Tomorqa barqaror daromad manbaiga aylanmoqda

Bugungi kunda mamlakatimizda aholi bandligini taʼminlash, turmush darajasini oshirish va barqaror iqtisodiy oʻsishga erishish davlat siyosatining ustuvor yoʻnalishlaridan biriga aylangan. Amalga oshirilayotgan islohotlar, avvalo, yangi ish oʻrinlari yaratish va xalq farovonligini taʼminlashga qaratilgan. Aholi bandligini taʼminlash va oilalar daromadlarini oshirishda, ayniqsa, mahallalarda tomorqa va dehqon xoʻjaliklarini rivojlantirishga alohida eʼtibor berilyapti.

Prezidentimizning 2024-yil 5-mart kuni qabul qilingan “Aholi xonadonlarida sanoat usulida mahsulot ishlab chiqarishni qoʻllab-quvvatlash hamda tomorqa va dehqon xoʻjaliklarida yangi zaxiralarni ishga solishga doir chora-tadbirlar toʻgʻrisida”gi Qarori mazkur yoʻnalishdagi muhim huquqiy asos boʻlib xizmat qilmoqda. Hujjat asosida mamlakatimizning barcha hududlarida keng koʻlamli ishlar amalga oshirilmoqda.

Amudaryo tumanining Oq oltin ovul fuqarolar yigʻini raisi Alisher Shamshatov boshchiligidagi “Mahalla yettiligi” aʼzolari aholi tomorqalaridan samarali foydalanishni muntazam ravishda targʻib qilib kelmoqda. Jamoa oldidagi asosiy maqsad – ishsizlikni kamaytirish va aholi turmush darajasini yaxshilashdir. Ovuldagi mehnatsevar insonlar har bir kunni gʻanimat bilib, mehnatni hayot mazmuniga aylantirishgan.

Shunday bobodehqonlardan biri — nuroniy Yangiboy Qurboniyozovdir. “Oʻzbekiston temir yoʻllari” tizimida uzoq yillar samarali mehnat qilgan bu inson hozirda oʻz tomorqasi imkoniyatlaridan toʻliq foydalanib, oilasi bilan farovon hayot kechirmoqda. Xonadonidagi 4 sotixli issiqxonada xorij navidagi kartoshka yetishtirilmoqda. Tomorqachi yaqin kunlarda hosilni yigʻib, sabzi ekishni rejalashtirmoqda.

Bundan tashqari, 1 sotix maydonda koʻchatxona tashkil etilgan boʻlib, unda gullar, pomidor, karam va boshqa poliz mahsulotlari parvarish qilinadi. Issiqxonadan tashqari yana 4 sotix yerda karam va baqlajon yetishtirilayotgani yerga berilgan mehr va halol mehnat samarasi sifatida har yili 2-3-marta tomorqadan barqaror daromad keltirmoqda. Yetishtirilgan mahsulotlar mahalliy bozorlarda xaridorsiz qolmaydi.

Yangiboy Qurboniyozov xonadonida chorvachilik ham yoʻlga qoʻyilgan boʻlib, ekin-tekin, mevali daraxtlar, gullar va chorvachilik uygʻunligida amalga oshirilayotgan mehnat oʻz barakasini bermoqda.

Oq oltin ovulidagi yana bir ibratli oila – Bahrom Oʻrazimbetov xonadoni. Oila 20 sotixdan ortiq yerda poliz ekinlari parvarish qilib, barqaror daromad manbaiga ega boʻlishyapti. Oila rahbari Bahrom Oʻrazimbetovga turmush oʻrtogʻi Gulasal Sodiqova va oʻgʻli Akbar Saidmurodov koʻmakchi boʻlib, xonadonda 2 sotixli issiqxona ham tashkil etishgan. Qish oylarida bu yerda koʻchatlar yetishtirilib, aholi va doimiy mijozlar tomonidan xarid qilinadi. Hozirda issiqxonada yangi mavsum uchun tayyorgarlik ishlari olib borilmoqda.

Bu oila ham chorvachilik bilan shugʻullanadi. Bundan tashqari, yoshlar yetakchisining koʻmagida Akbar Saidmurodovga 30 sotix yer ajratilib, u yerda asosan qovun va tarvuz yetishtirish yoʻlga qoʻyilgan. Bu kabi tashabbuslar yoshlar bandligini taʼminlash va ularni ishbilarmonlikka undashda muhim omil boʻlmoqda.

Maʼlumot oʻrnida qayd etish joizki, tumanda 49 ta mahalla, 39 ming 853 ta xonadon mavjud. Ularning 39 ming 477 tasida jami 5 ming 760,3 gektar tomorqa yer maydoni bor. Joriy yil bahorida 2 ming 277,7 gektar yerga ertagi ekinlar ekilgan. Jumladan, 1 ming 401 gektarga sabzavot, 338,2 gektarga poliz ekinlari, 153,1 gektarga dukkakli ekinlar, 173,7 gektarga ozuqa, 33 gektarga moyli ekinlar va 178,6 gektarga boshqa turdagi ekinlar ekilgan.

Tumandagi 5613 nafar ishsiz fuqaroga 2 ming 41 gektarga yaqin yer maydoni ijaraga berilib, ular tomonidan sabzavot, poliz, ozuqa va boshqa ekinlar parvarish qilinmoqda. Shuningdek, tumanda umumiy maydoni salkam 31 gektar boʻlgan issiqxonalar faoliyat yuritib, ularning 7,8 gektarida pomidor, 6,5 gektarida bodring, 4,1 gektarida koʻkatlar, 7 gektarida sabzavot va 5,8 gektarida boshqa turdagi mahsulotlar yetishtirilmoqda.

Davlat rahbari boshchiligida amalga oshirilayotgan islohotlar tufayli, bugun tomorqa nafaqat oziq-ovqat manbai, balki farovon hayot, toʻkinlik va barqaror daromad kafolatiga aylanmoqda. Oq oltin ovulidagi mehnatkash insonlar hayoti shundan dalolat beradiki, agar har bir xonadon oʻz tomorqasidan unumli foydalansa, bu nafaqat oila, balki butun mahallaning, pirovardida butun mamlakatning ijtimoiy-iqtisodiy taraqqiyotiga xizmat qiladi.

Shohzod Qurbonboyev.