Amudaryo tumanida ichimlik suvi sifati boʻyicha nazorat tadbirlari oʻtkazilmoqda
Suv — hayot manbai. Aholini toza ichimlik suvi bilan taʼminlash, mavjud manbalarni aniqlash, ularning holatini tahlil qilish va resurslarni oqilona boshqarish bugungi kunda eng dolzarb vazifalardan biridir. Ekologik muvozanatga taʼsir etuvchi salbiy omillar taʼsiri ostida Qoraqalpogʻiston Respublikasida toza ichimlik suviga boʻlgan talab ortib bormoqda. Ayniqsa, yer osti suvlaridan samarali foydalanish masalasi muhim ahamiyat kasb etmoqda.
Shu maqsadda, Amudaryo tumanida ham Hududiy qurilish va uy-joy kommunal xoʻjaligi sohasida nazorat qilish inspektsiyasining ichimlik suvidan oqilona foydalanish va sotishni muvofiqlashtirish hamda oqova suv xizmatlaridan foydalanish boʻlimi mutaxassislari hamda “Qoraqalpoq suv taʼminoti” aktsiyadorlik jamiyatining tuman filiali xodimlari hamkorligida muhim tadbirlar amalga oshirilmoqda. Jumladan, soha masʼullari ishtirokida Boʻz solma mahalla fuqarolar yigʻini hududida joylashgan yer osti suv olish inshootida nazorat va monitoring ishlari olib borildi.
Nazorat tadbiri davomida aholiga yetkazilayotgan suvning sifati, suv manbalari holati va ulardan foydalanish darajasi boʻyicha aniq maʼlumotlar yigʻilib, chuqur tahlil qilindi. Bu esa kelgusida suv taʼminotini yaxshilash, suv zaxiralarini oqilona boshqarish hamda sohadagi muammolarni oʻz vaqtida bartaraf etish imkonini beradi.
Qoraqalpogʻiston Respublikasi ayrim hududlarida ichimlik suvi tanqisligi kuzatilayotgani sababli chuchuklashtirish qurilmalaridan samarali foydalanish masalasi kun tartibidagi muhim vazifalardan biri sifatida belgilangan. Shu bois, mavjud qurilmalardan oqilona foydalanish muhim ahamiyat kasb etmoqda.
Maʼlumotlarga koʻra, hozirda “Qoraqalpoq suv taʼminoti” AJ balansida 143 ta chuchuklashtiruvchi inshoot mavjud. Ularning 68 tasi soatiga 1 kub metr, 75 tasi esa soatiga 8 kub metrdan ortiq quvvatga ega. Ushbu inshootlar asosan chekka hududlarda joylashgan aholi punktlarini toza ichimlik suvi bilan taʼminlashda muhim rol oʻynamoqda.
Yer osti suvlarini muntazam monitoring qilish maqsadida joriy qilingan kuzatuv punktlari orqali suv manbalarining ifloslanishi, zaxiralarning kamayishi yoki suv sathining koʻtarilishi kabi salbiy holatlar haqida tahlillar olib borilmoqda. Bu esa muammolarni oʻz vaqtida aniqlash va ularning oldini olish choralarini koʻrishda asosiy mezon boʻlib xizmat qilmoqda.
Vazirlar Mahkamasining 2019-yil 9-oktyabrdagi “Ayrim hududlarda yer osti suvlaridan oqilona foydalanishni taʼminlash boʻyicha amaliy chora-tadbirlari toʻgʻrisida”gi Qarori ijrosi doirasida joylarda yer osti suvlari resurslarini samarali boshqarish, mavjud manbalarni muhofaza qilish va aholi talabini qondirishga yoʻnaltirilgan dasturlar izchil davom etmoqda.
Shuni taʼkidlash joizki, yer osti suvlaridan oqilona foydalanish nafaqat mavjud zaxiralarni asrab qolish, balki aholini barqaror va xavfsiz ichimlik suvi bilan taʼminlashda muhim ahamiyat kasb etadi. Yer osti suvlaridan oqilona foydalanish, chuchuklashtirish inshootlarining samaradorligini oshirish va monitoring ishlarini kuchaytirish orqali aholining toza ichimlik suviga boʻlgan talabini toʻliq qondirish maqsad qilingan.
Shohzod Qurbonboyev.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
