Oila mustahkamligi – jamiyat taraqqiyotining poydevori

Yurtimizda sogʻlom va mustahkam oilalarni shakllantirish, milliy urf-odat va qadriyatlarni keng targʻib qilish maqsadida har yili anʼanaviy tarzda “Ibratli oila” koʻrik-tanlovi oʻtkazilib kelinmoqda. Mazkur tanlov jamiyatda sogʻlom ijtimoiy muhitni mustahkamlash, oila institutini rivojlantirish va namunali oilalarni keng jamoatchilikka namoyish etish borasida muhim ahamiyat kasb etadi.

Joriy yilda ham ushbu tanlov respublika boʻyicha barcha hududlarda yuqori saviyada tashkil etildi. Tanlovda oʻzining mehr-oqibatli, ahil va oʻrnak boʻlishga arzigulik hayot tarzi bilan boshqalarga namuna boʻlayotgan oilalar ishtirok etdilar. Baholash mezonlari sifatida oilaning maʼnaviy-axloqiy muhiti, farzandlar tarbiyasi, ota-onalarning kasbiy faoliyati va jamiyatdagi faolligi kabi jihatlarga alohida eʼtibor qaratildi.

Amudaryo tumani Madaniyat boʻlimida 15-may – Xalqaro oila kuniga bagʻishlab oʻtkazilgan bayram tadbirida “Yangi Oʻzbekistonning ibratli oilasi” respublika koʻrik tanlovining Qoraqalpogʻiston bosqichi gʻoliblari boʻlgan Amudaryo tumanidagi 11 ta oila vakillari munosib taqdirlandi.

Tadbirda tuman hokimining birinchi oʻrinbosari Faxriddin Yusupov soʻzga chiqib, yurtimizda oilaning jamiyatdagi oʻrnini oshirish, oila institutini har tomonlama qoʻllab-quvvatlash, oilalarda oʻzaro hamjihatlik, tinch va osoyishta hayot tarzini shakllantirish, oila mustahkamligini taʼminlash borasida olib borilayotgan islohotlar xususida soʻz yuritdi.

Muhtaram Prezidentimiz taʼbiri bilan aytganda, “Oila – muqaddas dargoh, muqaddasligi shundan iboratki, avvalo, qayerda ishlasangiz ham, kim boʻlib ishlasangiz ham, agar oilada tarbiya, oilada muhit, oilada halollik, munosabat, tarbiyaga alohida eʼtibor bermasangiz, hech qachon natija boʻlmaydi. Odam baxtliman deyishga qay darajada haqli? Agar oilang bilan sen baxtli boʻlsang, baxtliman deyishga haqing bor”.

Bayram tadbirida tuman hokimining birinchi oʻrinbosari Faxriddin Yusupov “Yangi Oʻzbekistonning ibratli oilasi” deya eʼtirof etilgan 11 ta oilalar aʼzolariga “Ibratli oila” koʻkrak nishoni hamda esdalik sovgʻalarini tantanali ravishda topshirdi. Tuman Madaniyat boʻlimining isteʼdodli xonandalari ijrosidagi betakror kuy-qoʻshiqlar tadbirga yuqori bayramona ruh bagʻishladi.

Taʼkidlash kerakki, oila – bu ijtimoiy barqarorlik kafolati. Mustahkam oilalarda ulgʻaygan farzandlar oʻz yoʻlini topgan, maqsadli, bilimli va vatanparvar, barkamol avlod boʻlib voyaga yetadi. Bu esa bevosita jamiyatning ilmiy, iqtisodiy va maʼnaviy rivojiga xizmat qiladi. Aksincha, oilaviy muammolar, ajralishlar va befarzandlik kabi muammolar jamiyatda salbiy oqibatlarga olib kelishi mumkin.

Shu sababli, davlatimiz tomonidan oila institutini mustahkamlashga, yosh oilalarni qoʻllab-quvvatlashga, farzandlar tarbiyasida ota-onalarning rolini oshirishga katta eʼtibor qaratilmoqda. Oilaviy qadriyatlarni mustahkamlashga qaratilgan qonunlar, ijtimoiy dasturlar, madaniy-maʼrifiy tadbirlar – bularning barchasi jamiyat taraqqiyoti uchun xizmat qilmoqda.

Oila mustahkamligi jamiyat barqarorligining, yurt ravnaqi va millat kelajagining asosiy omilidir. Har bir fuqaroning burchi – oʻz oilasini eʼzozlash, uni maʼnaviy poklik va mehr-oqibat asosida qurishdir. Zero, mustahkam oila – buyuk jamiyatning asosi demakdir.

Charos Arslonova, tuman hokimligining Axborot xizmati rahbari.