Energiya resurslaridan qonuniy foydalanish — mavsumni betalafot oʻtkazishning garovi

Mamlakatimizda kuz-qish mavsumini betalafot oʻtkazish, aholi xonadonlari va ijtimoiy soha obʼektlarini energiya resurslari bilan uzluksiz taʼminlash — bugungi kunning eng dolzarb vazifalaridan biridir. Bu jarayonda qonun ustuvorligini taʼminlash va isrofgarchilikka yoʻl qoʻymaslik muhim ahamiyat kasb etadi. 10-yanvar kuni Amudaryo tumani prokurori Bahrom Masharipov boshchiligida oʻtkazilgan tezkor yigʻilish va amaliy oʻrganishlar aynan shu masalalarga qaratildi.

Erta tongdan tuman prokuraturasida gaz va elektr taʼminoti korxonalari xodimlari ishtirokida maxsus yigʻilish boʻlib oʻtdi. Unda kun tartibidagi eng ogʻriqli masala — energiya resurslaridan noqonuniy foydalanish holatlariga qarshi kurashish va taʼminotda uziishlarning oldini olish masalalari muhokama qilindi.

Tuman prokurori soha xodimlari oldiga aniq va qatʼiy vazifalarni qoʻydi. Xususan, joylarda aholi xonadonlari va tadbirkorlik subʼektlarida elektr energiyasi hamda tabiiy gazdan noqonuniy foydalanish, tarmoqqa oʻzboshimchalik bilan ulanish, oʻgʻirlik va talon-toroj qilish holatlarini aniqlash boʻyicha reyd tadbirlarini kuchaytirish topshirildi. Taʼkidlandiki, har bir oʻgʻirlangan kilovatt elektr energiya yoki bir kub metr gaz — bu kimningdir xonadonida issiqlik yetishmasligiga, qaysidir maktab yoki bogʻchaning sovuq qolishiga sabab boʻladi.

Shuningdek, yigʻilishda Oʻzbekiston Respublikasi Prezidentining 2025-yil 1-apreldagi qarori ijrosi doirasida tuzilgan maxsus shtab faoliyati tanqidiy tahlil qilindi. Shtab aʼzolari tomonidan tumandagi ijtimoiy soha obʼektlarida, yaʼni maktablar, bogʻchalar, shifoxonalar va boshqa muassasalar binolarida qish mavsumini talofatsiz oʻtkazish boʻyicha amalga oshirilgan oʻrganish natijalari muhokama qilindi. Prokuror aniqlangan kamchiliklarni bartaraf etish, mavsum davomida issiqlik tizimlarining uzluksiz ishlashini taʼminlash yuzasidan masʼullarga aniq muddatli koʻrsatmalar berdi.

Nazorat tadbirlari faqat xizmat xonasida emas, bevosita joylarda ham davom ettirildi. Tuman prokurori Bahrom Masharipov mutaxassislar hamrohligida tabiiy gaz tarmoqlarini modernizatsiya qilish jarayonlari bilan tanishdi.

Asosiy eʼtibor tumanning Boʻston mahallasi hududida amalga oshirilayotgan yirik loyihaga qaratildi. Maʼlumki, ushbu hududdagi aholi xonadonlarini gaz bilan taʼminlovchi diametri 159 millimetr boʻlgan quvurlar yillar davomida eskirib, yaroqsiz holga kelib qolgan edi. Bu esa gaz bosimining pasayishiga va texnik yoʻqotishlarga sabab boʻlayotgandi. Ayni paytda ushbu tarmoq diametri 219 millimetr boʻlgan yangi gaz quvurlariga almashtirilmoqda.

Prokuror qurilish-montaj ishlari jarayonida belgilangan texnik meʼyor va xavfsizlik talablariga qatʼiy rioya etilishini ham koʻzdan kechirdi. Asosiy maqsad — aholiga "zangori olov"ni nafaqat barqaror, balki xavfsiz, sifatli va yoʻqotishlarsiz, eng muhimi, uzluksiz yetkazib berishdir. Mazkur jarayonda belgilangan texnik meʼyor va xavfsizlik talablariga amal qilinishi ishchi-xodimlar hayoti va sogʻligʻini muhofaza qilish, avariya va noxush hodisalarning oldini olish, shuningdek, gaz taʼminoti tizimining barqaror va uzluksiz ishlashini kafolatlaydi. Shu boisdan, ishlar loyiha hujjatlariga muvofiq, malakali mutaxassislar tomonidan, belgilangan tartib va standartlar asosida amalga oshirilishi lozim. Texnik nazorat va masʼul tashkilotlar tomonidan doimiy tekshiruvlarning olib borilishi esa xavfsizlik darajasini yanada oshirishga xizmat qiladi.

Xulosa oʻrnida aytish mumkinki, bu kabi nazorat tadbirlari mavsumni betalafot oʻtkazish va aholi roziligini taʼminlashning muhim kafolatidir.