АМУДАРЁ ТУМАНИДА РЕСПУБЛИКА ФТИЗИАТРИЯ ВА ПУЛЬМОНОЛОГИЯ МАРКАЗИ МУТАХАССИСЛАРИ ТОМОНИДАН САЙЁР ТИББИЙ КЎРИК ЎТКАЗИЛДИ
Мамлакатимизда аҳоли саломатлигини муҳофаза қилиш, айниқса, аҳоли ўртасида юқумли касалликларга чалиниш ҳолатларининг олдини олишга қаратилган комплекс чора-тадбирлар ўзининг ижобий самарасини бермоқда. Бу мамлакатимизда ўртача умр кўриш даврийлигининг йил сайин ошиб, аҳоли саломатлигининг мустаҳкамланиб бораётганида ўз ифодасини топмоқда. Албатта, бу борада соҳа вазирлиги томонидан амалга оширилаётган амалий чора-тадбирларнинг аҳамияти катта.
Инсоннинг соғлом яшаши унинг мусаффо ҳаводан тўйиб нафас олишини таъминловчи ўпка саломатлигига боғлиқ. Лекин баъзан инсон ўзи ҳам билмаган ҳолда, юқумли касалликлар билан касалланган ёки ўпкаси зарарланган, туберкулёз, яъни сил касаллигига чалинган бемор билан бирга яшаш, мулоқотда бўлиш, бемор фойдаланган буюмлардан биргаликда фойдаланиш, санитария-гигиена қоидаларига амал қилмаслик оқибатида ўзи ҳам юқумли касалликлар ташувчисига айланиб қолиши ҳеч гап эмас. Шу боис, юқумли касалликлар бўйича мутахассис шифокорлар томонидан тез-тез аҳоли орасида сайёр тиббий кўриклар ва учрашувлар ташкил этилиб, бундай нохуш ҳолатларнинг олдини олиш бўйича манзилли тушунтириш ва тарғибот тадбирлари ўтказилишига алоҳида эътибор қаратилади.
Ўзбекистон Республикаси Президентининг 2023 йил 20 январдаги “2023-2026 йилларда фтизиатрия ва пульмонология хизматини янада ривожлантиришга қаратилган чора-тадбирлар тўғрисида”ги Қарори ва бу борадаги Соғлиқни сақлаш вазирлигининг буйруғи ижросини таъминлаш мақсадида Амударё тумани Тиббиёт бирлашмасига қарашли 6-сонли Хитой оилавий поликлиникасида Республика Фтизиатрия ва пульмонология марказининг малакали мутахассисларидан иборат мобил бригадаси томонидан сайёр кўрик ташкил этилди. 16 июнь куни ўтказилган тиббий кўрикдан асосий мақсад аҳоли ўртасида соғлом турмуш тарзини қарор топтириш, ўпка саломатлигини мустаҳкамлаш, айниқса, ўпка сили бўйича хавфли гуруҳда ҳисобда турувчи, яъни ушбу касалликка чалиниш эҳтимоли юқори бўлган беморларни тиббий кўрикдан ўтказишдир.
Сайёр кўрик жараёнида Республика Фтизиатрия ва пульмонология маркази етакчи рентгенологи Анар Минажова, Амударё туман Тиббиёт бирлашмаси бош фтизиатри Гулора Абдуллаева, фтизиопедиатр Муборак Алламуродова, нарколог-шифокор Баҳодир Чаршамов, Саломатлик маркази шифокори Тамара Саидовалардан иборат гуруҳ томонидан сил касаллиги бўйича рўйхатда турувчи ва ушбу касалликни юқтириб олишга мойиллиги бор бўлган, хавфли гуруҳда ҳисобда турувчи фуқаролар саломатлиги тиббий текширувдан ўтказилиб, ҳар бири билан алоҳида тушунтириш ишлари олиб борилди.
Маълумки, алоҳида тоифадаги кучли таъсир қилувчи моддаларни тиббиёт амалиётида қўллаш, сақлаш, уларнинг ноқонуний муомаласини чеклаш, жисмоний шахслар томонидан Ўзбекистон Республикаси ҳудудига олиб кириш, олиб чиқиш ва транзит ўтказиш ишлари Вазирлар Маҳкамасининг 2024 йил 4 октябрдаги Қарори асосида тасдиқланган “Ўзбекистон Республикасида алоҳида тоифадаги кучли таъсир қилувчи моддалар муомаласини тартибга солиш тўғрисида”ги Низом асосида тартибга солинади. Сайёр тиббий кўрик жараёнида аҳолига мазкур Низом талаблари юзасидан зарур тушунтиришлар ва тавсиялар берилди. Айниқса, кучли таъсир қилувчи "Залеплон", "Прегабалин", "Тропикамид", "Циклопентолат" "Габапентин" воситаларининг ўсиб келаётган ёш авлод қўлига тушиб қолишининг олдини олиш бўйича керакли тавсиялар тақдим этилди.
Бўлиб ўтган сайёр тиббий кўрик аҳолининг юқумли касалликлар, айниқса, сил касаллигидан сақланиш борасидаги, шунингдек кучли таъсир қилувчи воситаларнинг инсон саломатлигига, айниқса, ўсиб келаётган ёш авлод мия фаолиятининг зарарланишига олиб келувчи салбий таъсири тўғрисидаги билим ва тушунчаларини мустаҳкамлаб, тиббий маданиятини оширишга хизмат қилгани билан муҳим аҳамият касб этди.
РОБИЯ ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
