Chegara himoyachilari uchun maʼdaniy-maʼrifiy tadbir tashkil etildi
Sanʼat inson qalbiga nur bagʻishlaydi, ruhini yuksaltirib, maʼnaviy dunyosiga ijobiy taʼsir koʻrsatadi. Ayniqsa, kuy va soʻz uygʻunligida namoyon boʻladigan ijod — inson ruhiyatini yuksaltiruvchi beqiyos qudratdir. Madaniyat inson hayotida chuqur maʼnoga ega boʻlib, har qanday sharoitda ham yaxshilik va ezgulikka chorlaydi. Shu jihatdan, mamlakatimizning chegaraoldi hududlarida xizmat olib borayotgan yurt posbonlari uchun madaniy-maʼnaviy tadbirlarning tashkil etilishi muhim ahamiyat kasb etadi.
Oʻzbekiston Respublikasi Davlat xavfsizlik xizmati Chegara qoʻshinlari Ashula va raqs ansambli tomonidan chegaraoldi hududlarda xizmat olib borayotgan harbiylar hamda mahalliy aholi uchun kontsert dasturlari muntazam ravishda oʻtkazib kelinmoqda.
Shu kabi tadbirlardan biri yaqinda Qilichboy ovulidagi Madaniyat markazi binosida boʻlib oʻtdi. Unda harbiy xizmatchilar, ularning oila aʼzolari, oddiy askarlar, mahalliy aholi va yoshlar faol ishtirok etdi. Tadbirning asosiy maqsadi — chegara hududida xizmat qilayotgan harbiylarning maʼnaviy olamini boyitish, ularda Vatanga sadoqat, masʼuliyat va jangovar shaylik tuygʻusini mustahkamlash, shu bilan birga, madaniy hordiq chiqarish imkonini yaratishdan iborat.
Tadbir davomida soʻzga chiqqan masʼullar tomonidan Davlat xavfsizlik xizmati Chegara qoʻshinlari Ashula va raqs ansamblining faoliyati alohida eʼtirof etildi. Mazkur ijodiy jamoa oʻz faoliyati davomida mamlakatimizning eng olis hududlarida xizmat olib borayotgan, davlat chegaralari daxlsizligini taʼminlayotgan jasur oʻgʻlonlarga jangovar ruh bagʻishlash, ularda vatanparvarlik tuygʻularini mustahkamlashda munosib hissa qoʻshayotgani taʼkidlandi.
Ansambl ijrosidagi milliy va zamonaviy kuy-qoʻshiqlar, taniqli sanʼatkorlar, yosh ijodkorlar va soʻz ustalari ishtirokidagi chiqishlar tadbirga tantanavorlik bagʻishladi. Ayniqsa, vatanparvarlik ruhida yangragan kuy-qoʻshiqlar ishtirokchilar qalbida unutilmas taassurot qoldirdi.
Kontsert dasturi chegara hududida xizmat qilayotgan harbiylar, ularning yaqinlari va mahalliy aholi uchun madaniy hordiq chiqarish, maʼnaviy olamini boyitishga xizmat qildi. Shuningdek, tadbir doirasida vatanparvarlik targʻibotiga qaratilgan ochiq muloqotlar, savol-javoblar ham tashkil etildi.
Ushbu muloqotlar orqali yoshlar harbiy xizmatning muqaddas burch ekanini yanada chuqurroq angladilar. Vatanga sadoqat va fidoyilik, milliy armiyamizga hurmat kabi yuksak tuygʻular qalblarida yanada mustahkamlandi.
Darhaqiqat, sanʼat qalblarni bogʻlaydi. Chegara himoyachilari uchun tashkil etilayotgan bunday tadbirlar nafaqat madaniy hordiq, balki Vatanga muhabbat va sadoqat tuygʻularini mustahkamlovchi muhim vositadir. Chegara qoʻshinlari Ashula va raqs ansambli ijrosida yaratilayotgan badiiy asarlar, vatanparvarlik ruhidagi kuy va raqslar xalqimiz gʻururi, jasorati va mustaqilligimizning haqiqiy ifodasi sanaladi.
Ushbu joʻshqin sadolar Ona Vatanimizning muqaddas sarhadlari uzra abadiy jaranglab tursin!
Shohzod Qurbonboyev tayyorladi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
