“Korruptsiya - yoshlar kelajagiga tahdid soluvchi illat” mavzusida tadbir boʻlib oʻtdi

Korruptsiya jamiyat va davlat rivoji uchun xavfli illat sanaladi. U inson huquqlari, qonun ustuvorligi va kelajak avlodning yorugʻ istiqboliga putur yetkazadi. Shu sababli yurtimizda korruptsiyaga qarshi murosasiz va tizimli kurash olib borilmoqda. Ayniqsa, yoshlarning huquqiy ongi va fuqarolik masʼuliyatini yuksaltirish, ularni adolatparvarlik va halollik ruhida tarbiyalash bu borada ustuvor vazifalardan biriga aylangan.

Shu maqsadda Qoraqalpogʻiston qishloq xoʻjaligi va agrotexnologiyalar institutida “Korruptsiya – yoshlar kelajagiga tahdid soluvchi illat” mavzusida maʼnaviy-maʼrifiy tadbir tashkil etildi.

Unda Qoraqalpogʻiston Respublikasi Vazirlar Kengashi huzuridagi Korruptsiyaga qarshi kurashish boʻlimi boshligʻi B.Matmuratov, Bosh prokuratura huzuridagi Iqtisodiy jinoyatlarga qarshi kurashish departamenti Qoraqalpogʻiston Respublikasi boshqarmasi boʻlim boshligʻi R.Sadikov, Qoraqalpogʻiston Respublikasi Oliy taʼlim, fan va innovatsiyalar vazirligining Korruptsiyaga qarshi kurashish boʻlimi boshligʻi M.Xaliyev, institut rektori B.Jollibekov va barcha fakultet dekanlari, professor-oʻqituvchilar, talaba-yoshlar ishtirok etdi.

Tadbirni institut rektori B.Jollibekov kirish soʻzi bilan ochdi va olib bordi. Oʻz nutqida u taʼlim sohasida korruptsiyaga mutlaqo yoʻl qoʻyib boʻlmasligi, bu illat xalq farovonligi uchun amalga oshirilayotgan islohotlarning samaradorligiga jiddiy taʼsir koʻrsatishi, davlat va jamiyat taraqqiyotiga toʻsiq boʻlishi haqida alohida toʻxtalib oʻtdi. Shu munosabat bilan yosh avlod ongida adolat, qonuniylik va halollik tamoyillarini shakllantirish ustuvor vazifa ekani taʼkidlandi.

– Agar taʼlim tizimida shaffoflik, halollik va adolat printsiplari taʼminlanmasa, kelajakdagi rahbarlar, olimlar, muhandislar, fermerlar va turli sohalardagi mutaxassislar orasidan yuksak maʼnaviyatli, vijdonli insonlar yetishib chiqmaydi, – dedi institut rektori.

Tadbir davomida masʼullar tomonidan korruptsiyaning jamiyat rivojiga koʻrsatayotgan salbiy oqibatlari, davlat boshqaruvi, iqtisodiyot va ijtimoiy hayotga keltirayotgan zararli taʼsiri, aholining davlat organlariga boʻlgan ishonchiga salbiy taʼsir koʻrsatayotgani batafsil tahlil etildi.

Xususan, qishloq xoʻjaligi sohasi nafaqat iqtisodiyotning asosiy ustuni, balki aholi turmush darajasi, oziq-ovqat xavfsizligi va mintaqaviy barqarorlikni taʼminlovchi hal qiluvchi tarmoq sifatida alohida oʻrin tutadi. Shu bois, ushbu sohada shaxsiy manfaatlar ustuvorligi, asossiz qarorlar, qonunbuzarlik va masʼuliyatsizlik kabi illatlar keng jamoatchilik ishonchiga ham putur yetkazishi, iqtisodiy barqarorlikni izdan chiqarishi mumkinligi taʼkidlandi.

Tadbir davomida yurtimizda korruptsiyaga qarshi shakllantirilgan institutsional tizim, qabul qilingan meʼyoriy-huquqiy hujjatlar, amalga oshirilayotgan profilaktik chora-tadbirlar haqida atroflicha maʼlumot berildi. Soʻnggi yillarda bu borada Prezident tashabbusi bilan qabul qilingan dasturlar, nazorat tizimlari va jamoatchilik ishtirokini taʼminlashga qaratilgan choralar natijasida mamlakatimizda fuqarolarning huquqiy ongi oshgani, murojaatlar sonining oʻsgani va korruptsiyaga nisbatan murosasiz munosabat shakllanayotgani taʼkidlandi.

Aytish joizki, mazkur uchrashuv Prezident raisligida 2025-yil 5-mart kuni boʻlib oʻtgan kengaytirilgan yigʻilishda berilgan topshiriqlar ijrosini taʼminlash doirasida tashkil etildi.

Tadbir talaba-yoshlar bilan ochiq muloqot, hayotiy misollar va tahlillar asosida oʻtkazilib, ularda huquqiy bilim va faol fuqarolik pozitsiyasini mustahkamlashga xizmat qildi. Chunki aynan yoshlar — ertangi kunning hal qiluvchi kuchi, mamlakat taqdirini belgilaydigan avloddir.

Shohzod Qurbonboyev.