Tuman kichik fan olimpiadasi gʻolib va sovrindorlari munosib taqdirlandi

Mamlakatimizda yoshlar iqtidorini rivojlantirish, ularning intellektual salohiyatini namoyon etishiga keng yoʻl ochib berishga alohida eʼtibor qaratilmoqda. Ayniqsa, Prezidentimiz tashabbusi bilan joriy etilgan “Dolzarb 90 kun” loyihasi doirasida mamlakatimizning barcha hududlarida oʻquvchi-yoshlar uchun turli yoʻnalishlarda tanlov va musobaqalar keng koʻlamda tashkil etilmoqda.

Ushbu tashabbus doirasida yoshlarning ilm-fanga boʻlgan qiziqishini oshirish va ularni ragʻbatlantirish maqsadida Amudaryo tumani Maktabgacha va maktab taʼlimi boʻlimi hamda NEWBRIDGE oʻquv markazi hamkorligida 3–4 hamda 5–6-sinf oʻquvchilari oʻrtasida ingliz tili va matematika fanlari boʻyicha kichik fan olimpiadasi tashkil etildi.

Mazkur olimpiada 9-iyundan 4-iyulga qadar boʻlib oʻtdi. Unda 3–4-sinflardan 250 nafardan ziyod va 5–6-sinflardan 180 nafardan ortiq oʻquvchi ishtirok etdi. Olimpiada ishtirokchilarining bilimlarini aniqlash va fanga boʻlgan qiziqishlarini baholash maqsadida adolat va xolislik mezonlari asosida oʻtkazildi.

Yaqinda mazkur olimpiada gʻolib va sovrindorlarini taqdirlash marosimi tashkil etildi. Tadbirda tuman Maktabgacha va maktab taʼlimi boʻlimi boshligʻi Yalgʻash Shomuradov, boʻlim metodisti Rayhon Yakubova, NEWBRIDGE oʻquv markazi direktori Joʻrabek Gulmirzayev, oʻquvchilar hamda ularning ota-onalari ishtirok etdilar.

Tadbirda boʻlim boshligʻi Yalgʻash Shomuradov soʻzga chiqib, gʻolib va sovrindor oʻquvchilarni samimiy muborakbod etdi. Shuningdek, mazkur olimpiada yosh avlodda fanga boʻlgan qiziqishni yanada oshirish, ularni ijodiy va mantiqiy fikrlashga undashda muhim ahamiyat kasb etishi alohida taʼkidlandi. Qolaversa, kelgusida bu kabi tanlovlar koʻlamini yanada kengaytirish maqsad qilingani qayd etildi.

Bellashuvda gʻoliblikni qoʻlga kiritgan oʻquvchilar tuman hokimligi va tuman Maktabgacha va maktab taʼlimi boʻlimi tomonidan diplom va esdalik sovgʻalari bilan taqdirlandilar. Shu bilan birga, tadbir doirasida NEWBRIDGE oʻquv markazi tomonidan gʻolib oʻquvchilar uchun moddiy ragʻbatlar ham taqdim etildi.

Xususan, 1-oʻrinni egallagan ishtirokchilarga 5 million soʻmlik, 2-oʻrin sohiblariga 3 million soʻmlik va 3-oʻrinni qoʻlga kiritgan oʻquvchilarga 2 million soʻmlik oʻquv kurslari uchun vaucherlar sovgʻa qilindi. Ushbu ragʻbatlar orqali yoshlarning taʼlimga boʻlgan qiziqishini yanada oshirish, ularning bilim olishga boʻlgan intilishini kuchaytirish hamda iqtidorli yoshlarni moddiy va maʼnaviy qoʻllab-quvvatlash koʻzda tutilgan.

Bundan tashqari, olimpiadada faol ishtirok etgan va yuqori natija koʻrsatgan 10 nafar iqtidorli oʻquvchiga maxsus sertifikatlar hamda 4 oy mobaynida oʻquv kurslari uchun 50 foizlik chegirma taqdim etildi.

Bu kabi tadbirlar oʻquvchi-yoshlarda aniq fanlarga boʻlgan qiziqishni oshirish, ularning salohiyatini toʻlaqonli namoyon etish, bilim va qobiliyatlarini rivojlantirishga xizmat qiladi. Shu bilan bir qatorda, bu kabi tanlovlar orqali iqtidorli oʻquvchilar saralab olinib, ular mamlakat miqyosda oʻtkaziladigan fan olimpiadalarida ishtirok etish uchun tayyorlab boriladi. Bu esa, oʻz navbatida, tumanimiz oʻquvchilarining mamlakat miqyosidagi tanlovlarda faol ishtiroki uchun zamin yaratadi.

“Dolzarb 90 kun” loyihasi doirasida amalga oshirilayotgan bu kabi tashabbuslar orqali yosh avlodning taʼlim-tarbiyasiga qaratilayotgan eʼtibor nafaqat ularning kelajagi, balki mamlakatimiz taraqqiyotining mustahkam poydevori hisoblanadi.

Rayhon Yakubova, tuman Maktabgacha va maktab taʼlimi boʻlimining Maktablar faoliyatini muvofiqlashtirish shuʼbasi metodisti.