Korruptsiyaga qarshi kurashishda nodavlat notijorat tashkilotlari faolligi oshmoqda

Bugungi kunda Oʻzbekiston taraqqiyotning yangi bosqichiga qadam qoʻyar ekan, mamlakatda amalga oshirilayotgan keng koʻlamli islohotlarning muvaffaqiyatini taʼminlashda korruptsiyaga qarshi murosasiz kurash muhim ahamiyat kasb etmoqda. Korruptsiya illatining har qanday koʻrinishi nafaqat jamiyat rivojiga, balki davlatning xalqaro nufuziga ham salbiy taʼsir koʻrsatishini inobatga olgan holda, unga qarshi kurashda davlat organlari bilan bir qatorda fuqarolik jamiyati institutlari, xususan, nodavlat notijorat tashkilotlarining faol ishtirokini taʼminlashga alohida eʼtibor qaratilmoqda.

Bub oradagi ishlarni yanada jadallashtirish maqsadida Qoraqalpogʻiston Respublikasi Joʻqorgʻi Kengesining Sud-huquq masalalari va korruptsiyaga qarshi kurashish qoʻmitasi raisi tomonidan tasdiqlangan “Yoʻl-xaritasi”da korruptsiyaga qarshi kurashda faollik koʻrsatayotgan nodavlat notijorat tashkilotlarini oʻrtasida tanlov tashkil etish va gʻoliblarni mahalliy byudjet hisobidan ragʻbatlantirish vazifasi koʻzda tutilgan edi.

Mazkur vazifalar ijrosini taʼminlash doirasida joriy yilning 21-avgust kuni Oʻzbekiston nodavlat notijorat tashkilotlari Milliy Assotsiatsiyasining Qoraqalpogʻiston Respublikasi hududiy boʻlinmasi tashabbusi bilan Qoraqalpogʻiston Respublikasi Joʻqorgʻi Kengesi, Prokuraturasi va Adliya vazirligi hamkorligida onlayn test tanlovi tashkil etildi. Berdaq nomidagi Qoraqalpoq davlat universitetida “Korruptsiyaga qarshi kurashda faol nodavlat notijorat tashkilotlari – adolatli jamiyat poydevori" mavzusida tashkil qilingan tanlovning asosiy maqsadi uchinchi sektor vakillarining korruptsiyaga qarshi kurashish sohasidagi bilimlarini sinovdan oʻtkazish, ularning bu boradagi faolligini oshirish va ilgʻor tajribalarni ommalashtirishdan iborat.

Tanlov yakunlariga koʻra, oʻzlarining professional faoliyati, jamoatchilikni jalb qilishdagi samaradorligi va korruptsiyaga qarshi tadbirlardagi faol ishtiroki bilan ajralib turgan 5 ta nodavlat notijorat tashkiloti gʻolib deb topildi. Ularning har biri 1 mln soʻmdan, jami 5 mln soʻm miqdoridagi pul mukofoti bilan taqdirlandi. Bundan tashqari, Korruptsiyaga qarshi kurashish hududiy kengashining ish-rejasi doirasida jamoatchilik nazorati tadbirlarida yuqori faollik koʻrsatgan yana 5 ta nodavlat notijorat tashkilotlari vakillari ham eʼtirof etilib, ularning ham har biriga 1 mln soʻmdan, jami 5 mln soʻm pul mukofotlarining sertifikatlari. Bu kabi ragʻbatlantirish choralari nodavlat notijorat tashkilotlarining kelgusidagi faoliyati uchun muhim turtki boʻlishi shubhasiz.

Jamoatchilik nazoratini olib borishda nodavlat notijorat tashkilotlarining rolini yanada kuchaytirish, joylarda korruptsiya holatlarini kompleks oʻrganish va yuzaga kelayotgan muammolarni bartaraf etish boʻyicha asoslantirilgan takliflar ishlab chiqish bugungi kunning dolzarb vazifasidir.

Nodavlat notijorat tashkilotlari tomonidan taqdim etilgan takliflar kelgusida qonun loyihalarini tayyorlashda, hukumat qarorlari va dasturlarini ishlab chiqishda muhim manba boʻlib xizmat qiladi. Qoraqalpogʻistondagi ushbu tashabbus korruptsiyaga qarshi kurashda davlat va fuqarolik jamiyati hamkorligining yorqin namunasi boʻldi.