Qishloq xoʻjaligi vaziri ishtirokida oʻtkazilgan respublika miqyosidagi sayyor qabulda fermerlar va klaster vakillarining muammolari joyida hal etildi

Qishloq xoʻjaligi mamlakatimiz iqtisodiyotida strategik ahamiyatga ega soha hisoblanadi. Ayniqsa, Qoraqalpogʻiston hududida bu yoʻnalish aholining barqaror daromad manbai, oziq-ovqat xavfsizligining kafolati hamdir. Shu bois, sohada samaradorlikni oshirish, fermer va dehqonlarning tashabbuslarini qoʻllab-quvvatlash, ularning muammolarini tezkorlik bilan hal etish davlat siyosatining ustuvor yoʻnalishlaridan biri boʻlib kelmoqda.

Shu maqsadda, joriy yil 12-avgust kuni Oʻzbekiston Respublikasi Qishloq xoʻjaligi vaziri Ibrohim Abdurahmonov rahbarligida Amudaryo tumani Qilichboy ovuli hududidagi “Amirxon” fermer xoʻjaligi dala shiyponida muhim yigʻilish boʻlib oʻtdi. Tadbirda janubiy hududlarda agrar sohada yechimini kutayotgan masalalarga amaliy yechim topish hamda vertikal boshqaruv tizimi samaradorligini oshirish masalalari atroflicha muhokama qilindi.

Yigʻilishda Qoraqalpogʻiston Respublikasi Vazirlar Kengashi Raisining qishloq va suv xoʻjaligi masalalari boʻyicha oʻrinbosari Shuhrat Teshayev, respublika boʻyicha barcha tuman hokimlarining soha boʻyicha oʻrinbosarlari, vazirlik tizimidagi tashkilot rahbarlari, sohaga aloqador mutasaddilar, shuningdek, toʻgʻridan-toʻgʻri ishlab chiqarishda faol boʻlgan fermerlar, dehqonlar va klaster rahbarlari ishtirok etdilar.

Vazir Ibrohim Abdurahmonov oʻz nutqida soʻnggi yillarda davlatimiz tomonidan Qoraqalpogʻiston qishloq xoʻjaligi sohasini rivojlantirish uchun yaratilayotgan keng imkoniyatlarga alohida toʻxtaldi. Jumladan, imtiyozli kreditlar ajratish, subsidiya tizimini takomillashtirish, yer ajratishdagi yangiliklar hamda suv resurslaridan oqilona foydalanish imkoniyatlari haqida batafsil maʼlumot berdi.

Shuningdek, yigʻilishda soʻzga chiqqan Shuhrat Teshayev respublikada qishloq xoʻjaligi sohasini rivojlantirish yoʻlida amalga oshirilayotgan ishlar, kiritilayotgan yangiliklar va tizimdagi oʻzgarishlar haqida toʻxtaldi. U hududlarda zamonaviy sugʻorish texnologiyalarini joriy etish, eksport salohiyatini oshirish, ichki bozorni sifatli mahsulotlar bilan taʼminlash hamda fermer xoʻjaliklari faoliyatini qoʻllab-quvvatlash borasida olib borilayotgan keng koʻlamli ishlarni taʼkidladi. Shu bilan birga, dehqon va fermerlarning tashabbuslarini ragʻbatlantirish, ularga ilmiy asoslangan agrotexnik tavsiyalar yetkazish tizimini kuchaytirish boʻyicha qilinayotgan ishlarga eʼtibor qaratdi.

Yigʻilish doirasida tashkil etilgan sayyor qabul davomida fermer va klaster vakillari oʻz murojaatlari bilan chiqishdi. Yer ajratilishi, sugʻorish imkoniyatlarini kengaytirish, subsidiya va kredit masalalari, shuningdek, sohaga oid huquqiy masalalar boʻyicha kelib tushgan murojaatlar mutasaddilar ishtirokida joyida ijobiy hal etildi. Qolgan masalalar yuzasidan esa masʼullarga aniq muddatlar belgilangan topshiriqlar berildi.

Xulosa oʻrnida aytish mumkinki, mazkur yigʻilish va sayyor qabul qishloq xoʻjaligida boshqaruv tizimini zamonaviylashtirish, ochiq muloqotni yoʻlga qoʻyish va muammolarni joyida hal etish yoʻlidagi muhim qadam boʻldi. Bu jarayon agrar sohani yanada rivojlantirish, faol fermerlarni qoʻllab-quvvatlash hamda tizimda oshkoralikni taʼminlashga xizmat qiladi. Eng muhimi, bu kabi uchrashuvlar fermer va dehqonlarda ishonch, tashabbuskorlik hamda mehnatga yangicha yondashuv hissini mustahkamlaydi.

Charos Arslonova, tuman hokimligining Axborot xizmati rahbari.