Nogironligi boʻlgan shaxslar bandligini taʼminlagan tadbirkorlarga subsidiya ajratiladi

Jamiyatda ijtimoiy tenglikni taʼminlash va mehnat bozorida imkoniyati cheklangan insonlarning ishtirokiga keng yoʻl ochish maqsadida mamlakatimizda muhim huquqiy hujjat qabul qilindi. Hukumatning 2025-yil 1-iyuldagi tegishli qarori bilan “Nogironligi boʻlgan shaxslar bandligini taʼminlashga koʻmaklashish, ularning mehnat faoliyatini qoʻllab-quvvatlash va ragʻbatlantirish tartibi toʻgʻrisida”gi nizom tasdiqlandi.

Ushbu nizom nogironligi boʻlgan shaxslarni ish bilan taʼminlashni amalga oshirayotgan tadbirkorlik subʼektlarini va xususiy bandlik agentliklarini qoʻllab-quvvatlashning aniq va tizimli mexanizmlarini belgilab berdi. Endilikda bunday faoliyatni amalga oshirayotgan tadbirkorlar bandlikka koʻmaklashish va ish joylarini moslashtirish uchun subsidiya olish huquqiga ega boʻladi.

Mazkur chora-tadbirlarni samarali tashkil etish maqsadida “Nogironligi boʻlgan shaxslar bandligiga koʻmaklashish elektron reyestri” axborot moduli yuritiladi. Bu reyestr orqali himoyaga muhtoj shaxslarning roʻyxati, ish beruvchilar va amalga oshirilayotgan qoʻllab-quvvatlash choralari elektron ravishda baholab boriladi.

Ushbu subsidiya quyidagi talablarga javob beradigan tadbirkorlarga beriladi:

– Elektron reyestrda roʻyxatda turgan I yoki II guruh nogironligi boʻlgan shaxsni kamida 3 oy davomida rasmiy va uzluksiz ish bilan taʼminlagan;

– Har oyda ushbu shaxsga belgilangan mehnatga haq toʻlashning eng kam miqdorining 2 baravaridan kam boʻlmagan ish haqi toʻlagan.

Bu tartib nafaqat ish beruvchilarni ijtimoiy masʼuliyatga undaydi, balki nogironligi boʻlgan fuqarolarning iqtisodiy faolligini ham oshirishga xizmat qiladi.

Ish joylarini moslashtirish subsidiyasi esa I va (yoki) II guruh nogironligi boʻlgan shaxslar uchun surdotarjimon, psixolog yoki hamrohlik xizmatini tashkil etgan tadbirkorlarga 50 million soʻmgacha miqdorda beriladi.

Subsidiyalar miqdori BHM (bazaviy hisoblash miqdori) asosida hisoblanadi:

– Surdotarjimon xizmati uchun – BHMning 8 baravari;

– Psixolog xizmati uchun – BHMning 10 baravari;

– Hamrohlik xizmati uchun – BHMning 5 baravari.

Tadbirkorlar ushbu subsidiyalarga daʼvogarlik qilish uchun “Yagona milliy ijtimoiy himoya” axborot tizimi orqali yoki YaIDXP (my.gov.uz) portalidagi elektron soʻrovnomani toʻldirgan holda ariza berishlari mumkin. Bu jarayon avtomatlashtirilgan boʻlib, ochiqlik va shaffoflikni taʼminlashga xizmat qiladi.

Shohzod Qurbonboyev tayyorladi.