TUMAN TIBBIYoT BIRLAShMASIDA MUSTAQILLIKNING 34 YILLIGI KENG NIShONLANDI

Mamlakatimiz mustaqilligining 34 yilligini xalqimiz katta shodiyonalar bilan nishonladi. Mehnat jamoalarida, jamoat tashkilotlarida xalqimiz tomonidan 34-yil davomida erishilgan yutuqlar, keng miqyosli bunyodkorlik ishlari, oʻz ish faoliyatlari jarayonida yuqori natijalarga erishayotgan yurtdoshlarimiz mehnatlari eʼtirof etilib, ularga bayram sovgʻalari topshirildi.

Amudaryo tumani Tibbiyot birlashmasining tantanalar zalida Tibbiyot birlashmasi tasarrufidagi tuman markaziy shifoxonasi boʻlimlari, Koʻp tarmoqli markaziy poliklinika, Oilaviy poliklinikalar va Oilaviy shifokorlik punktlari xodimlari ishtirokida oʻtkazilgan Mustaqillikning 34 yilligi bayram tadbiri birlashma mehnat jamoasi uchun bir umr esda qolarli darajada yorqin taassurotlarga boy boʻldi va Mustaqillikning 34 yilligi shodiyonalari qoʻshaloq bayramga aylanib ketdi. Shu kuni Oʻzbekiston Kasaba uyushmalari qoʻmitasi tashkil topganligining 120 yilligi ham keng nishonlandi.

Tantanali bayram tadbirini Tibbiyot birlashmasi bosh shifokori Shuhrat Jumaniyozov ochdi va barchani eng ulugʻ va eng aziz bayram bilan samimiy tabrikladi. Shu bilan birga, Mustaqillik yillarida mamlakatimiz tibbiyot tizimida amalga oshirilgan islohotlar, bemorlar va shifokorlar uchun yaratilayotgan keng imkoniyatlar, sohada olib borilayotgan katta bunyodkorlik ishlari, shu barobarida tumanimiz tibbiyoti sohasidagi oʻzgarishlar, yangilanishlar, tobora zamonaviy qiyofa kasb etayotgan tibbiy inshootlar, barcha sharoitlarga ega, zamon talablari darajasida bunyod etilgan tibbiy muassasalar xususida batafsil soʻz yuritdi.

Shuningdek, tadbirda soʻzga chiqqan Birlashma kasaba uyushmasi qoʻmitasi raisi Ibodulla Nurimbetov va boshqalar Birlashma xodimlarini qoʻshaloq bayram bilan muborakbod etib, uzoq yillar oʻzlari bilan yelkama-yelka ishlab, xalq salomatligini saqlashdek ezgu vazifani ado etishda fidoyilik namunalarini koʻrsatgan aziz ustozlari bilan bogʻliq xotiralarni yodga oldilar. Ular Birlashma kasaba uyushmasi tomonidan inson omiliga koʻrsatilayotgan yuksak eʼtibor va ragʻbatdan mamnun ekanliklarini bildirdilar.

Shundan soʻng, Tibbiyot Birlashmasi kasaba uyushmasi qoʻmitasi raisi Ibodulla Nurimbetov tibbiyot xodimlari oʻrtasidagi sport targʻiboti tadbirlarida faol ishtirok etish orqali fuqarolarni “Salomatlik uchun ming qadam”, “Salomatlik sayillari” kabi ommaviy sport tadbirlariga jalb qilish borasidagi xizmatlari, shuningdek, tibbiyot xodimlari ishtirokidagi turli sport musobaqalarida qatnashib, tuman va Qoraqalpogʻiston miqyosida faxrli oʻrinlarni egallagan shifokor-sportchilarga Tibbiyot birlashmasi kasaba uyushma qoʻmitasining esdalik sovgʻalarini topshirdi.

Jumladan, shifokorlar oʻrtasida shaxmat sporti boʻyicha oʻtkazilgan musobaqaning Qoraqalpogʻiston Respublikasi bosqichida 1-oʻrin, mazkur musobaqaning Oʻzbekiston Respublikasi bosqichida 3-oʻrin gʻolibi, Koʻp tarmoqli markaziy poliklinikaning quloq, tomoq, burun kasalliklari boʻyicha shifokori J. Erimbetov, stol tennisi boʻyicha Qoraqalpogʻistonda 1-oʻrin, Oʻzbekiston miqyosida faxrli 2-oʻrinni egallagan birlashma bosh hisobchisi A. Yoʻldoshev, mahoratli shaxmatchi hamshira Maftuna Davlatboyeva, shashka boʻyicha Qoraqalpogʻiston Respublikasi gʻolibi Hamro Vafoyev va boshqalar, jami 25 nafar sportchi shifokorlar va sport targʻibotchilari munosib ragʻbatlantirildi.

Bundan tashqari, Tibbiyot birlashmasi ishchi-xodimlarining joriy oʻquv yilida umumtaʼlim maktablarining 1-sinfiga boradigan 90 nafar farzandlariga kasaba uyushma qoʻmitasi tomonidan oʻquv anjomlari toʻplami sovgʻa qilindi.

Taqdirlash marosimidan soʻng bayram shodiyonalari koʻtarinki ruhda davom etdi. Unda 29-sonli bolalar musiqa va sanʼat maktabining sanʼatsevar yoshlari tomonidan tayyorlangan adabiy-musiqiy kontsert dasturi namoyish etildi. Biri-biridan dilbar navolar, kuy-qoʻshiqlar ijrosi tadbir ishtirokchilari qalbiga olam-olam zavq bagʻishladi.

ROBIYa YOʻLDOShEVA.