Amudaryo tumani fermerlari Kengashi Rayosati aʼzolarining fermerlarga, klasterlar va qishloq xoʻjaligi xodimlariga MUROJAATI

Amudaryo fermerlari Kengashi Rayosati aʼzolarining fermerlarga, klasterlar va qishloq xoʻjaligi xodimlariga MUROJAATI

Hurmatli fermerlar, mirishkor dehqonlar!

Prezidentimiz Shavkat Mirziyoyev joriy yilning 1-2-may kunlari Xorazm viloyatida boʻlib, hududlar rivoji va aholi hayoti bilan yaqindan tanishdi. Tashrif davomida Xorazm viloyatini qishloq xoʻjaligi tarmogʻida amalga oshirilishi zarur boʻlgan muhim vazifalar belgilab berildi.

Ayniqsa, suv resurslaridan oqilona foydalanish, ekinlarni yuqori agrotexnik darajada parvarishlash, fermer xoʻjaliklarini zamonaviy texnologiyalar bilan jihozlash masalalariga alohida eʼtibor qaratildi.

Tumanda ishonchli kelajak asosi ekanligini hisobga olib, joriy yilda 7 ta loyiha doirasida 10,1 mlrd soʻmlik investitsiyalar jalb etish, 250 gektar yerni qayta foydalanishga kiritish, 102 gektar mevali bogʻlar yaratish, 150 km ichki ariq va 40 km kanal betonlashtirish zarurligi qayd etildi.

Suvni iqtisod qilish boʻyicha Xorazm oʻz tajribasi asosida tumanimizdagi fermer va dehqonlar tomonidan 550 gektar yerga esa suv tejovchi texnologiyalar oʻrnatilganligi natijasida suv iqtisod qilinadi.

Kelgusida taʼminotchi korxonalar bilan  hamkorlikda 200 gektarda yomgʻirlab sugʻorishni joriy etish rejalashtirilmoqda.

Tumandagi fermerlar faoliyatiga joriy etilgan lazerli tekislash, avtopilotli traktorlar, quyosh panellari tannarxni tushirish va daromadni oshirishda muhim vositalarga aylanmoqda.

Prezidentimiz qayd etganidek, yozi jazirama issiq, qishi qahraton sovuq,  yerlari kuchli shoʻrlangan Xorazmda nafaqat mehnat qilish, balki bogʻ yaratish, moʻl hosil undirish - bu, ochiq aytish kerak, har kimning ham qoʻlidan kelmaydi. Shuning uchun xorazmlik dehqonlarni bir emas, ikki marta qahramon,  desak hech qanday mubolagʻa boʻlmaydi, deya eʼtirof qildilar.

Fermer va dehqonlar mehnatini qadrlab,  Xonqa tumanidagi “Sobirjon Yusuf” oilaviy fermer xoʻjaligi rahbari Oyimjon Otajanovaga Prezidentimiz farmoniga binoan  “Oʻzbekiston Respublikasida xizmat koʻrsatgan qishloq xoʻjaligi xodimi” faxriy unvoni berildi. Bu  tumanimizdagi barcha fermer va dehqonlarga yangi  kuch-gʻayrat bagʻishlab, yanada shijoat bilan ishlashga undaydi.

Bundan tashqari, Muhtaram Prezidentimizning eʼtiboridan ruhlangan  fermer va dehqonlarimiz innovatsion texnologiyalarga asoslangan holda yanada samarali mehnat qilib,  paxtadan 45-50 tsentnerdan, gʻalladan esa
80-100 tsentnerdan hosil olish orqali daromadlarini oshirish, shu bilan birga tumanimiz aholisini arzon va sifatli qishloq xoʻjaligi mahsulotlari bilan taʼminlashni maqsad qilishgan.

Hurmatli fermerlar!

Mevali bogʻlar, hosilga toʻla dalalar, toʻkin dasturxonlar - bularning barchasi Sizlarning kundalik, fidokorona mehnatingiz samarasidir.

Biz ishonamizki, sizlar bu yil ham oʻz tajriba va zamonaviy yondashuvlarga suyangan holda yuqori natijalarga erishasiz. Sizlarni yanada shijoat bilan mehnat qilishga, Xorazm tajribasini butun mamlakatga namuna qilib koʻrsatishga chaqiramiz!

Har biringiz bilasizki, qishloq xoʻjaligidagi asosiy maqsad - yuqori hosil, past tannarx va barqaror daromadga erishish. Buning uchun davlat tomonidan keng koʻlamli shart-sharoitlar yaratib berilmoqda. Har yili minglab gektar yerlarda zamonaviy sugʻorish texnologiyalari (tomchilab va yomgʻirlab sugʻorish) joriy etilishi, lazerli tekislash, energiya tejaydigan texnika va quyosh panellari kabi innovatsiyalarni qoʻllash qoʻllab-quvvatlanmoqda.

Ilm, texnologiya va tajribani asosiy ish quroliga aylantirgan zamonaviy fermerimiz mineral oʻgʻitlar oʻrniga biotexnologiyalardan oqilona foydalanishga intilib, ilmiy tavsiyalar asosida hasharotlar va kasalliklarga qarshi biologik usullarni keng joriy etilmoqda. Zero, har bir yurtdoshimiz yaxshi biladi: bugungi fermer faqat yerda ishlaydigan odam emas - u agrobiznes yetakchisi, tadbirkor va mutaxassisdir. Shu boisdan har bir hududda mahalliy sharoitga mos agrotexnik tadbirlar belgilanmoqda.

Hurmatli dehqon va fermerlar!

Ayni kunlarda gʻalladan yuqori hosil kutilmoqda. Hosilga hosil qoʻshib, yuqori marralarga erishish uchun quyidagi kechiktirib boʻlmaydigan dolzarb ishlarni amalga oshirishimiz zarur:

- gʻalla hosili pishishi arafasida dala maydonlarini suv bostirmasdan peshma-pesh sharbat usulida sugʻorish ishlarini amalga oshirishimiz kerak;

-  hosilni nes-nobud qilmasdan yigʻishtirib olishda oʻrim kombaynlarini mavsumga tayyorgarligini yana bir bor koʻrib chiqish zarur.

Tumanimizda paxta ekish mavsumi muvaffaqiyatli yakunlandi. Dalalarda gʻoʻzadan toʻliq nihol undirib olindi. Eng muhimi  suvning oldingi yillarga nisbatan koʻpayishi bu yilgi hosilning moʻl boʻlishi garovidir. Yuqori xirmon yaratish uchun bugun quyidagi agrotexnik tadbirlarni kechirtirmasdan amalga oshirish talab etiladi:

- tumanda har bir fermer kesimida agrotexnik tadbirlarni oʻtkazish boʻyicha amalga oshiriladigan chora-tadbirlar rejasini ishlab chiqish, shu asosda ishlarni aniq tashkil qilish lozim;

- gʻoʻza unib chiqqan maydonlarda gektariga 200 kg karbamid va 100 kg kaliyli mineral oʻgʻiti bilan kultivatsiya qilish zarur;

-gʻoʻza maydonlaridagi mavjud begona oʻtlarni tez fursatda tozalab, begona oʻtdan tozalanmagan gʻoʻza maydonlariga mineral oʻgʻit bermaslik boʻyicha fermer xoʻjalik rahbarlarini qatʼiy ogohlantirish lozim;

-suvchilarga toʻliq sharoit yaratib bergan holda, gʻoʻzani sugʻorishda suvning isrofgarchiligiga yoʻl qoʻymasdan, 1- va 2- sugʻorish ishlarini belgilangan muddatlarda yakunlash chorasini koʻrish zarur;

- rivojlanishdan orqada qolayotgan gʻoʻza maydonlarini qoʻshimcha oziqlantirib, shu qatori qoʻshimcha kultivatsiya, chuqur yumshatish, suspenziya sepish ishlarini hamda sugʻorishni faqat sharbat va fekal bilan oʻtkazish kerak;

- tuman ishchi guruhlari mavjud muammolarni dalaning oʻzida hal qilib, yoʻl qoʻyilgan kamchiliklar boʻyicha zudlik bilan qoʻshimcha agrotexnik tadbirlar belgilab, xar bir dalaga nazorat uchun masʼullarni biriktirishi lozim;

-birinchi navbatda agrotexnik tadbirlarni ekini sust rivojlangan maydonlarda boshlanishiga alohida eʼtibor qaratish kerak;

- OVX purkagichlari yordamida barcha fermer xoʻjaliklari suspenziya uchun ishchi eritmani asosan ertalabki va kechki salqin paytlarda sepishni, eng asosiysi gʻoʻzaning oʻsish va rivojlanishini rostlab borish maqsadida zamonaviy “PIKS” preparati bilan ishlashni tashkil qilishi lozim;

- gʻoʻzaning turli kasalliklari, hasharotlarga qarshi kurashish uchun biolaboratoriyalarni toʻla quvvat bilan ishlatish lozim. Asosan, biomahsulotlarni dalaga ertalab soat 5:00 dan 9:00 gacha, kech soat 16:00 dan 20:00 gacha belgilangan tartibda  chiqarish kerak. Har bir gektar gʻoʻza maydoniga 2 tadan feromon tutqich va 10 ta suyuqlik solingan idishlarni oʻrnatish hamda har 3 kunda suyuqlik, kley va kapsulalarni yangilab turish shart (albatta mutaxassis tavsiyasi asosida).

Hurmatli fermerlar va klaster rahbarlari!

Sizlarning fidokorona mehnatingiz natijasida aholi tabiiy, sifatli oziq-ovqat bilan taʼminlanmoqda. Qishloqlarda hayot sifati yaxshilanib, yangidan-yangi ish oʻrinlari yaratilmoqda. Eksport salohiyati ortib, yurtimiz brendini dunyo tanimoqda.

Ayni kunlarda gʻalla va paxta dalalaridagi barcha agrotexnik tadbirlarni tezkorlik bilan, aniq reja asosida amalga oshirish talab etiladi. Buning uchun suvni tejab, belgilangan muddatda sugʻorishni taʼminlash, mineral oʻgʻitlardan va yerdan oqilona foydalanish hamda oʻrim-yigʻimga sifatli tayyorgarlik koʻrishga qatʼiy bel bogʻlash, bu muddatlarni oʻtkazib yubormaslik zarur.

Biz ishonamizki, fermerlarimiz bilim, tajriba va mehnatsevarligi bilan bu yil ham yuksak natijalarga erishadilar!

Amudaryo fermerlari Kengashi Rayosati