдилар. Улар болаларнинг ижодий ишларини томоша қилиб, кичкинтойларнинг иқтидорларига гувоҳ бўлишди. Болажонларнинг саҳналаштирган рақслари эса тадбирга ўзгача завқ бағишлади. Бундай самимий муҳитда ота-оналар тарбиячиларнинг меҳнатини қадрлашга ва улар билан янада яқин ҳамкорлик қилишга руҳландилар.
Тадбир якунида ота-оналар ва педагоглар боланинг ҳар томонлама етук шахс бўлиб шаклланишида оила ва боғчанинг биргаликдаги саъй-ҳаракатлари муҳимлигини алоҳида таъкидлашди. Зеро, ота-она ва тарбиячилар ўртасидаги доимий мулоқот боланинг ҳиссий ҳолати ҳақида тўлиқ тасаввур беради. Оилада олган тарбия ва боғчадаги ижтимоий муҳитнинг уйғунлиги боланинг ўзига бўлган ишончини оширади, унинг мулоқот кўникмаларини ривожлантиради.
Ота-оналар боланинг боғчада нималарни ўрганаётганини билса, уйда ҳам ушбу мавзуларни мустаҳкамлашга ёрдам бериши мумкин. Бу эса боланинг билимни ўзлаштиришини тезлаштиради ва машғулотларга қизиқишини янада оширади. Ҳамкорлик натижасида боланинг ривожланишидаги ҳар қандай қийинчиликлар, масалан, нутқидаги камчиликлар, хулқ-атвордаги ўзгаришлар тарбиячи ва ота-она томонидан биргаликда эрта аниқланиб, зудлик билан тегишли чоралар кўрилади.
“Мактабгача таълим ва тарбия тўғрисида”ги давлат талабларининг амалдаги ижросининг ёрқин ифодаси бўлган мазкур тадбир ота-оналар ва педагоглар ўртасидаги ўзаро ишончни мустаҳкамлаб, келгусидаги ҳамкорлик учун мустаҳкам замин яратди.
Дарҳақиқат, бугунги шиддатли замонда болаларнинг келажаги ҳақида қайғуриш, уларни етук ва билимли шахс этиб тарбиялашда ҳар иккала томоннинг ҳам масъулияти юқори. "Очиқ эшиклар куни" каби тадбирлар эса ушбу масъулиятни англаб етишга, ўзаро мулоқот ва фикр алмашишни кучайтиришга хизмат қилади. Бу эса ўз навбатида болаларнинг бахтли ва фаровон келажагига ҳисса қўшади.
Бу тадбир орқали ота-оналар фарзандининг кун давомида қандай шароитларда бўлиши, қандай билим ва кўникмаларни ўзлаштиришини ўз кўзи билан кўриб, тасаввур ҳосил қилдилар ва ҳамкорлик учун мактабгача таълим муассасаси маъмуриятига миннатдорлик изҳор қилдилар.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
