Амударё туманида ичимлик суви сифати бўйича назорат тадбирлари ўтказилмоқда

Сув — ҳаёт манбаи. Аҳолини тоза ичимлик суви билан таъминлаш, мавжуд манбаларни аниқлаш, уларнинг ҳолатини таҳлил қилиш ва ресурсларни оқилона бошқариш бугунги кунда энг долзарб вазифалардан биридир. Экологик мувозанатга таъсир этувчи салбий омиллар таъсири остида Қорақалпоғистон Республикасида тоза ичимлик сувига бўлган талаб ортиб бормоқда. Айниқса, ер ости сувларидан самарали фойдаланиш масаласи муҳим аҳамият касб этмоқда.

Шу мақсадда, Амударё туманида ҳам Ҳудудий қурилиш ва уй-жой коммунал хўжалиги соҳасида назорат қилиш инспекциясининг ичимлик сувидан оқилона фойдаланиш ва сотишни мувофиқлаштириш ҳамда оқова сув хизматларидан фойдаланиш бўлими мутахассислари ҳамда “Қорақалпоқ сув таъминоти” акциядорлик жамиятининг туман филиали ходимлари ҳамкорлигида муҳим тадбирлар амалга оширилмоқда. Жумладан, соҳа масъуллари иштирокида Бўз солма маҳалла фуқаролар йиғини ҳудудида жойлашган ер ости сув олиш иншоотида назорат ва мониторинг ишлари олиб борилди.

Назорат тадбири давомида аҳолига етказилаётган сувнинг сифати, сув манбалари ҳолати ва улардан фойдаланиш даражаси бўйича аниқ маълумотлар йиғилиб, чуқур таҳлил қилинди. Бу эса келгусида сув таъминотини яхшилаш, сув захираларини оқилона бошқариш ҳамда соҳадаги муаммоларни ўз вақтида бартараф этиш имконини беради.

Қорақалпоғистон Республикаси айрим ҳудудларида ичимлик суви танқислиги кузатилаётгани сабабли чучуклаштириш қурилмаларидан самарали фойдаланиш масаласи кун тартибидаги муҳим вазифалардан бири сифатида белгиланган. Шу боис, мавжуд қурилмалардан оқилона фойдаланиш муҳим аҳамият касб этмоқда.

Маълумотларга кўра, ҳозирда “Қорақалпоқ сув таъминоти” АЖ балансида 143 та чучуклаштирувчи иншоот мавжуд. Уларнинг 68 таси соатига 1 куб метр, 75 таси эса соатига 8 куб метрдан ортиқ қувватга эга. Ушбу иншоотлар асосан чекка ҳудудларда жойлашган аҳоли пунктларини тоза ичимлик суви билан таъминлашда муҳим роль ўйнамоқда.

Ер ости сувларини мунтазам мониторинг қилиш мақсадида жорий қилинган кузатув пунктлари орқали сув манбаларининг ифлосланиши, захираларнинг камайиши ёки сув сатҳининг кўтарилиши каби салбий ҳолатлар ҳақида таҳлиллар олиб борилмоқда. Бу эса муаммоларни ўз вақтида аниқлаш ва уларнинг олдини олиш чораларини кўришда асосий мезон бўлиб хизмат қилмоқда.

Вазирлар Маҳкамасининг 2019 йил 9 октябрдаги “Айрим ҳудудларда ер ости сувларидан оқилона фойдаланишни таъминлаш бўйича амалий чора-тадбирлари тўғрисида”ги Қарори ижроси доирасида жойларда ер ости сувлари ресурсларини самарали бошқариш, мавжуд манбаларни муҳофаза қилиш ва аҳоли талабини қондиришга йўналтирилган дастурлар изчил давом этмоқда.

Шуни таъкидлаш жоизки, ер ости сувларидан оқилона фойдаланиш нафақат мавжуд захираларни асраб қолиш, балки аҳолини барқарор ва хавфсиз ичимлик суви билан таъминлашда муҳим аҳамият касб этади. Ер ости сувларидан оқилона фойдаланиш, чучуклаштириш иншоотларининг самарадорлигини ошириш ва мониторинг ишларини кучайтириш орқали аҳолининг тоза ичимлик сувига бўлган талабини тўлиқ қондириш мақсад қилинган.

Шоҳзод Қурбонбоев.