Xalqaro ilmiy-amaliy anjumanda taʼlimda sunʼiy intellekt istiqbollari muhokama qilindi

Bugungi kunda mamlakatimizda raqamli iqtisodiyotni jadal rivojlantirish, barcha sohalarda – ayniqsa, davlat boshqaruvi, taʼlim, sogʻliqni saqlash va qishloq xoʻjaligida zamonaviy axborot-kommunikatsiya texnologiyalarini keng joriy etish boʻyicha izchil islohotlar amalga oshirilmoqda. Ushbu yoʻnalishda hayotga tatbiq etilayotgan kompleks chora-tadbirlar raqamli transformatsiya jarayonining jamiyat taraqqiyotida tutgan oʻrni va ahamiyati nihoyatda yuqori ekanini yaqqol namoyon qilmoqda.

Xususan, elektron hukumat tizimini takomillashtirish, dasturiy mahsulotlar hamda axborot texnologiyalarining mahalliy bozorini rivojlantirish, barcha hududlarda IT-parklarni tashkil etish, sohada talab yuqori boʻlgan malakali kadrlarni tayyorlashga qaratilgan 220 dan ortiq ustuvor loyihalar amalga oshirilmoqda. Shuningdek, 40 dan ziyod axborot tizimlari bilan integratsiyalashgan geoportal faoliyati yoʻlga qoʻyildi. Jamoat transporti va kommunal infratuzilmani boshqarishga qaratilgan axborot tizimlari ishlab chiqilmoqda. “Raqamli Toshkent” dasturi doirasida esa ijtimoiy sohani raqamlashtirish boʻyicha amaliy ishlar boshlangan boʻlib, bu tajriba kelgusida boshqa hududlarda ham tatbiq etilishi koʻzda tutilmoqda.

Joriy yilning 8–9-aprel kunlari Nukus shahridagi Innovatsion texnologiyalar universitetida Oʻzbekiston Respublikasi Oliy taʼlim, fan va innovatsiyalar vazirligining tegishli buyrugʻi asosida “Sunʼiy intellekt va taʼlim: imkoniyatlar, muammolar va istiqbollar” mavzusida xalqaro ilmiy-amaliy anjuman boʻlib oʻtdi.

Anjumanning asosiy maqsadi – jahonda keng qoʻllanilayotgan sunʼiy intellekt texnologiyalarini yurtimiz hayotiga tatbiq etish, raqamli maʼlumotlardan samarali foydalanish mexanizmlarini yoʻlga qoʻyish, oliy taʼlim tizimini raqobatbardosh darajaga olib chiqish va uning jozibadorligini oshirishdan iborat.

Anjumanda Qoraqalpogʻiston Respublikasi Joʻqorgʻi Kengesining Ijtimoiy-madaniy rivojlanish, yoshlar siyosati va jamoat birlashmalari masalalari qoʻmitasi raisi Murat Atamuratov, Vazirlar Kengashi Raisining yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosari Bayram Otemuratov hamda Yoshlar ishlari agentligi Qoraqalpogʻiston Respublikasi boshqarmasi boshligʻi Polat Maxsetbayev va boshqalar ishtirok etdilar. Mehmonlarni universitet rektori Anvar Aʼzamov kutib oldi va anjumanning maqsad va vazifalari bilan tanishtirdi.

Oʻzbekiston Respublikasi Prezidentining 2024-yil 14-oktyabrdagi “Sunʼiy intellekt texnologiyalarini 2030-yilgacha rivojlantirish strategiyasini tasdiqlash toʻgʻrisida”gi Qaroriga muvofiq, 2030-yilgacha sunʼiy intellekt asosida yaratilgan dasturiy mahsulotlar va xizmatlar hajmini 1,5 milliard AQSh dollariga yetkazish, Yagona interaktiv davlat xizmatlari portalida sunʼiy intellekt texnologiyalari asosida koʻrsatiladigan xizmatlar ulushini 10 foizga oshirish, soha boʻyicha 10 ta ilmiy laboratoriya tashkil etish va yuqori hisoblash quvvatiga ega serverlarni ishga tushirish, shuningdek, Hukumatlarning sunʼiy intellektga tayyorlik indeksida Oʻzbekistonni dunyodagi ilgʻor 50 davlat qatoriga kiritish belgilangan.

Shu bilan birga, sohani rivojlantirish boʻyicha ustuvor vazifalar sifatida sunʼiy intellekt sohasida normativ-huquqiy bazani shakllantirish va xalqaro hamkorlikni mustahkamlash, texnik infratuzilmani yaratish va ushbu texnologiyalarga asoslangan loyihalarni amalga oshirish, aholining sunʼiy intellektdan foydalanish boʻyicha bilim va koʻnikmalarini oshirish hamda soha uchun kadrlar salohiyatini yuksaltirish belgilangan.

Bu kabi chora-tadbirlar, anjumanlar va davlat strategiyalari mamlakatimizda raqamli iqtisodiyot va sunʼiy intellektni rivojlantirish, iqtisodiy oʻsishni taʼminlash, taʼlim sifatini oshirish, davlat xizmatlarining samaradorligini kuchaytirish hamda jamiyatning raqamli savodxonligini yuksaltirishga xizmat qiladi.

Shohzod Qurbonboyev.