Pedagoglarni attestatsiyadan oʻtkazish va malakasini sertifikatlash tartibi, ragʻbatlantirish tizimini takomillashtirilmoqda

Oʻzbekiston Respublikasi Vazirlar Mahkamasining 2025-yil 28-fevraldagi 130-sonli qarori bilan pedagoglarni attestatsiyadan oʻtkazish, malaka sertifikatlash va ragʻbatlantirish tizimini takomillashtirish boʻyicha ayrim hukumat qarorlariga oʻzgartirish va qoʻshimchalar kiritildi.

Ushbu qarorga koʻra, 2025-yil 1-sentyabrdan boshlab:

1. Majburiy attestatsiyadan ozod etiladigan pedagoglar:

Quyidagi toifadagi pedagoglar attestatsiyadan majburiy ravishda oʻtkazilmaydi va ularga mavjud malaka toifasi (lavozimi) boʻyicha ish haqi toʻlanadi:

15-yil davomida uzluksiz ravishda oliy malaka toifasini (bosh oʻqituvchi lavozimini) saqlab kelganlar;

25-yil va undan ortiq pedagogik ish stajiga ega boʻlganlar;

Pensiyaga chiqishiga 5-yildan kam vaqt qolganlar;

Pensiya yoshiga yetgan, hozirda ham pedagogik faoliyat bilan shugʻullanayotganlar.

2. Toʻgʻridan-toʻgʻri malaka toifasi beriladiganlar:

Quyidagi pedagoglarga bevosita malaka toifasi beriladi:

25-yil va undan ortiq pedagogik stajga ega boʻlganlarga – ularning amaldagi malaka toifasi (lavozimi);

Pensiyaga chiqishiga 5-yildan kam vaqt qolganlarga – amaldagi malaka toifasi (lavozimi);

15-yil davomida oliy malaka toifasini saqlaganlarga – bosh oʻqituvchi lavozimi (yaʼni oliy malaka toifasi).

3. Istakka koʻra navbatdan tashqari attestatsiya:

Pedagoglar istagiga koʻra navbatdan tashqari attestatsiyadan oʻtib, agar yuqoriroq malaka toifasini olsa, ularga yangi toifa boʻyicha sertifikat amal qiladigan muddat davomida ish haqi toʻlanadi.

4. Qoʻshimcha tartiblar:

Musiqa, madaniyat va jismoniy tarbiya fanlari oʻqituvchilari, pensiya yoshidagi va oliy maʼlumotga ega boʻlmagan pedagoglar ham attestatsiyadan oʻtkaziladi.

Maktabgacha va maktab taʼlimi tizimidagi faol yoki ilgari ishlagan malakali pedagog kadrlar ragʻbatlantiriladi.

Maktabgacha va maktab taʼlimi vaziri fondi faoliyati takomillashtiriladi.

Bu yangiliklar, asosan, tajribali pedagoglarni qoʻllab-quvvatlashga, ularning mehnatini qadrlashga va taʼlim tizimida sifatni oshirishga qaratilgan.

Nazokat Madiyorova, Amudaryo tumani Adliya boʻlimi Davlat xizmatlari markazi bosh mutaxassisi