AMUDARYo TUMANIDA RESPUBLIKA FTIZIATRIYa VA PULMONOLOGIYa MARKAZI MUTAXASSISLARI TOMONIDAN SAYYoR TIBBIY KOʻRIK OʻTKAZILDI

Mamlakatimizda aholi salomatligini muhofaza qilish, ayniqsa, aholi oʻrtasida yuqumli kasalliklarga chalinish holatlarining oldini olishga qaratilgan kompleks chora-tadbirlar oʻzining ijobiy samarasini bermoqda. Bu mamlakatimizda oʻrtacha umr koʻrish davriyligining yil sayin oshib, aholi salomatligining mustahkamlanib borayotganida oʻz ifodasini topmoqda. Albatta, bu borada soha vazirligi tomonidan amalga oshirilayotgan amaliy chora-tadbirlarning ahamiyati katta.

Insonning sogʻlom yashashi uning musaffo havodan toʻyib nafas olishini taʼminlovchi oʻpka salomatligiga bogʻliq. Lekin baʼzan inson oʻzi ham bilmagan holda, yuqumli kasalliklar bilan kasallangan yoki oʻpkasi zararlangan, tuberkulyoz, yaʼni sil kasalligiga chalingan bemor bilan birga yashash, muloqotda boʻlish, bemor foydalangan buyumlardan birgalikda foydalanish, sanitariya-gigiyena qoidalariga amal qilmaslik oqibatida oʻzi ham yuqumli kasalliklar tashuvchisiga aylanib qolishi hech gap emas. Shu bois, yuqumli kasalliklar boʻyicha mutaxassis shifokorlar tomonidan tez-tez aholi orasida sayyor tibbiy koʻriklar va uchrashuvlar tashkil etilib, bunday noxush holatlarning oldini olish boʻyicha manzilli tushuntirish va targʻibot tadbirlari oʻtkazilishiga alohida eʼtibor qaratiladi.

Oʻzbekiston Respublikasi Prezidentining 2023-yil 20-yanvardagi “2023-2026-yillarda ftiziatriya va pulmonologiya xizmatini yanada rivojlantirishga qaratilgan chora-tadbirlar toʻgʻrisida”gi Qarori va bu boradagi Sogʻliqni saqlash vazirligining buyrugʻi ijrosini taʼminlash maqsadida Amudaryo tumani Tibbiyot birlashmasiga qarashli 6-sonli Xitoy oilaviy poliklinikasida Respublika Ftiziatriya va pulmonologiya markazining malakali mutaxassislaridan iborat mobil brigadasi tomonidan sayyor koʻrik tashkil etildi. 16-iyun kuni oʻtkazilgan tibbiy koʻrikdan asosiy maqsad aholi oʻrtasida sogʻlom turmush tarzini qaror toptirish, oʻpka salomatligini mustahkamlash, ayniqsa, oʻpka sili boʻyicha xavfli guruhda hisobda turuvchi, yaʼni ushbu kasallikka chalinish ehtimoli yuqori boʻlgan bemorlarni tibbiy koʻrikdan oʻtkazishdir.

Sayyor koʻrik jarayonida Respublika Ftiziatriya va pulmonologiya markazi yetakchi rentgenologi Anar Minajova, Amudaryo tuman Tibbiyot birlashmasi bosh ftiziatri Gulora Abdullayeva, ftiziopediatr Muborak Allamurodova, narkolog-shifokor Bahodir Charshamov, Salomatlik markazi shifokori Tamara Saidovalardan iborat guruh tomonidan sil kasalligi boʻyicha roʻyxatda turuvchi va ushbu kasallikni yuqtirib olishga moyilligi bor boʻlgan, xavfli guruhda hisobda turuvchi fuqarolar salomatligi tibbiy tekshiruvdan oʻtkazilib, har biri bilan alohida tushuntirish ishlari olib borildi.

Maʼlumki, alohida toifadagi kuchli taʼsir qiluvchi moddalarni tibbiyot amaliyotida qoʻllash, saqlash, ularning noqonuniy muomalasini cheklash, jismoniy shaxslar tomonidan Oʻzbekiston Respublikasi hududiga olib kirish, olib chiqish va tranzit oʻtkazish ishlari Vazirlar Mahkamasining 2024-yil 4-oktyabrdagi Qarori asosida tasdiqlangan “Oʻzbekiston Respublikasida alohida toifadagi kuchli taʼsir qiluvchi moddalar muomalasini tartibga solish toʻgʻrisida”gi Nizom asosida tartibga solinadi. Sayyor tibbiy koʻrik jarayonida aholiga mazkur Nizom talablari yuzasidan zarur tushuntirishlar va tavsiyalar berildi. Ayniqsa, kuchli taʼsir qiluvchi "Zaleplon", "Pregabalin", "Tropikamid", "Tsiklopentolat" "Gabapentin" vositalarining oʻsib kelayotgan yosh avlod qoʻliga tushib qolishining oldini olish boʻyicha kerakli tavsiyalar taqdim etildi.

Boʻlib oʻtgan sayyor tibbiy koʻrik aholining yuqumli kasalliklar, ayniqsa, sil kasalligidan saqlanish borasidagi, shuningdek kuchli taʼsir qiluvchi vositalarning inson salomatligiga, ayniqsa, oʻsib kelayotgan yosh avlod miya faoliyatining zararlanishiga olib keluvchi salbiy taʼsiri toʻgʻrisidagi bilim va tushunchalarini mustahkamlab, tibbiy madaniyatini oshirishga xizmat qilgani bilan muhim ahamiyat kasb etdi.

ROBIYa YOʻLDOShEVA.