Hokim va yoshlar uchrashuvi tashkil etildi

“Yangi Oʻzbekistonning nafasi, surʼati va shiddatini avvalo aziz oʻgʻil-qizlarimizning azmu shijoati, dadil fikr va takliflarida, erishayotgan dastlabki yutuqlarida koʻraman” – deya koʻp bora taʼkidlaydi, muhtaram prezidentimiz Shavkat Mirziyoyev oʻz nutqlarida.

Davlatimiz rahbari tashabbusi bilan mamlakatimizda yoshlarga boʻlgan eʼtibor, oʻsib kelayotgan barkamol avlodga boʻlgan gʻamxoʻrlik davlat siyosati darajasiga koʻtarilgani bilan ahamiyatlidir. Zero, yoshlar Vatan kelajagi, ertangi kunning bunyodkorlaridir. Joylarda ertamiz egalarining qiziqishlarini qoʻllab-quvvatlab, hokimlar yosh avlod vakillari bilan uchrashuvlar oʻtkazayotganini fikrimizning dalili sifatida keltirish mumkin.

Amudaryo tumani yoshlarini har tomonlama qoʻllab-quvvatlash, ularning orzu-istaklari bilan yaqindan tanishish, takliflarini, muammolarini tinglash hamda amaliy yordam koʻrsatish maqsadida 27-mart kuni hokim va yoshlar uchrashuvi tashkil etildi. Uchrashuvda tuman hokimi Sobir Xoʻjametov, tuman prokurori Bahram Masharipov, hokim oʻrinbosarlari, boʻlimlar, tijorat banklari boshliqlari hamda yoshlar ishtirok etdi.

Uchrashuvda tuman hokimi Sobir Xoʻjametov bugungi kunda yosh avlod vakillarining jamiyatda tutgan oʻrni va ahamiyatini yana kuchaytirish, ularning tashabbuslarini qoʻllab quvvatlash, qobiliyatlarini yuzaga chiqarish, har jabhada yoshlarga qoʻl-qanot boʻlish borasida yaratilayotgan imkoniyatlar va shart-sharoitlar xususida soʻz yuritdi.

Taʼkidlanganidek, soʻnggi yillarda mamlakatimizda yoshlarga oid davlat siyosati sohasida keng koʻlamli ishlar amalga oshirilmoqda. Oʻtgan vaqt ichida yoshlarni har tomonlama qoʻllab-quvvatlash, ularning huquq va qonuniy manfaatlarini himoya qilish, mamlakatimiz istiqboli uchun masʼuliyatni oʻz zimmasiga olishga qodir, tashabbuskor, shijoatli yoshlarni tarbiyalash borasida alohida tizim yaratildi.

Ochiq muloqot tarzida tashkil etilgan uchrashuv mobaynida tijorat banklari hamda boʻlimlar boshliqlari tomonidan yoshlar uchun barcha yoʻnalishlarda yaratilayotgan imkoniyatlar xususida maʼlumotlar berildi. Har bir tijorat banki rahbari yoshlar tadbirkorligini qoʻllab-quvvatlash, tashabbuskor loyihalarini amalga oshirishlari uchun mavjud imtiyozlar xususida soʻz yuritdilar.

Shundan soʻng tumanimiz yoshlari masʼullarga turli masalalar yuzasidan savollar hamda murojaatlar yoʻlladilar. Yoshlarning muammoli masalalari yuzasidan yoʻllangan murojaatlarining ijobiy hal etilishi yuzasidan tegishli masʼullarga topshiriqlar berildi. Jarayon mobaynida yoshlarning turli mazmundagi savollariga ham atroflicha javoblar berildi.

Taʼkidlash joizki, bugun Oʻzbekistonda yuksak maʼnaviyatli, ham ruhan, ham jismonan barkamol avlod tarbiyalanmoqda. Bugungi yoshlarning ong-u tafakkuri, dunyoqarashi ham oʻzgargan. Yoshlarimiz orasida yangicha oʻylaydigan, innovatsion gʻoyalarini amaliyotga tatbiq eta oladigan kuchlar borligi barchamizni quvontiradi.

Uchrashuvda ishtirok etgan yoshlar murojaat va savollar bilan birga tuman hokimiga oʻz takliflarini ham berishdi. Ikki soatga yaqin davom etgan hokim va yoshlar uchrashuvi ishtirokchilarda katta taassurotlar qoldirdi.

Charos Arslonova, tuman hokimligining Axborot xizmati rahbari.