Nukus shahrida iqlim oʻzgarishi va ekologik barqarorlik boʻyicha xalqaro seminar-trening oʻtkazildi

Soʻnggi yillarda iqlim oʻzgarishi butun dunyoda dolzarb muammoga aylandi. Ushbu jarayon qishloq xoʻjaligi, iqtisodiyot, atrof-muhit va inson salomatligiga salbiy taʼsir koʻrsatmoqda. Ayniqsa, ekologik muvozanatni saqlash va yer hamda suv resurslaridan oqilona foydalanish borasida jiddiy yondashuv talab etilmoqda.

Mana shunday sharoitda, joriy yil 13-iyun kuni Nukus shahridagi “Oq qush” kompleksida “Oʻzbekistonda iqlim oʻzgarishi sharoitida aqlli qishloq xoʻjaligi” mavzusida xalqaro seminar-trening oʻz ishini boshladi. Ikki kun davom etgan mazkur tadbir iqlim oʻzgarishi sharoitida qishloq xoʻjaligini rivojlantirish, ekologik barqarorlikni taʼminlash va zamonaviy, innovatsion yondashuvlar asosida “aqlli qishloq xoʻjaligi”ni joriy etish masalalariga bagʻishlandi.

Seminarning ochilish marosimida Qoraqalpogʻiston Respublikasi Joʻqorgʻi Kengesi raisining oʻrinbosari Rustam Saparbayev soʻzga chiqib, mazkur tadbir mintaqadagi dolzarb muammolarni ilmiy-amaliy yondashuv asosida hal etishda muhim oʻrin tutishi haqida alohida toʻxtalib oʻtdi.

Shuningdek, tadbirda Oʻzbekiston Respublikasi Qishloq xoʻjaligi vaziri oʻrinbosari Alisher Shukurov, Jahon bankining qishloq xoʻjaligi boʻyicha katta iqtisodchisi, doktor Piyerre Gerber, Qishloq xoʻjaligida fan va innovatsiyalar milliy markazi direktori, professor Shodmon Namozov, Toshkent davlat agrar universiteti rektori, professor Narzulla Oblomuradov, Qoraqalpogʻiston qishloq xoʻjaligi va agrotexnologiyalar instituti rektori Berdiyor Joʻllibekovlar ham soʻzga chiqib, iqlim oʻzgarishiga qarshi kurashish, ekologik barqarorlikni taʼminlash va bu sohadagi ilmiy hamkorliklar ahamiyati haqida fikr bildirishdi.

Seminar davomida iqlim oʻzgarishining qishloq xoʻjaligi, bozor iqtisodiyoti, aholi salomatligi, tuproq va ekologik tizimlarga salbiy taʼsiri haqida mutaxassislar oʻz maʼruzalarini taqdim etishdi. Jahon va mahalliy tajribalarga asoslangan holda iqlim oʻzgarishini yumshatish, suv va yer resurslaridan oqilona foydalanish, “aqlli qishloq xoʻjaligi”ni joriy etish borasida amaliy taklif va tavsiyalar muhokama qilindi.

Seminarning ikkinchi kuni — 14-iyun sanasida ishtirokchilar uchun amaliy sayohat tashkil etildi. Qoraqalpogʻiston qishloq xoʻjaligi va agrotexnologiyalar instituti rektori Berdiyor Joʻllibekov boshchiligida ishtirokchilar Moʻynoq tumaniga tashrif buyurishdi. U yerda avvalambor 1990-yillarda qurigan Orol dengizi tubiga ekilgan saksovul maydonlari koʻzdan kechirildi. Mazkur hududdagi oʻsimliklarning oʻsish jarayoniga taʼsir etuvchi salbiy omillar muhokama qilindi.

Shuningdek, Orol tubida tashkil etilgan maxsus ilmiy tadqiqot stantsiyasida olib borilayotgan ishlar bilan yaqindan tanishildi. Olimlar iqlim sharoitining keskin oʻzgaruvchanligiga qaramay, tadqiqotlar izchil olib borilayotganini taʼkidlashdi.

Sayohatning navbatdagi manzili Moʻynoq davlat oʻrmon xoʻjaligi qoshidagi ilmiy tadqiqot boʻlimi boʻldi. Bu yerda hududni koʻkalamzorlashtirish, ekologik barqarorlikni taʼminlash borasida amalga oshirilayotgan ishlar ishtirokchilarda katta qiziqish uygʻotdi.

Shuningdek, Moʻynoq shahrida joylashgan Orol dengizi tarixi muzeyiga tashrif uyushtirildi. Muzeyda bir paytlar dengizda suzgan kemalar, baliqchilarning mehnat qurollari, Orol boʻyida yashagan hayvonot dunyosi, mahalliy sanoat mahsulotlari va boshqa tarixiy yodgorliklar namoyish etildi. Ushbu muzey tadbir ishtirokchilarida katta taassurot qoldirdi.

Mazkur seminar-trening nafaqat tajriba almashish maydoniga aylandi, balki iqlim oʻzgarishi va ekologik muammolarni bartaraf etish boʻyicha xalqaro darajada yechim topishga xizmat qiluvchi muhim platforma boʻldi. Ushbu tadbir iqlim muammolarini hal etishda muloqot, hamkorlik va tajriba almashishning naqadar muhim ekanini yana bir bor tasdiqladi.

Shohzod Qurbonboyev