YoShLAR MASALASI - DOIMIY EʼTIBORDA

Bugungi kunda yurtimizda yoshlarga boʻlgan eʼtibor davlat siyosatining ustuvor yoʻnalishlaridan biri hisoblanadi. Chunki har qanday jamiyatning kelajagi, taraqqiyot yoʻli, avvalo, uning bilimli, irodali, tashabbuskor va sogʻlom yosh avlodiga bogʻliq. Shu boisdan, mamlakatimizda yoshlarni har tomonlama qoʻllab-quvvatlash, ularning salohiyatini toʻliq roʻyobga chiqarish uchun keng koʻlamli islohotlar amalga oshirilmoqda.

Mazkur islohotlar ijrosi, xususan, ishsiz va otaliqqa olingan yoshlar bilan ishlash yuzasidan amalga oshirilayotgan ishlarni tahlil qilish boʻyicha respublika ishchi guruhi Amudaryo tumanida oʻrganish ishlarini olib bormoqda.

Jarayon mobaynida respublika ishchi guruhi yoshlar bilan ishlashish boʻyicha tashkil etilgan tuman shtabi faoliyati bilan tanishdi. Shuningdek, korxona-tashkilotlar rahbarlari bilan uchrashib, otaliqqa olingan yoshlar bandligini taʼminlash, ularni qoʻllab-quvvatlash yuzasidan olib borilishi lozim boʻlgan chora-tadbirlar xususida tegishli taklif va tavsiyalar berildi.

Respublika ishchi guruhi vakillari yoshlarga ajratilgan yer maydonlaridan foydalanish holati bilan ham yaqindan tanishdi.

Davlatimiz rahbari tashabbusi bilan yoshlarga ajratilgan yerlardan samarali foydalanayotgan Amudaryo tumani Xizr eli mahallasida yashovchi Mansur Yoʻldashev va uning oila aʼzolarining iqtisodiy holati, turmush tarzi tobora yaxshilanmoqda.

Muhtaram Prezidentimizning "Yoshlarga yer ajratish orqali ularning daromadlarini oshirish va bandligini taʼminlash, shuningdek, yangi yer maydonlarini oʻzlashtirish chora-tadbirlari toʻgʻrisida"gi 153-sonli qarori asosida yosh oila yaxshigina daromad manbaiga ega boʻldi. Yer maydoni ajratilishi tufayli 3 nafar yoshlarning bandligi taʼminlandi. Yaxshi parvarish qilingan yerda turli xil sabzavot mahsulotlaridan yiliga ikki, uch marotaba moʻl hosil va yuqori daromad olinmoqda.

Taʼkidlash joizki, yoshlarni har tomonlama qoʻllab-quvvatlash va ularni iqtisodiy faoliyatga keng jalb etish maqsadida bir qator islohotlar amalga oshirilmoqda. Xususan, yoshlarning tadbirkorlik faoliyatini qoʻllab-quvvatlash uchun imtiyozli kreditlar ajratish orqali ularning oʻz biznesini boshlashiga keng imkoniyatlar yaratmoqda.

2025-yil 14-fevral kuni imzolangan "Yoshlar tadbirkorligini rivojlantirish va bandligini taʼminlashga doir qoʻshimcha chora-tadbirlar toʻgʻrisida"gi 62-sonli Prezident qarori asosida tumanimizdagi koʻplab yoshlarning tadbirkorlik tashabbuslari qoʻllab-quvvatlanmoqda.

Respublika ishchi guruhi vakillari tomonidan tumanda yoshlar tadbirkorligini qoʻllab-quvvatlash borasida yaratilayotgan imkoniyatlardan foydalanish holati oʻrganildi.

Qayd etish joizki, joriy yilning 14-fevral kuni oʻtkazilgan Oʻzbekiston Respublikasi Prezidentining yoshlar bilan ochiq muloqoti doirasida belgilangan asosiy vazifalar ijrosini taʼminlash, shuningdek, yoshlarning tashabbuslarini qoʻllab-quvvatlash, ilm-fanni ommalashtirish maqsadida "Oʻzbekiston Respublikasi Prezidentining yoshlar bilan ochiq muloqotida belgilangan vazifalarni amalga oshirishga doir chora-tadbirlar toʻgʻrisida"gi 61-sonli Farmon qabul qilingan edi.

Farmon bilan Toshkent shahri Olmazor tumani tajribasi asosida respublikaning har bir tumanida kamida bittadan maktabda muhandislik laboratoriyalarini tashkil etib, ularni zarur jihozlar bilan taʼminlash vazifasi belgilandi.

Respublika ishchi guruhi vakillari ushbu vazifalar ijrosi borasida Amudaryo tumanida tashkil etilgan ishlarni oʻrgandi hamda bu boradagi faoliyatni yanada jadallashtirish, laboratoriya xonalari tashkil qilish, jihozlash yuzasidan tegishli tavsiya va koʻrsatmalar berdi.

Charos Arslonova, tuman hokimligining Axborot xizmati rahbari.