“Deputatlar bogʻi”ga ilk koʻchatlar ekildi

Muhtaram Prezidentimiz tashabbusi bilan butun mamlakatimiz boʻylab amalga oshirilayotgan “Yashil makon” umummilliy loyihasi doirasida Amudaryo tumanida ham ommaviy tarzda daraxt va buta koʻchatlarini ekish, shu orqali respublikada yashil maydonlar koʻlamini koʻpaytirish borasida keng qamrovli ishlar amalga oshirilmoqda.

Loyiha doirasidagi xayrli ishda Xalq deputatlari tuman kengashi deputatlari ham faol ishtirok etmoqdalar. Yaqinda deputatlar tashabbusi bilan Oybek mahallasi hududida “Deputatlar bogʻi” tashkil etildi va bogʻ hududiga ilk koʻchatlar ekildi. Ushbu xayrli tadbirda Xalq deputatlari tuman kengashi deputatlari, kengash kotibiyati, siyosiy partiyalar masʼullari hamda ommaviy axborot vositalari vakillari ishtirok etdi. Mahalla hududida “Deputatlar bogʻi” uchun ajratilgan 4 gektar maydonga tur xil mevali daraxtlar koʻchatlari ekildi.

Taʼkidlash joizki, soʻnggi yillarda mamlakatimizda ekologik vaziyatni yaxshilash, yashil hududlarni kengaytirish, tabiat va ekologiya ifloslanishi borasida kelib chiqishi mumkin boʻlgan muammolarning oldini olish maqsadida qator samarali ishlar amalga oshirilmoqda.

Oʻzbekiston Respublikasi Prezidentining 2019-yil 30-oktyabrdagi “2030-yilgacha boʻlgan davrda Oʻzbekiston Respublikasining atrof-muhitni muhofaza qilish kontseptsiyasi”, 2021-yil 30-dekabrdagi “Respublikada koʻkalamzorlashtirish ishlarini jadallashtirish, daraxtlar muhofazasini yanada samarali tashkil etish chora-tadbirlari” toʻgʻrisidagi farmoni hamda 2023-yil 23-noyabrdagi “Respublikada yashillik darajasini yanada oshirish, “Yashil makon” umummilliy loyihasini izchil amalga oshirish orqali ekologik barqarorlikni taʼminlash chora-tadbirlari toʻgʻrisida” farmoni bu boradagi ishlarda muhim dasturulamal boʻlmoqda.

Shuni unutmaslik kerakki, tabiatni asrab-avaylash har birimizning insoniy burchimizdir. “Yashil makon” loyihasi aynan biz nafas olayotgan havo musaffoligini taʼminlashda dolzarb ahamiyat kasb etadi. Yashil hududlarni kengaytirish orqali nafaqat ekologiya va tabiatni asraymiz, balki oʻzimiz, oila aʼzolarimiz va yaqinlarimizning salomatligini mustahkamlashga hissa qoʻshgan boʻlamiz.

Aholi yashash punktlarida daraxtlar ekish, yashillikni yaratish va yangilash muhim jarayondir. Boisi, daraxtlar havodagi zararli karbonat angidrid gazini yutib, kislorod ishlab chiqaradi va bizning nafas olishimizga yordam beradi. Ular issiqda salqinlik beradi, atrof-muhitni shovqinlardan himoya qiladi.

“Yashil makon” umummilliy loyihasi bogʻ-u rogʻlarni barpo qilishda muhimdir. Sababi, oʻzi yashayotgan makonni yashillikka burkash, bogʻ-u boʻstonlar, gulzor-u gulistonlar barpo qilish inson hayotini boqiylikka daxldor qiladi. Xalqimiz: “Yaxshidan bogʻ qoladi”, deya bejiz taʼkidlamagan. Xalq deputatlari Amudaryo tuman kengashi deputatlari ham ushbu naqlga amal qilib, “Deputatlar bogʻi”ni tashkil etishda faol boʻldilar hamda ulugʻ kunlarda ezgu niyatlar bilan yerga koʻchat oʻtqazdilar.

Aziz yurtdoshlar! “Yashil makon” umummilliy loyihasida faol ishtirok etish vatanparvarlik, elparvarlik va saxovat namunasi ekanini unutmang! Yurt ravnaqi, mamlakat taraqqiyoti, xalq farovonligi, avlodlar saodati yoʻlidagi ezgu, xayrli amalga har birimiz hissa qoʻshaylik!

Charos Arslonova, tuman hokimligining Axborot xizmati rahbari.