Nukus shahrida “Toza hudud” aktsiyasi oʻtkazildi

Bugungi kunda mamlakatimizda ekologik barqarorlikni taʼminlash, aholining atrof-muhitga boʻlgan munosabatini oʻzgartirish va tabiat holatini yanada yaxshilash maqsadida keng koʻlamli tadbirlar amalga oshirilmoqda. Prezidentimiz tashabbusi bilan hayotga tatbiq etilayotgan “Yashil makon” umummilliy loyihasi aynan shu ezgu maqsadlarga xizmat qilmoqda. Ushbu loyiha doirasida “Yangi Oʻzbekiston – yangi ekomakon” shiori asosida koʻkalamzorlashtirish va obodonlashtirish ishlari izchil yoʻlga qoʻyilgan.

Bunday tashabbuslar orqali jamiyatda ekologik madaniyatni shakllantirish, tabiatga eʼtibor va ehtiromni qaror toptirishga erishilmoqda. Yurtimiz boʻylab minglab faollar, turli tashkilotlar va yoshlar ushbu tadbirlarda faol ishtirok etib, xayrli ishlarga oʻz hissasini qoʻshmoqda.

Shu maqsadda Oliy Majlis huzuridagi Jamoat fondining Qoraqalpogʻiston Respublikasi boʻlinmasi tashabbusi bilan Nukus shahrida “Toza hudud” aktsiyasi tashkil etildi. Tadbir Nukus shahar obodonlashtirish boshqarmasi hamda Oʻzbekiston Ekologiya partiyasining Qoraqalpogʻiston Respublikasi boʻlinmasi hamkorligida oʻtkazildi.

Aktsiya doirasida “Doʻstlik” kanali boʻyidagi dam olish hududlari, maydonlar va unga tutash koʻchalar chiqindilar hamda begona oʻtlardan tozalandi. Ekin maydonlari koʻchat ekishga tayyorlandi, mavjud daraxtlarga shakl berilib, oqlandi. Shuningdek, chiqindilar maxsus texnikalar yordamida belgilangan joylarga tashib chiqarildi. Bu ishlar shahar infratuzilmasi va tabiiy muhit oʻrtasidagi muvozanatni saqlashga xizmat qilishi bilan ahamiyatlidir.

Taʼkidlash joizki, soʻnggi yillarda iqlim oʻzgarishi, oʻrtacha yillik haroratning oshib borishi, mavsumiy qurgʻoqchilik kuchayishi kuzatilmoqda. Bu esa Orol dengizining qurishi mintaqadagi iqlimga salbiy taʼsir koʻrsatayotganidan dalolatdir. Orol falokati natijasida yoz faslidagi issiq va qurgʻoqchilik kuchayadi, qish fasli esa yanada sovuq va qahraton boʻlib, iqlimning kontinental xususiyati yanada chuqurlashdi.

Mazkur salbiy taʼsirlarni yumshatish maqsadida davlatimiz tomonidan qator chora-tadbirlar amalga oshirilmoqda. Xususan, Orol dengizining qurigan tubida qoʻshimcha 500 ming gektar maydonda yashil hududlar barpo etish, 2026-yilgacha ularning umumiy hajmini 2,5 million gektarga – hududning 78 foiziga yetkazish rejalashtirilgan. Shuningdek, Orolboʻyida “Yashil iqlim” va Global ekologik jamgʻarmalar koʻmagida bioxilma-xillik, iqlim oʻzgarishi va tuproq yemirilishining oldini olishga qaratilgan loyihalar amalga oshirilmoqda.

Ekologik targʻibot va amaliyotni uygʻunlashtirgan mazkur tadbirda Qoraqalpogʻiston Respublikasidagi nodavlat notijorat tashkilotlari, fuqarolik jamiyati institutlari hamda mahalliy yoshlar faol ishtirok etdi. Ekofaollar atrof-muhitni tozalash va koʻkalamzorlashtirish ishlarini amalga oshirib, barchaga ibrat boʻldi.

“Toza hudud” aktsiyasi nafaqat shahar koʻchalari va dam olish maskanlarini obodonlashtirish, balki aholi oʻrtasida ekologik madaniyatni yuksaltirishda ham muhim ahamiyat kasb etmoqda. Bunday tadbirlar insonlarda tabiatga nisbatan masʼuliyat hissini kuchaytirib, yashash muhitini yaxshilashga boʻlgan intilishni orttirmoqda.

Shahar va qishloq hududlarini obod qilish, yashil hududlar sonini koʻpaytirish orqali nafaqat tabiat muhofaza qilinadi, balki inson salomatligi va jamiyatning umumiy hayot sifati ham sezilarli darajada yaxshilanadi.

Yurtimiz boʻylab keng koʻlamda oʻtkazilayotgan “Yashil makon” umummilliy loyihasi, “Toza hudud” aktsiyasi kabi tashabbuslar mamlakatimizda ekologik barqarorlikni taʼminlash, sogʻlom muhit yaratish va aholining tabiatga boʻlgan munosabatini tubdan oʻzgartirish yoʻlidagi muhim qadamlardan biridir. Bunday tashabbuslar keng jamoatchilikni birlashtirib, har bir insonni tabiat muhofazasida shaxsan ishtirok etishga undayotgani bilan ahamiyatlidir.

Shohzod Qurbonboyev.