14 loyihaga salkam 1,5 mlrd soʻm: grant tanlovi gʻoliblariga sertifikatlar topshirildi

17-iyul kuni Qoraqalpogʻiston Respublikasi Joʻqorgʻi Kengesi binosida Oʻzbekiston Respublikasi Oliy Majlisi huzuridagi Fuqarolik jamiyati institutlarini qoʻllab-quvvatlash jamoat fondi va mazkur fondning Qoraqalpogʻiston boʻlinmasi tomonidan eʼlon qilingan davlat grantlari tanlovining gʻoliblariga sertifikatlarni topshirish marosimi boʻlib oʻtdi.

Tadbir avvalida ommaviy axborot vositalari vakillari uchun matbuot anjumani tashkil qilindi. Matbuot anjumanida Jamoat fondining Qoraqalpogʻiston Respublikasi hududiy boʻlinmasi rahbari Paraxat Turdimuratov fond tomonidan eʼlon qilingan davlat ijtimoiy buyurtmalari, kelgusida rejalashtirilgan grant tanlovlarining yoʻnalishlari hamda tanlovda qatnashish shartlari haqida batafsil maʼlumotlar berdi.

Jumladan, madaniy meros va turizm sohalarini rivojlantirish boʻyicha Qoraqalpogʻiston Respublikasi Vazirlar Kengashining davlat ijtimoiy buyurtmalari boʻyicha eʼlon qilingan tashlovda fuqarolik jamiyati institutlari ishtirok etishi mumkin. Ushbu loyihalarini amalga oshirish uchun jami 2,5 milliard soʻm mablagʻ ajratilishi rejalashtirilgan.

Shundan keyin grant tanlovi gʻoliblariga sertifikatlarni topshirish marosimi boshlandi. Tadbirda Qoraqalpogʻiston Respublikasi Joʻqorgʻi Kengesi Raisining oʻrinbosari Rustam Saparbayev, Joʻqorgʻi Kengesning qoʻmita boshligʻi Sharapat Otemisov va boshqalar soʻzga chiqib, Prezidentimizning 2024-yil 26-avgustdagi farmoni davlat va jamiyat hayotida fuqarolik jamiyati institutlarining faolligini yanada oshirishga xizmat qilayotganini qayd etdi.

Hududlarda saqlanib qolayotgan muammolarni fuqarolik jamiyati institutlari bilan hamkorlikda hal etish, ularning tashabbuslarini amalga oshirishga koʻmaklashish maqsadida joriy yilda Parlament komissiyasi aʼzolari va Jamoat fondi vakillaridan iborat ishchi guruh hududlarda boʻlib, ijtimoiy ahamiyatga ega muammolarni aniqlagan va ushbu muammolarning yechimiga qaratilgan davlat granti tanlovi eʼlon qilingan edi.

Aholining bandligini taʼminlash, ijtimoiy himoya va sogʻliqni saqlash, atrof-muhit va sanitariya-gigiyena sharoitini yaxshilash, taʼlim, madaniyat va sportni rivojlantirish, sogʻlom turmush tarzini joriy etish, korruptsiyaga qarshi kurashish kabi yoʻnalishlarni qamrab olgan grant tanloviga fuqarolik jamiyati institutlaridan koʻplab loyihalar kelib tushdi.

Jumladan, Qoraqalpogʻistonda faoliyat yurituvchi fuqarolik jamiyati institutlaridan Oliy Majlis huzuridagi Jamoatchilik fondi tomonidan eʼlon qilingan tanlovga 64 ta, Jamoatchilik fondining Qoraqalpogʻiston Respublikasi boʻlimi tomonidan eʼlon qilingan tanlovga esa 40 ta tashkilot maxsus platforma orqali oʻz loyihalarini taqdim qilgan.

Parlament komissiyasi tomonidan Qoraqalpogʻiston Respublikasi kesimida 14 loyiha gʻolib deb topildi va loyihalarga jami 1 mlrd 456 mln soʻm mablagʻ ajratildi.

Tadbir davomida grant tanlovi gʻoliblariga maxsus sertifikatlar tantanali tarzda topshirildi.